Бугун тунда "Камп Ноу"да бўлиб ўтган "Барселона" ва "Вильяреал" жамоалари ўртасидаги учрашувда қизиқ ҳолат юз берди.
Ўйиннинг 30-дақиқасида Барселона дарвозасига гол урган Денис Черишев, бу билан ўз отаси - Дмитрий Черишевнинг натижасини такрорлади. Эътиборлиси, Дмитрий Черишев ҳам, унинг ўғли Денис ҳам "Камп Ноу"да "Барселона" дарвозасини бир кунда - 1 февраль куни ишғол этишди. Маълумот ўрнида, Дмитрий Черишев Хихонинг "Спортинг" клуби таркибида 1998 йилнинг 1 февраль куни "Камп Ноу"да "Барселона" дарвозасини ишғол қилган эди. Денис Черишев ҳам айнан 1-февраль куни "Барселона" дарвозасига гол урди.
Таъкидлаш жоиз, "Барселона" ота-бола Черишевлар гол урган Испаниядаги иккинчи клуб бўлди. Бильбаонинг "Атлетик" клуби ота-бола Черишевлар гол урган илк клуб бўлган эди.
Эслатиб ўтамиз, Денис Черишев Ла Лиганинг ушбу мавсумида 19-турдан сўнг 4та гол урган ва 10та голга ассистентлик қилган. Мадриднинг "Реал" клубига тегишли бўлган ва айни дамда ижара асосида ўйнаётган россиялик футболчи "Вильяреал" сафида гол+пас тизими бўйича етакчилик қилмоқда.
Матнда хатолик топсангиз, ўша хатони белгилаб, бизга жўнатинг (Ctrl + Enter).