Аёллар футболи бўйича Ўзбекистон йигирманчи миллий чемпионатининг, умуман 2014 йилги мавсумнинг кашфиёти сифатида шубҳасиз “Металлург-вумен” жамоасини кўрсатган бўлардик. Бекободликлар Ўзбекистон чемпионатида иккинчи ўринни эгаллаган бўлса, Ўзбекистон кубогида бош соврин билан тақдирланди. Бу ғалабаларда шубҳасиз жамоа бош мураббийи Шерали Бобоқуловнинг ҳиссаси беқиёс бўлди дейиш мумкин. Биз мавсум сўнгида ушбу мутахассис билан мухтасар суҳбат уюштирдик.
- 2014 йилги мавсумда шундай ютуқларга эришамиз деб ўйлаганмидингиз? Умуман мавсум ҳақида сизнинг фикрларингиз, таассуротларингиз қандай бўлди?
- Олдиндан шу нарсани айтиб ўтишни истардим, жамоамиз муассислари бизнинг олдимизга катта вазифаларни қўймаганди. Ўтган йили жамоа тузаётганимизда бош ҳомийимиз – Ўзбекистон металлургия комбинати раҳбарлари уч йил ичида жамоани шакллантириш, ўйин услубимизга эга бўлишимиз ва кучлилар сафидан мустаҳкам ўрин эгаллашимизни сўраганди. Биз эса биринчи йилиёқ чемпионатда бронза медалини қўлга киритганимиздан кейин бу йилги мавсумга ўзгача иштиёқ билан тайёрландик. Жамоадаги баъзи чизиқларни тажрибали ўйинчилар билан мустаҳкамладик. Аммо биринчи навбатда жамоа таркибини Тошкент вилояти қизлари ҳамда маҳаллий – бекободлик иқтидор эгалари билан тўлдирдик. Бугунги кунга келиб жамоа асосини ёхуд 70 фоизидан кўпроғини Тошкент вилояти вакиллари ташкил этиши биз тўғри йўлдан кетаётганлигимиздан далолат беради. Иштаҳа нонушта пайти келади деб бежиз айтишмас экан. Мавсум давомида қийин ўйинлар бўлди. ёш қизларимиз тобланишди. Жамоа ўз ўйин услубига эга бўлди. якунда биз чемпионатда иккинчи ўринни эгалладик. Ўзбекистон кубогини қўлга киритдик. Бунинг учун албатта мен қизларимиздан, уларнинг фидойилигидан мамнунман.
- Чемпионатдаги қайси ўйинлар сизнинг ёдингизда қолди? Икккинчи ўринни эгаллашларингизга ишонч қачон пайдо бўлди?
- Кейинги йилларда чемпионатимизда “Севинч” ўз гегемонлигини ўрнатган. Қашқадарё вилоятида аёллар футболини ривожлантириш учун барча зарур шарт-шароитлар яратиб берилган. Бу имкониятларни кўриб рости ҳавасингиз келади. Ўзбекистонда хизмат кўрсатган мураббий Вячеслав Никонович Хан шогирдларига бас кела олмаслигимизни тушунардик. Аммо яна бир машҳур мураббий Мириман Дмитриевич Ким етакчилигидаги “Андижанка” жамоаси билан совринли ўринлар учун баҳс юрита олишимизга ишонардик. Бундан ташқари медаллар учун курашда Ғузор, Бухоро ва Тошкент шаҳри жамоаларидан жиддий рақобат бўлишини ҳам кутгандик. Биринчи даврада асосий рақибимиз – “Андижанка”ни Бекободда мағлубиятга учратганимиздан кейин кумуш медаллар учун эшиклар очилганини сездик. Бироқ олдиндан хотиржамликка берилиш яхши оқибатларга олиб келмаслигини англаб, қизларни доимий равишда ғалаба сари руҳлантириб бордик. Биласиз, қизлар билан ишлаш осон кечмайди. Бу йўлда менга ассистентларим яқиндан ёрдам беришди. Дарвозабонлар билан иш юритувчи Илҳом Ҳамзалиев бир йил муқаддам жамоамизни тарк этган тажрибали посбон Юлия Аҳмедованинг йўқлигини сездирмади. Ёш дарвозабонларни ўз кучларига ишонтирган ҳолда тарбиялаб берди. Баҳром Умаров ва Аббос Абдуллаев билан ҳар битта ўйинга пухта ҳозирландик. Рақибларнинг кучи ва ўйин услубига қараб керакли тактикаларни ишлаб чиқдик. Охирги турларда Андижонда Мирон Ким жамоасига ютқазиб қўйган бўлсакда, “Андижанка”дан бу йил олдинга ўтиб олишимизга шубҳа қилмадим. “Шўртан-леди”га қарши ўйинда қизлар ўзларининг ҳар томонлама ижобий хислатларини намойиш этишди ва иккинчи ўринни расмийлаштиришди.
- Ўзбекистон кубогининг финалида “Севинч”ни ютишга ҳам ишонч бормиди?
- Рости йўқ эди. Рақибимиздан қўрққандик. Фақат буни қизларга сездирмадик. Кубокнинг “Андижанка”га қарши ярим финал учрашуви бўйича муаммолар, кейин финал ўйинининг муддати бўйича тортишувлар бироз асабларимизни таранглаштирди. Бироқ шунга қарамасдан йўқотадиган нарсамиз йўқлигини шерикларимга ва қизларга тушунтирдим. “Севинч” билан чемпионатдаги иккита ўйинимизни қайта қайта кўриб чиқдик ва мағлубиятларимизнинг асосий сабаби ҳимояга “ётиб олганлигимиз” эканлигини тушундик. Қизларга ҳам бу нарсани етказдик ва финалга ҳужумкор таркибни туширдик. Уч ҳужумчи билан майдонга чиқишимизни “Севинч” жамоаси ҳам кутмаган экан. Бу тактикамиз ўзини оқлади. Дастлабки 20 дақиқада қаршиликларнинг ҳужумларини бартараф этиб турдик ва дарвозамиз даҳлсизлигини сақлашимиз қизларнинг ўзларига бўлган ишончини оширди. Тайм охирларига келганда эса тажрибали ҳужумчимиз ва тўпураримиз Наргиза Абдурасулова ўзини кўрсатди. Унинг олис масофадан берган зарбасидан сўнг тўп “Севинч” жамоаси дарвозаси тўридан жой олди. иккинчи таймда қаршиликлар ҳисобни тенглаштиргандан кейин ҳам тушкунликка тушмадик. Қарши ҳужум тактикамизга содиқ қолдик. Ҳакам томонидан қўшиб берилган компенсация вақтида эса бурчакдан тўпни ўйинга киритиш бизга самара берди. Энг тезкор ҳужумчиларимиздан Нозима Камолтоева ғалаба тўпини киритди. Кубокнинг ФИНАЛ учрашувидаги таркибимизни яна бир ёдингизга солсам. Булар:
Гуландон Бойматова, Моҳинур Ҳожиқулова, Холида Дадабаева, Альбина Белалова, Насиба Ҳожиева, Нозима Камолтоева, Юлдуз Набиева, Мавлуда Мунавварова, Нариза Абдурасулова, Моҳигул Икромова, Нодира Мўйдинова;
Заҳирадагилар: Умида Худойбоқова, Алина Демьяненко, Ўғилой Илашева, Шоҳсанам Абдулбоқиева, Маҳлиё Абдурашидова, Лутфинисо Ҳамидова, Зарина Бобоева.
- Албатта бу ғалаба сизларнинг, қолаверса Ўзбекистон аёллар футболи тарихидаги янги саҳифа бўлди дейиш мумкин. Бугунгача фақат икки жамоа – “Севинч” ва “Андижанка” Ўзбекистон кубогига сазовор бўлганди. Энди улар сафига “Металлург-вумен” қўшилди. Умид қиламизки, Сизнинг жамоамингиз мамлакат чемпионлари сафидан ҳам жой олади...
- Ишончингиз учун раҳмат. Аммо бу осон иш эмаслигини биламиз. Ҳали кўп ишлашимиз, меҳнат қилишимиз даркор. Мени хурсанд қиладиган жиҳати аксарият ёш ўйинчиларимиз Ўзбекистон U-19 терма жамоаси мураббийлари назарига тушганлигидадир. Иорданияда 2015 йилги Осиё чемпионатининг саралаш баҳсларида бекободлик Нодира Мўйдинова рақибалари дарвозасига 4 та гол киритиб, тўпурарлар рўйхатида етакчилик қилди. қолган қизларимиз ҳам ўзларига билдирилган ишончни оқлашди. U-16 терма жамоамизда ҳам, миллий терма жамоамизда ҳам “Металлург-вумен” вакилларининг бўлиши бизнинг ишимизга берилган асосий баҳо деб биламан.
- Мавсум якунига етганига ҳали кўп бўлмади. Аммо кейинги мавсумга ҳозирданоқ тайёргарлик кўрилмаса кейин кеч бўлади. Кейинги мавсум қандай ўтишини ҳохлардингиз?
- Бу йилги мавсумда муаммолар етарлича кузатилди. Аввало чемпионатда қатнашувчи жамоалар ўз вақтида аъзолик бадалларини тўлашмасдан, чемпионатнинг бошланиш муддатини чўзиб юборишди. Натижада тақвимда парокандалик юзага келди. Кимдир 3-4 та ўйин ўтказиб олган бўлса, кимдир ҳали ҳам йўлга тушмаганлиги боис чемпионатнинг савияси юқори бўлди дея олмайман. Бу узилишлар чемпионат охиригача давом этганлиги афсусланарли ҳолат. Мен худди эркаклар ўртасидаги чемпионат сингари яхлит тизимли ва олдиндан белгилаб олинган муддатларда ва жамоаларнинг бир кунда ўйинларда иштирок этишларини истайман. Ўшанда ўткинчи ўйинлар бўлмайди. Рақибнинг натижасини билиб олгандан кейин керакли натижа учун майдонга чиқилмайди. Чемпионатга қизиқиш ошади. Бу ташкилий жиҳатилар бўйича таклифларим эди. Энди бевосита ўзимизнинг тайёргарлигимизга келсак, режаларимизни аллақачон ишлаб чиққанмиз. Бир қатор ёшлар йил давомида назоратимиз остида бўлди. Уларни асосий таркибга жалб этишда давом этамиз. Барча чизиқларни мустаҳкамлаш ниятимиз йўқ эмас. Албатта таркибда ўзгаришлар бўлиши мумкин. ҳеч кимни мажбурлаб жамоада олиб қололмаймиз. Бироқ сафимизни тарк этиш истагини ҳеч ким ҳозирча билдиргани йўқ. Шу маънода асосий таркиб сақлаб қолинади ва унга жузъий ўзгартиришлар киритилади холос. Футболчи қизларнинг функционал тайёргарлиги бўйича йил охириданоқ ишга киришамиз. Аввалги йиллардаги каби яқин хориж мамлакати жамоаларига қарши ўртоқлик ўйинлари режаси ишлаб чиқилмоқда. Бир сўз билан айтганда кейинги мавсум ҳам планкани пастга тушириш ниятимиз йўқ. Биз янги чўққилар сари интилишда давом этимиз. Асосий ютуқларимиз ҳали олдинда...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
