Луис Энрике Пикенинг ўз ишига бўлган муносабатидан норози, Пике эса клубдаги ўрнидан. Каталонияда кўпчилик кутаётган, ёки бўлмаса аксинча, ҳеч ким кутмаган воқеа содир бўлиши мумкин. Боиси, Жерар Пике қишда жамоасини алмаштириш борасида жиддий ўйга тушмоқда.
Очиқ айтиш мумкинки, Пике сўнгги вақтларда ундан кутилаётган ўйинни намойиш эта олмаётгани факт. Бир неча йиллар давомида турли рамзий терма жамоалардан жой олиб келган ва келажакда нафақат Испаниянинг, балки жаҳоннинг энг яҳши марказий ҳимоячиларидан бири бўлиши кутилаётган ҳимоячи айни дамда ҳатто "Барселона" қайдномасидан ҳам ўрин олмаяпти.
Пикенинг ҳарактери жуда оғир ва айнан шунинг учун ҳам ўз вақтида сэр Алекс Фергюссон ҳам у билан тил топишишга қийналган эди. Ферги ўзининг айтганини қилмайдиган футболчилар билан ишлай олмайди. Жуда ёш бўлишига қарамай, оғир феъли билан ажралиб турадиган футболчини Фергюссон индамай Каталонияга қўйиб юборганди. Бу орада Гвардиола у билан тил топиша олди. Ҳам ака сифатида, ҳам устоз сифатида керак пайтда маслаҳат берди, керак пайтда танқид ҳам қилди. Шундан сўнг, Пике икки-уч йил давомида ўз потенциалини тўлиқ бўлмаса ҳам намойиш этди ва "Барса" меҳанизмининг муҳим қисмига айланди.
Умуман, ноодатий ҳарактери ва ҳазиллари билан ном чиқарган ҳимоячининг бугунги аҳволига тушишга фақат унинг ўзи айбдорми? Хави кутилмаганда аввалги савиясидаги ўйинини намойиш этишдан тўхтади. Иньеста эса аввалги мавсумларда намойиш этган ўйинининг ўндан бирини ҳам намойиш этмаяпти. Месси эса, умуман бошқача типдаги футболчига айланди. Ёзда Барселонани тарк этиб, айни дамда "Челси"да бошқатдан "очилган" Фабрегасга эътибор беринг. Сеск бошқадан уйғонди ва ўз савиясига мос бўлган ва "Барса" сафида намойиш эта олмаган ўйинини Лондонда намойиш этмоқда. Демак, юзага келган муаммони фақат Пикега тўнкаш ҳам бироз мантиқсиздек. Мураббийлар алмашинуви, жамоага янги келиб қўшилган ўйинчлар ҳам айни дамда, Барса ўйинида кўзга ташланаётган кичик муаммоларга сабабдек.
Пике ва Луис Энрике ўртасидаги зиддият нимадан бошланди?
Умуман олганда, мавсум бошидаги ўйинларни ҳам ҳисоблаганда Пике Луис Энрике учун катта аҳамият касб этадиган футболчи эмаслиги кўзга ташланади. Янги мураббий ҳимоя марказида Маскеранога шерик сифатида Матьени, ҳатто Бартрани ҳам ўйнатиб кўрди. Ҳали жароҳатидан тузалмаган Вермаленни ҳам қўшса, марказда Луис Энрикени ўйлантирадиган муаммоқ йўқдек. Мураббий ва Пике ўртасидаги келишмовчиликнинг бошланиш нуқтаси Каталония Суперкубоги учун баҳсда юз берди. Иккинчи бўлимда алмаштирилган Пике захира ўриндиғига ўтириши билан қўл телефонидан фойдаланди ва бу билан нафақат ички тартибни бузди, балки тартибни ҳуш кўрадиган мураббийни ҳам асабийлашишга мажбур қилди. Шундай бўлса ҳам, Пике "Реал"га қарши ўйинда асосий таркибда майдонга тушди ва ҳимоядаги тартибсиз ўйини билан нафақат мураббийнинг, балки жамоа мухлисларининг ҳам ҳафсаласини пир қилди. Шундан сўнг, ҳимоячи "Сельта"га қарши ўйин қайдномасига ҳам киритилмади. "Аякс" ва "Альмерия"га қарши ўйинларни эса, захира ўриндиғида ўтказди. Бундай вазиятда, яқиндагина асосий таркибнинг муҳим ўйинчиси саналган футболчига осон тутиб бўлмайди. Футболчининг ўзи ҳам келажаги борасида қаттиқ ўйга тушиб қолди.
Луис Энрике бош мураббий сифатида ишлашда давом этса, Пикенинг жамоада қолиш эъҳтимоли пасаяди. Албатта, Энрикенинг ўзи ҳам, бошқалар ҳам Жерарни жамоадан ҳайдаётгани йўқ. Аммо, барибир, захира ўриндиғида бошқалар қатори тинч ўтира олмайдиган ва ҳар хил ҳунар кўрсатишга одатланган футболчи Каталонияда бундай вазиятда қола олмаса керак.
Пике катта ғалабалар, қўлга киритган совринлари билан ўз савиясини барчага исботлаб қўйган, албатта. Уни сотиб олиш учун эса, Европа грандлари яхшигина суммадан воз кечишларига ҳам тўғри келади. Уч карра ЕЧЛ ғолиби, терма жамоалар миқёсида ҳам барча совринларни қўлга киритган футболчининг савияси ҳақида гап кетганда, ортиқча баҳслашиб ўтирилмайди.
Пикенинг кейинги жамоаси ким бўлиши мумкин?
Айрим ОАВ яқинда Пике ва Гвардиола ўртасидаги суҳбатдан сўнг, футболчининг Мюнхенга кўчиб ўтишини таҳмин қила бошлашди. Аммо, "Бавария" ҳозирда яна бир марказий ҳимоячига мухтож эмас. Унинг собиқ жамоаси, "МЮ" эса, айнан ушбу амплуага ўйинчи қидирмоқда. Жозе Моуриньо ҳам қишда марказий ҳимояга футболчи кераклигини айтиб ўтган.
Жерар ўсмирликда 4 мавсум давомида Манчестерда тўп сурди. Ўша дамларни мароқ билан эсласа ҳам, у ерда яна ўйнашни чин дилдан истамаяпти. Қолаверса, у энди бир ўзи эмас. Унинг ёнида Шакира - провинциал Манчестерда яшашни истамаслигини бир неча бор такрорлаган, Пикенинг қарорларига катта таъсир ўтказа оладиган турмуш ўртоғи бор. Лондон ва "Челси" эса Пике учун ҳам, Шакира учун ҳам айни муддао бўлиши мумкин. Қолаверса, Моуриньо ҳам бундай вазиятдан фойдаланиб қоладиганлар тоифасига киради. Лондонда, Моуриньо қўл остида ўйнаб кетган Фабрегас ҳам, Пикенинг янги режаларига таъсир ўтказа оладиган сабаб.
Икки ҳафта олдин, фаолиятини айнан "Барселона"да тугатишни орзу қилган футболчи олдида энди катта танлов - Луис Энрике билан ярашиш, ёки Каталонияни тарк этиш. Каталонияда барча, ҳатто мураббий ҳам унга яна имконият беришга қарши эмас. Клуб раҳбарияти масалага аралашиши ва Пике билан жиддир равишда суҳбат қуриши вазиятни юмшатиши мумкин. АПЛ эса, футболчини чорлашда давом этмоқда.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
