Эрон суд ҳокимияти 13 апрель куни аёллар футбол терма жамоаси сардори Заҳро Ганбарийнинг мусодара қилинган мол-мулклари ва активлари қайтариб берилганини маълум қилди. Бу ҳақда Al Arabiya хабар берди.
Заҳро Ганбарий март ойида Исроил ва АҚШнинг Ислом Республикасига қарши уруши бошланган бир вақтда, Осиё кубогида иштирок этиш учун Австралияга борган ва давлат мадҳиясини куйлашдан бош тортган. Мусобақадан сўнг Ганбарий бошчилигидаги олти нафар футболчи ва бир нафар техник ходим Австралиядан сиёсий бошпана сўраган.
Бироқ кейинчалик уларнинг беш нафари, жумладан, Ганбарий ҳам ўз қарорини ўзгартириб, жамоанинг қолган аъзолари билан бирга ватанга қайтган. 19 март куни Теҳронда улар учун махсус кутиб олиш маросими ўтказилган.
Эрон суд органларининг билдиришича, Ганбарийнинг активлари унинг хулқ-атвори ўзгаргани ва айбсизлик декларацияси эълон қилинганидан сўнг, суд қарори билан қайтарилган.
Қайд этиш жоизки, активлари музлатилган “сотқинлар” рўйхати эълон қилингач, орадан икки кун ўтиб, ушбу хабар берилди. Мазкур рўйхат 28 февралда бошланган урушдан сўнг тузилган эди. Ганбарийнинг исми ҳам ушбу рўйхатда бор эди, бироқ унинг мулки айнан қачон музлатилгани аниқ эмас.
Инсон ҳуқуқлари ташкилотлари Эрон ҳукуматини хорижда мусобақаларда қатнашаётган спортчиларга қариндошлари орқали таҳдид қилиш ёки мулкларини мусодара қилиш билан босим ўтказишда айблаб келади. Мазкур ҳолатда ҳам ҳуқуқ ҳимоячилари Теҳрондан спортчиларнинг ота-оналари разведка агентлари томонидан сўроқ қилинганини даъво қилмоқда.
“Эрон расмийлари эса бу айбловларни рад этиб, аксинча Австралия спортчиларни қочиб кетишга мажбурлашга уринганини таъкидламоқда”, дейилади хабарда.
Аёллар терма жамоаси дастлабки ўйин олдидан мамлакат мадҳиясини куйламагани учун Эрон томонидан кескин танқидга учраган эди. Кейинги ўйинларда спортчилар мадҳияни куйлаган. Ўша воқеалардан сўнг Эрон аёллар терма жамоасининг фақат икки нафар футболчиси Австралияда қолган ва ҳозирда Брисбане Роар клуби билан машғулотлар ўтказмоқда.
Жаҳон чемпионати ва келажак
Ушбу воқеалар июнь ойида АҚШда ўтадиган Жаҳон чемпионати арафасида Эрон эркаклар терма жамоаси атрофидаги баҳсларни ҳам кучайтирди. FIFA президенти Жанни Инфантино март ойида Туркиядаги халқаро ўртоқлик учрашуви доирасида берган интервьюсида:
“Эрон Жаҳон чемпионатида иштирок этади ва АҚШдаги гуруҳ ўйинларини режалаштирилганидек ўтказади”, дея таъкидлади.
Эрон айни дамда уруш ҳолатида экани сабабли унинг турнирга бориши шубҳа остида қолмоқда. FIFA президенти Жанни Инфантино Эроннинг гуруҳда Миср, Бельгия ва Янги Зеландия билан ўйнашини тасдиқлаган бўлса-да, сиёсий вазият ва АҚШ билан муносабатлар турнирга бориш эҳтимолини пасайтирмоқда. FIFA эса ўйинларни АҚШдан ташқарига кўчиришни рад этган.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
