Футбол тарихидаги энг қиммат ёш футболчилар ТОП-10
“Манчестер Юнайтед” жамоаси бир неча кун аввал “Монако”дан 19 ёшли ҳужумчи Антони Мартиални сотиб олиб,барчани ҳайратлантирди. Кўпчилик футболчининг ёш эканлигидан эмас, унинг трансферига сарфланган маблағдан ҳайратга тушди. Ана шу ҳодиса бизларни футбол тарихидаги энг қиммат ёш футболчиларни эслашга туртки бўлди. Эътиборингизга 20 ёшга тўлмаган энг қиммат ёш футболчиларнинг трансферлари ТОП-10 лигини тақдим этамиз.
10. Серхио Агуэро
Йўналиш: “Индепендьенте” — “Атлетико”
Трансфер нархи: 16,5 миллион фунт
Шартнома тузилган йил: 2006 йил, Май
Аргентина терма жамоаси ҳужумчиси Серхио Агуэро 18 ёшида “Индепендьенте” жамоасидан “Атлетико Мадрид”клубига 16,5 миллон фунт эвазига келиб қўшилганди. “Матрасчилар” сафида 5 мавсум тўп сурган ҳужумчи 234 учрашувда 101 та гол урган. Кейинчалик “Атлетико” ёш иқтидорни “Ман Сити”га 38 миллион фунтга пуллаган.
9. Ромелу Лукаку
Йўналиш: “Андерлехт” — “Челси”
Трансфер нархи: 17 миллион фунт
Шартнома тузилган йил: 2011 йил, Август
2011 йилнинг ёзида “Челси”нинг ўша пайтдаги устози Андре Виллаш-Боаш бельгиялик ҳужумчи Ромелу Лукакуни ўз жамоаси сафига қўшиб олишга қарор қилади. Лукаку ўшанда эндигина 18 ёшни қаршилаган ва асосий таркибда тушиш учун жуда ёшлик қилган. Бос устига унинг таэрибаси ҳам юқори эмасди. У аввал “Вест Бромвич”да, кейин эса “Эвертон”да ижара асосида тўп сурди. Ижараларда сарсон бўлиб юрган бельгиялик футболчи барибир “Челси”да рўшнолик топмади ва “Эвертон” уни бутунлай сотиб олишга аҳд қилди.
8. Антонио Кассано
Йўналиш: “Бари” — “Рома”
Трансфер нархи: 18 миллион фунт
Шартнома тузилган йил: 2001 йил, Июнь
Антонио Кассано сўнгги йигирма йил ичида Италия термасида ҳаракат қилган энг маҳоратли ҳужумчиси сифатида эътироф этиб келинади. Номи чиқмаган “Бари” клуби 2001 йилда 19 ёшли ҳужумчини “Рома”га 18 миллион фунт эвазига сотади. Ўша пайтлар учун бу жуда катта маблағ ҳисобланган.
7. Андерсон
Йўналиш: “Порту” — “Манчестер Юнайтед”
Трансфер нархи: 18 миллион фунт
Шартнома тузилган йил: 2007 йил, Май
“Манчестер Юнайтед” жамоаси ва шахсан Сэр Алекс Фергюсон ёш иқтидор эгаларини топиш ва шу билан бирга улар учун катта маблағларни сарфлаш бўйича ном таратган. Португалиялик ярим ҳимоячи Андерсон ҳам шулар жумласидан.Алекс Фергюсон 19 яраш Андерсонни “Олд Траффорд”га таклиф қилади. “Порту”да асосий таркиб ўйинчиси бўлмаган ярим ҳимоячи таклифга бажонидил розилик беради, “МЮ” эса унинг трансфери учун 18 миллион фунт сарфлайди.
6. Серхио Рамос
Йўналиш: “Севилья” — “Реал Мадрид”
Трансфер нархи: 21 миллион фунт
Шартнома тузилган йил: 2005 йил, Июль
Серхио Рамосга 19 ёшида дунёнинг энг машхур клуби - “Реал Мадрид”дан таклиф келиб тушади. “Севилья” ҳеч иккиланмай ҳимоячини сотади. Мана 10 йилдирки Рамос “мадридликлар” шарафини муносиб ҳимоя қилиб келмоқда. Яқинда эса испаниялик футболчи “Реал” билан янги шартнома имзолади. Рамоснинг садоқати рамзи клуб унга сардорлик боғичини ҳам муҳайё қилиб берди.
5. Маркиньос
Йўналиш: “Рома” — ПСЖ
Трансфер нархи: 23,5 миллион фунт
Шартнома тузилган йил: 2013 йил, Июль
“Рома” сафида атиги бир мавсум тўп сурган Маркиньос Франция чемпиони эътиборини ўзига жалб қилди. 19 ёшли бразилиялик ҳимоячининг трансфери учун “парижликлар” 2013 йили 23,5 миллион фунт сарфлашган. Маркиньос ҳозирча ўзига билририлган ишончни оқлаб келмоқда.
4. Хавьер Савиола
Йўналиш: “Ривер Плейт” — “Барселона”
Трансфер нархи: 24 миллион фунт
Шартнома тузилган йил: 2001 йил, Июль
Месси ва Неймар “Барселона” сафида тўп суришни орзу қилган бир пайтда Хавьер Савиола “кўк-анорликлар” сафида ёрқин фаолиятини олиб борганди. Узоқ 2001 йилда “каталонияликлар” “Ривер Плейт” клубидан аргентиналик “кичкинтойни” сотиб олишади ва унга сарфланган маблағ ўзини оқлайди.
3. Уэйн Руни
Йўналиш: “Эвертон” — “Манчестер Юнайтед”
Трансфер нархи: 26 миллион фунт
Шартнома тузилган йил: 2004 йил, Август
Уэйн Руни аллақачон “Олд Траффорд”да афсона даражасига етди. Алекс Фергюсон Рунини 18 ёшида ўз жамоасига таклиф қилади. Ҳозирда “МЮ” футболкасида 12-мавсумни ўтказаётган англиялик ҳужумчи клуб тарихидаги энг яхши тўпурарлар рўйхатида учинчи ўринни эгаллаб турибди. Руни ҳисобида 5 та АПЛ чемпионлиги ва ЕЧЛ ғолиблиги бор.
2. Люк Шоу
Йўналиш: “Саутгемптон” — “Манчестер Юнайтед”
Трансфер нархи: 31,5 миллион фунт
Шартнома тузилган йил: 2014 йил, Июнь
Луи ван Гал "МЮ" бой мураббийи этиб тайинлангач, Алекс Фергюсондан қолишмаслик учун ёш футболчиларни жамоага таклиф қила бошлади. “Саутгемптон”да юқори даражада ўйин олиб борган Люк Шоу 19 ёшига тўла-тўлмай“МЮ” каби буюк клубдан таклиф олади. “Авлиёлар” раҳбарияти ҳимоячи учун таклиф қилинган 31,5 миллион фунтни ҳеч иккиланмай қабул қилишади. Биринчи мавсум Люк Шоу учун омадсиз бошланди. Кетма-кет жароҳатлар унинг кўп учрашувлар ўтказиб юборишига сабаб бўлди. Ҳозир эса англиялик ҳимоячи “МЮ” асосий таркибида тўп суриб келмоқда.
1. Антони Мартиаль
Йўналиш: “Монако” — “Манчестер Юнайтед”
Трансфер нархи: 58 миллион фунт
Шартнома тузилган йил: 2015 йил, Август
Бир неча кун аввал “Манчестер Юнайтед” яна барчани хайратлантирди. Трансфер ойнасининг сўнгги кунида “қизил иблислар” “Монако”дан 19 ёшли Антони Мартиални нақд 58 миллион фунтга сотиб олди. Франциялик ёш иқтидорни бўлажак Тьерри Анри дея эътироф этишмоқда. “Манкунианликлар”нинг ушбу трансфери ўзини оқлайдими ёқми, буни тез орада билиб оламиз.
Манба: sports.uz
Киритилди: 12:50, 07.09.2015. Ўқилди: 6784 марта. Фикрлар: 2 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
