Ўсмирлар ўртасидаги Осиё чемпионатида гуруҳ босқичидаги ўйинларимиз бир бўлдию, чорак финал ўйини бир бўлди. Гуруҳ давомида аста-секин ўйинимизни ва натижаларни яхшилаб борган бўлсак, айнан ЖЧ йўлланмаси ўйналадиган ҳал қилувчи баҳсда бутунлай бошқа вазиятга дуч келдик.
Ўзининг доимий иссиқ ҳарорати билан ажралиб турган Бангкок иқлими бугун бизни тинимсиз ёмғири билан кутиб олди. Ёғаётган кучли ёмғир туфайли ўйин 30 дақиқага кечиктирилди. Шунда ҳам ёмғир тўхтамади, аксинча, майдонни янада сув билан тўлдириб, уни ботқоққа айлантириб қўйди (дренаж системаси талабга жавоб бермайдиган стадионни мусобақага қабул қилган ОФК ходимларига саломлар!).
Ана шу паллада Сурияга омад кулиб боққан бўлса, мураббийларимизга бироз тадбиркорлик етишмади. Жамоамиз ботқоқда комбинацион ўйин намойиш қилмоқчи бўлди, аммо қаёқда дейсиз бундай ўйин!... Аксинча, ўйиндан олдинги ярим соатлик чигалёзди машғулоти чоғида майдоннинг ҳолатини кўрганидан кейин мураббийлар штаби футболчиларга тайинлаш керак эди: "Тўп тушган заҳоти тўпни олдинга тепишни ва ҳужумчиларимиз 3-4 киши бўлиб тўп учун ёпишиш керак!"
Худди шу ишни Сурия қилди. Тўп олдинга тепилди, қолган ишни бўйдор, тезкор Абдулраҳмон Баракат бажарди. Хет-трик! Ана шу хет-трик ўйин тақдирини ҳал қилиб бўлганди.
Мочинов биринчи бўлимнинг ўзидаёқ футболчи алмаштириб, бошланғич таркибни хатога танлашда йўл қўйганини исботлади. Захирадан Маҳмудҳожиев тушганидан кейин ўйинимиз кескин жонланиб кетди (аммо бу пайтда ҳисоб 0:5га етиб бўлганди). Аввалига Шоҳрухнинг ўзи гол урди, кейин пенальти ишлади (ундан Ғаниев фойдалана олмади), яна пенальти ишлади ва ундан гол урди (нега шундай футболчини асосий таркибда туширмаган Мочиновга саломлар!).
Александр Мочинов икки ой аввал жамоани қабул қилган бўлса-да, жамоанинг ўйин услубини шакллантиришга ҳаракат қилди. Аммо у ҳам мудофаани "бетон"га айлантира олмаган экан. Ўзи Темур Олимхўжаев айнан ҳимоядаги муаммолар туфайли ишдан олинганди (мазкур терма жамоани аввал бошдан Мочинов каби яхши мураббийга топширмаган ЎФФ ва Асқар Толибжоновга айлангали саломлар!).
Хуллас, вазифани эплай олмадик. Шунча муаммо билан ЖЧга чиқишимиз ҳам қийин эди. Мочинов қўлидан келганини қилди. Аммо ЎФФ профессионал ишлай олмади. Таиландга бир комплект футболкалар олиб кетилган экан, ўйинчилар танаффусда уларни алмаштира олмадилар (Асқар ака, ўқияпсизми бизни, сизга чуқур эҳтиром билан саломларимиз!).
Нима ҳам дердик. Укаларимиз мазкур мусобақада катта тажриба тўплашдики. Ҳар бир ўйин асабий тарзда ўтди, бу тажриба бўлмай, нима? Ана шу мусобақадан хулоса чиқариб, кейинчалик ёшлар, олимпия ва миллий терма жамоамизга муносиб футболчилар бўлиб етишишида уларга омадлар тилаймиз!
Ўсмирлар ўртасида Осиё чемпионати, чорак финал
ЎЗБЕКИСТОН - СУРИЯ - 2:5
Голлар: Шоҳрух Маҳмудҳожиев (62, 87-пен.) — Абдулраҳмон Баракат (16, 30, 48), Муҳаммад Жаддуа (52), Анас ал-Ажи (55)
Ноаниқ пенальти: Азизбек Ғаниев (66)
Огоҳлантиришлар: Ислом Кенжабоев (47), .Суҳроб Нуруллоев (56), Илҳомжон Алижонов (90+5), Акром Хўжаев (90+5) — Муҳаммд Жаддуа (12), Муҳаммад Лоулоу (24) Васим ан-Надаф (86)
Четлатиш: Ойбек Нурматов (90+4)
Ўзбекистон: 1.Акром Хўжаев, 3.Илҳомжон Алижонов, 4.Озодбек Қурбонов, 6.Ойбек Нурматов, 7.Жонибек Кўчимов (Худойберди Холиқов 40), 8.Ислом Кенжабоев, 10.Суҳроб Нуруллоев, 11.Азизжон Ғаниев, 14.Достонбек Бердиқулов (Юсуф Шоимов 58), 17. Дониёр Ҳошимов, 22.Абдуғани Ғанижонов (Шоҳрух Маҳмудҳожиев 54)
Сурия: 1.Уильям Ғаннам, 3.Умар Лаҳлаҳ, 4.Ҳассан Карам ал-Дамен, 5.Васим ан-Надаф, 6.Муҳаммад Лоулоу, 7.Муҳаммад Басел Кавакби, 8.Аҳмад Ражаб, 9.Найим Ғазал Найим, 10.Муҳаммд Жаддуа, 11.Анас Ал-Ажи,18.Абдулраҳмон Баракат
Бош ҳакам: Алиризо Фағоний (Эрон)
ЭРОН - КХДР - 0:0. Пенальтилар бўйича - 2:4.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
