29 август куни Қўқондаги «Марказий» ўйингоҳи эрталабдан кечгача футбол мухлислари билан гавжум бўлди.
Шу куни бу ерда қўқонлик футбол фидоийси, ажойиб инсон Маҳмуджон Умаров хотирасига бағишланган фахрий футболчилар ўртасида футбол турнири ўтказилди. Турнирда Қўқон шаҳрининг «Қўқон-1912», «Жилет-маркет», «Спартак-Буревестник», «Буревестник-Қўқон» жамоалари иштирок этишди.
Эрталаб бўлиб ўтган ўйинлардан кейин мусобақанинг учинчи ўрини учун «Спартак-Буревестник» ва «Буревестник-Қўқон» жамоалари , финалда эса «Қўқон-1912» ҳамда «Жилет-маркет» жамоалари ўйнашлари маълум бўлди. Тушдан кейин дастлаб майдонга учинчи ўрин учун курашадиган жамоалар чиқишди. Қизиқарли ўтган учрашув 3:3 ҳисобидаги дуранг билан якунига етди. Ўйиндан кейинги пенальтилар сериясида «Спартак-Буревестник» жамоасига омад кулиб боқди. Шуни алоҳида айтиш лозимки, «Спартак-Буревестник» жамоаси дарвозабони 59 ёшли Муроджон ака Ғофуров икки бор пенальтини қайтаришга муваффақ бўлдилар. Шундан сўнг майдонга финалчилар, «Қўқон-1912» ҳамда «Жилет-маркет» жамоалари чиқиб келишди. Учрашувни республика тоифасидаги ҳакам Рустам Толибжонов адолатли тарзда бошқариб борди. Финал ўйини жанговор курашларга бой, муросасиз бўлиб ўтди. Шу куни Қўқонлик футбол мухлислари бир пайтлар олий лигада ўйнаган М.Абдувалиев, М.Мансуров, А.Аширматов, Ж.Тожибоев, И.Мамадиев, А.Отажонов, В.Охунов, Ў.Пўлатов, Б.Азимов, У.Қувватов каби севимли футболчиларини яна яшил майдонда кўришга муяссар бўлдилар. Ўтган йили фахрий футболчилар ўртасида республика чемпиони бўлган «Қўқон-1912» жамоаси фахрий футболчилари финал ўйинида 4:2 ҳисобида ғолиб чиқишди.
Финал ўйини тугаганидан сўнг иштирокчиларни тақдирлаш маросими ўтказилди. Бу маросимда Маҳмуджон Умаровнинг яқин дўстлари, оила аьзолари ва «Қўқон-1912» жамоасининг раҳбарлари иштирок этишди. Ҳар бир иштирокчи жамоа аьзолари ҳомийлар томонидан турли қимматбаҳо совғалар билан тақдирландилар. Ғолиб жамоага эса кубок, диплом ва телевизор совға қилинди. Мусобақа иштирокчилари турли номинациялар бўйича ҳам тақдирландилар. Энг яхши дарвозабон, ҳимоячи, ярим ҳимоячи, ҳужумчи, энг ёши улуғ футболчи ва энг ёш футболчи номинациялари бўйича футболчилар эсдалик совғалари, гилам, уяли телефон ва пул мукофотлари билан тақдирландилар. Тақдирланган футболчилар орасида 62 ёшли Маҳмуджон Абдуллаевнинг ҳали ҳам яшил майдонда ҳаракат қилганлари барчанинг олқишларига сабаб бўлди. Шу куни ўйингоҳга келган барча мухлису футболчилар яхши кайфиятда қайтиб кетдилар.
Акрамжон Мамадалиев
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
