Якунига етган мавсум турлича таассуротлар қолдирди. У баъзи футболчилар учун муваффақиятли тугади, айримларга эса омадсиз кечди. Бу табиий жараён. Мавсум-2013да эл назарига тушишган айрим футболчилар бу сафар деярли кўзга ташланмадилар. Яққол мисол - «Бунёдкор» ҳужумчиси Олександр Пишур. Ахир бир йил олдин чемпионат тўпурари бўлган украиналик легионер ўзини деярли кўрсатолмади. Ҳаттоки, захирада қолиб, ўринбосарлар таркибида ўйнашига ҳам тўғри келди. Қуйида мавсумни омадсиз ўтказишган баъзи футболчиларга тўхталамиз.
Зафар ПОЛВОНОВ («Олмалиқ»)
Ёдингиздами, Полвонов 2013 йилги мавсумда клубининг етакчи ва тўпурар футболчисига айланганди. Чемпионат давомида 14та гол урган ҳолда, Игорь Шквирин ишончини оқлаган ва мухлислар ёқимтойи бўлганди. Бироқ бу йилги мавсумни Полвонов ҳисобига ёзиш қийин. Ахир деярли барча учрашувларда майдонга тушганига қарамай, атиги 3та гол урди. Игорь Шквирин матбуот анжуманларида Полвонов тўғрисида берилган саволларга қуйидагича жавоб бергани кўпчилик диққатини оширди: «Полвонов ўтган йилги натижаларини унутиб қўйди. У кучли жамоаларда ўйнашни орзу қилмоқда, шекилли... Юлдузлик касалига чалингани кўриниб турибди. Зафарни пастга тушириш қўлимдан келади». Айтганча, охирги хабарларга кўра, Зафар кейинги мавсумни «Олмалиқ»да ўтказмаслиги мумкин. Унга «Шўртан» клуби қизиқмоқда ва ўз таркибига жалб қилишни истамоқда.
Анвар БЕРДИЕВ («Бунёдкор»)
Маълум вақт Фарғона футболининг юраги саналган Анвар Бердиев «Нефтчи»дан кетдию, ишлари юришмай қолди. Йил бошида Миржалол Қосимов катта ишонч билдирган ҳолда, уни «Бунёдкор»га таклиф қилди. Қолаверса, Юрий Саркисянинг жамоада маслаҳатчи-мураббий сифатида иш бошлагани ҳам Бердиевнинг янги клубга ўтишига туртки берганди. Кўпчиликни ҳужумчи пойтахтликлар сафида қай тариқа ўйнаб кетиши қизиқтираётганди. Минг афсуски, «Бунёдкор»да мураббийлар алмашинуви сабаблими ёки бошқа жиҳатлар таъсири борми, ҳарқалай, Анвар захира футболчисига айланиб қолди. Ҳар мавсум камида 10тача гол уришга ўрганган Бердиев якунига етган чемпионатда бор-йўғи 1та гол муаллифига айланди. Аслини олганда, ҳужумчи «Бунёдкор» сафида кўп майдонга тушгани йўқ. Шунга яраша, гол уришни ҳам унутиб қўйди, чоғи. У кейинги мавсумни «қалдирғочлар» сафида ўтказмаслиги эҳтимоли катта. Балки Бердиевнинг муваффақиятсиз мавсумига ёши улғайиб бораётганини сабаб ўлароқ кўрсатиш мумкиндир. Эҳтимол, Анвар фаолиятини тугатишга қарор қилгандир. Буё-ғини энди вақт кўрсатади.
Виктор КАРПЕНКО («Локомотив»)
Тажрибали ярим ҳимоячи учун ҳам мавсум бир текис кечгани йўқ. У аввалги йилларга нисбатан майдонга кам тушди. Бунга қайсидир маънода «Локомотив»да юзага келган кескин рақобат сабаб бўлиши мумкин. Вадим Карленович ва Карпенко аввалдан бирга ишлашган ва бир-бирларини яхши билишади. Шунга мувофиқ, мураббий фахрий футболчини клубда қолдирганди. Бироқ у чемпионат давомида аввалги фаоллигини кўрсата олгани йўқ. Тажрибали футболчининг ҳаттоки, захирада қолиб кетганини кўрдик. Бироқ Карпенконинг ўзи ҳали футболдан кетмаслиги ва яна бир неча йил миллионлар ўйинида қолишини маълум қилди. Демак, фаолиятини тугатмоқчи эмас. Аммо унинг «Локомотив»даги келажаги номаълум. Аслида Карпенко ёши ўтиб қолганига қарамай, барибир, клубга фойдаси тегадиган футболчилар тоифасидан. Унинг айниқса, майдонни яхши кўра олиш қобилияти мақтовга лойиқ.
Жаҳонгир ЖИЯМУРОДОВ («Олмалиқ»)
«Насаф»да ишонган «тоғ»лардан бирига айланган ва 2 марта мухлислар талқинида «аждарлар»нинг мавсумидаги энг яхши футболчиси мақомини олган Жаҳонгир Жиямуродов фаолиятига жароҳат аталмиш душман болта урди. Бир мавсум ўйин амалиётисиз қолган ва кўп вақтини даволаниш билан ўтказган ҳимоячи мавсум арафасида «Бунёдкор» йиғинларида иштирок этганида, кўпчилик унча ажабланмаганди. Бир мавсум ўйнамаганига қарамай, Миржалол Қосимов унга ишонганди. Аммо хориж йиғинларидан кейин ҳам Жаҳонгирнинг пойтахт клубидаги тақдири номаълумлигича қолди. Шундай пайт у ўзига янги жамоа топди, яъни «Нефтчи» сафига қўшилди. Оралиқ танаффусга қадар фарғоналиклар сафида икки марта гол урди. Қолаверса, барча ўйинларда иштирок этди. Лекин мавсумнинг биринчи қисми тугамасидан клубдан кетди. Бунга раҳбарият билан келишолмагани сабабдир. Иккинчи даврада эса «Олмалиқ»да тўп сура бошлади. Игорь Анатольевич етарлича ишонч билдириб, мунтазам майдонга туширганига қарамай, Жиямуродовни хатолари кўпайиб борди. Оддий вазиятлардаги адишишлар натижасида ҳимоячи борасида танқидий фикрлар янгради. Унинг клубдаги тақдири яқин кунларда ҳал қилинса, ажабмас. Тўғри, футболчининг ўзи аввалги спорт формасини тиклашга астойдил интил-япти, аммо...
Илҳом СУЮНОВ («Локомотив»)
Сирдарё футболи тарбияланувчисининг юлдузли онлари ортда қолди, чоғи. «Пахтакор»да ғоят яхши мавсумлар ўтказган ҳимоячининг «Локомотив»га ўтаётгани ҳақида хабар чиққач, ҳамма ҳайрон бўлди. Чунки Суюнов спорт формасидан чиқиб қолганди. Мана, Илҳом учун мавсум кўнгилдагидек кечмади. Асосан захирада ўтирди. Боз устига, кўп вақтини ўринбосарлар таркибида ўтказди. Фикримизча, тажрибали ҳимоячи учун мавсум фаолиятидаги энг омадсизларидан бири бўлди.
Умуман олганда, яна бир қатор футболчилар мавсумда омадсизликка юз тутишди. Бунга етарлича мисоллар келтириш мумкин. Биз бундай футболчилардан кейинги мавсум яхшироқ ўйин кўрсатишга уринишларини кутиб қоламиз, албатта.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
