Европа лигасининг 4-тури доирасида «Саутгемптон» ўз майдонида «Интер»ни қабул қилди ва ҳисобда ортда бораётиб, якунда 2:1 ҳисобида ғалаба қозонди. Бу ўйинда ҳакам "нерадзурри" дарвозасига пенальти белгилади. Ушбу вазиятни кўриб чиқамиз.
Биринчи бўлимга қўшиб берилган дақиқаларда тўп жарима майдончаси ичида турган "Интер" футболчиси Перишичнинг қўлига теккани учун ҳакам ўйинни тўхтатди ва 11 метрли нуқтани кўрсатди. Вазият қуйидаги видеолавҳада кўринган.
Томоша қилганингиздек, тўп қўлга теккан, аммо футболчи тўпни атайлаб қўл билан ўйнамаган. У мазкур эпизодда қўлини юқорига кўтарган ва қўлини пастга тушираётганида тўп келиб унинг қўлига келиб теккан. Ўйин Қоидасига кўра, ўйинчи тўпни фақат АТАЙЛАБ қўл билан ўйнаса, жазоланади. Биз кўриб чиққан вазиятда эса футболчи атайлаб қилмаган, унинг қўли тўпга бехосдан тегиб кетган.
Бизнинг хулоса. Бу вазиятда қоидабузарлик йўқ. Ҳакам пенальти белгилаб хатога йўл қўйган.
"Саутгемптон" футболчиси Тадич пенальтини голга айлантира олмаганини қўшимча сифатида таъкидлаб ўтишимиз мумкин.