Гоҳида ҳамма нарса ортиқчаликдек туюлади. Ҳатто кундалик ҳаётимизнинг бир қисмига айланиб қолган интернет ҳам. Аммо бу ёғи байрам. Янги йил. Янги йил ўзгача байрам. Унинг ўзгачалиги шуки, ҳамма янги йил оқшомида нимадир кутади. Болалигимизда янги йилда қорбобони келиб совға беришига қанчалик ишонсак, ҳозир ҳам 31 декабрдан 1 январга ўтар куни қандайдир янгилик, қувончли ва бахтли дамлар бўлиб қолишини истаймиз. Хуллас, 31 декабрь байрам оқшомида қўл телефоним жиринглаб қолди. Бир кун олдин мен йўқлаб телефонига тушолмаган Ҳасанали отанинг овозидан бироз довдираб қолдим. Ҳа, бу қўнғироқдан, қорбободан совға олиб қувончи ичига сиғмаган боланинг аҳволига тушиб қолгандек эдим, назаримда. Ярим соатча мароқли суҳбат давомида гоҳ ота, гоҳ мен ўзимизнинг футболимиз ҳақида гаплашардик. Ҳаснали ота менга айни дамдаги муносабати ҳуддики узоқ йиллик сафардан қайтган ўғли билан суҳбат қураётган ота тимсолида гавдаланарди. Ҳасанали ота билан яна гаплашиб туриш шарти билан хайрлашар эканман, хаёлларимни эски хотиралар банд этди...
Талабалик йилларим эди. Акам бир газета ўқиётганини кўриб қолдим. Тўғри уйимизда футбол мухлислари кўп бўлгани боис футболга оид газеталарнинг ҳар ҳафтада янги сони билан бойирдик, аммо акам қўлидаги газета бошқа эди. Унинг номи — “ЧЕМПИОН” эди... Чемпион билан “танишув”им айнан шундай содир бўлган. Вақт ўтиб газетанинг ҳақиқий ўқувчиларидан бирига айландим-қолдим. Ундаги ижодкорлар номлари ҳали мен учун нотаниш эрсада (фақат Маҳмуд Асрордан ташқари) газетада чоп қилинаётган мақолалар билан уларнинг ижодига қизиқишим, ҳавасим, ҳурматим ортиб бораверди. Қисқа вақт ичида “Чемпион” газетаси футбол оммасини ўзига тортишга улгурган эди. Қишлоқчилик қурсин, газетанинг бизга ўз вақтида етиб келиши анча муаммо эди. Ҳатто етиб келмаслик ҳолатлари кўпроқ эди десам хато бўлмас. Шундай вазиятда Урганч шаҳрига қатновчи такси ҳайдовчилари жонимизга оро кирарди. Хуллас, “Чемпион” газетаси худди бугун сиз билган Stadion.Uz сайти каби кундалик ҳаётимни бир бўлагига айланганди. Мазкур сайт ҳақида бундан бир ярим йил олдин ҳам мақола ёзгандим. Ўшанда вазият бошқа эди, кимлардир сайт ижодкорларига ўз ғаразли ниятларини ҳеч уялмай, очиқ ошкора билдиришга киришиб кетганди. “Чемпион” ҳам, Stadion.Uz ҳам бундай таҳдид-у ноҳақликларга кўп бора дуч келди, “кампаниявоз”га ҳам чиқди, аммо ижодкорларнинг ўз ишига бўлган меҳри, садоқати, ўзбек футболи ривожига муносиб ҳисса қўшишдек эзгу ниятлар устун келиб, бундай тўсиқларни енгиб ўтишганига кўп бор гувоҳ бўлдим. Сўзимнинг тасдиғи сифатида ўша бир ярим йил олдин ёзилган мақоладан бир парча келтираман:
“Бир пайтлар қўлига қалам олиб, катта мақсадлар ила бутун бошли халқнинг, яъни футбол мухлисларининг дардини, қувончини, жамики ҳиссиётини борича ёрита олган “Чемпион” аъзолари газетада фаолият олиб борган даврларини айни дамда қандай хотирлаши бизга қоронғу. Аммо бир ҳақиқат борки, буни ҳеч ким инкор этолмайди, “Чемпион” қисқа давр оралиғида нашрлар орасида хақиқий, номига хос тарзда чемпионга айланган эди. Ҳасанали ота Қодиров, Олимхўжа Бўронов, Қахрамон Асланов, Маҳмуд Асрор, Шуҳрат Шокиржонов, Муҳрим Аъзамхўжаев, Бобур Акмалов, Алексей Глазунов каби турли услуб эгалари бўлмиш ижодий гуруҳ қисқа давр ичида айнан “Чемпион” орқали футбол мухлисларининг севимли ижодкорларига айланиб улгуришганди. Нашрнинг қисқа давр оралиғида бу даражага кўтарилиши кимгадир ёқди, кимгадир эса йўқ. Шу сабабли юқорида исмини келтириб ўтган қахрамонларимиз ижодига нисбатан тош ҳам отилди, танқид ҳам қилинди, қаршиликлар ҳам бўлди. Аммо барибир рахмат айтганлар, “отанга балли”, деганлар кўпроқ эди. Нима учун ўзига боғлиқ бўлмаган сабаблар туфайли фаолияти тугатилган бўлса ҳам футбол мухлисларни “Чемпион”ни кўп эслашади, қўмсашади, соғинишади? Чунки, “Чемпион” да ҳақиқий ижод бор эди, ўзига хос рақобат бор эди. Ижодкорларда эса меҳнатнинг ҳақиқий завқини туюшдек ҳиссиёт ва оддийлик бор эди. Ва энг асосийси ўша пайтларда бошқа нашрларда учратмайдиганингиз — ҲАҚИҚАТ бор эди. Юқорида келтирганимдек “Чемпион” фаолияти тугатилди, аммо у ўзида акс эттирган олий хақиқат сингари эгилса ҳам, букулса ҳам синмади! Бугун ўша “Чемпион” — Stadion.uz бўлиб бўй чўзмоқда яна гулламоқда!”
Айнан ана шу характерни ўзида кўп йиллардан буён акс эттириб келган Stadion.uz сайти бугун 3 ёшга тўлди. Ўтган давр ким учундир шунчаки бир муддатдир, лекин сайт ижодкорлари учун эмас. Ҳар доим бир темп билан ижод қилиш учун қанчалар меҳнат, ҳафсала, ирода, сабр-бардош лозимлигини англаш қийин эмас. Яқинда Stadion.uz сайти мухлислар ва ижодкорлар ўртасидаги дўстона учрашув эса чинакам байрам туҳфаси бўлди, десак асло муболаға бўлмас. Учрашув давомида ташкил қилинган футбол ўйини, самимий суҳбатлар эса ҳар бир мухлис қалбида ўзига хос таассурот қолдирган бўлса, ижодкорларнинг кучига-куч, ғайратига шижоат қўшган бўлса не ажаб. Бу учрашувнинг Осиё Кубоки-2015 мусобақаси олдидан ташкил қилиниши терма жамоамизга омад тилаш баробарида мухлисларни янада жипслашишга, янада аҳиллашишга хизмат қилажаги шубҳасиздир. Зеро, бухоролик кўп йиллик юзер дўстимиз Фаррухбек “Stadion.uz бизга нафақат футболни, балки ҳаётни ҳам ўргатмоқда” деганда ҳақ эди... Сўзим охирини яна ўша бир ярим йиллик тарихга эга сўзлар билан якунламоқчиман:
“Мен ушбу мақолани ёзиб кимгадир яхши кўринишни мақсад қилмадим. Ишонинг, мен мақолаларининг шайдоси бўлганим Қахрамон Асланов ёки Олимхўжа Бўронов, Ҳасанали оталарни ҳаётда кўрмаганман ҳам... Юқорида сайтда фаолият олиб борган журналистларни кўпроқ тилга олган бўлсам, тушунингки, мухлислар номидан — сизнинг номингиздан уларга миннатдорчилик билдиришни хоҳладим. Ахир улар бизни деб меҳнат қилишади, бизни деб “катталар”дан танбеҳ эшитишади, мамлакат футболи тақдири ҳақида қайғурганлари учун ёмонотлиқ бўлишади, хеч қандай моддий манфаат кўрмаса ҳам биз учун қилаёган меҳнатларидан завқ олиб яшашади... Бошқалар қадрламаса ҳам биз уларнинг меҳнатларини қадрлайлик. Бошқалар уларнинг юзига лой чаплашга уринса, биз бу инсонларнинг юзи билан фахрланайлик. Стадиондаги мухлисларга хос тарзда миннатдорчилигимизни изҳор қилайлик. Ҳали кўп йиллик тўйларингизни кўриш насиби-рўз айласин. РАҲМАТ СИЗГА, АЗИЗ СОБИҚ “ЧЕМПИОН”ЧИЛАР!!!”
Эҳтиром ила, Дилшодбек Жуманиёзов
VIQOR никли мухлис
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
