Кеча бошланган Жанубий Корея кей-лигаси 7-тур ўйинлари бугун давом эттирилди. Кеча «Чонбук» ўз уйида «Жежу Юнайтед»ни 1:0 ҳисобида мағлуб этган, «Сувон» эса «Сеул»ни 5:1 ҳисобида тор-мор келтирган эди.
Бугун эса чемпионатнинг яна бир лидерларидан ҳисобланган «Поханг Стилерс» сафарда аутсайдер «Теджон»ни 2:0 ҳисобида енгди. Чемпионатни кўтаринки руҳда бошлаган «Улсан» эса икки турдирки дуранглар лабиринтидан чиқолмай қолди. Бугун улсанликлар «Инчон Юнайтед» меҳмони бўлишди ва кучли ёмғир остида ўтган ўйиннинг 17-дақиқасида Ким Те Хваннинг урган голи эвазига олдинга чиқиб олишди. Улсанликларнинг кичик ҳисобдаги ғалабаси билан якунига етаётган ўйиннинг 87-дақиқасида мезбонлар футболчиси Парк Се Жик мувозанатни тиклади.
Шундай қилиб, «Улсан» кетма-кет учинчи дурангига эришди ва 13 очко билан кей-лига турнир жадвалида 3-ўринда қоладиган бўлди. «Улсан» сафидаги ҳамюртимиз Сервер Жепаров бугун доимгидек асосий таркибда майдонга тушди ва 76-дақиқада ўз ўрнини япониялик ярим ҳимоячи Масудага бўшатиб берди. Кейинги тур ўйинлари 25 апрелда бўлиб ўтади ва унда «Улсан» ўз уйида «Бусан»ни қабул қилади.
Матнда хатолик топсангиз, ўша хатони белгилаб, бизга жўнатинг (Ctrl + Enter).