Амалга ошмаган эътиборли трансферлар. ТОП-5
Олдинроқ амалга ошмаган трансферлар ҳақидаги мақолани эътиборингизга хавола этган эдик. Бу сафар яна ана шундай амалга ошмасдан қолиб кетган эътиборга молик трансферлар рейтингини тақдим этамиз.
5. Рой Кин
Қаерга: “Блекберн” (1993 йили)
1993 йили “Ноттингем Форест” футболчиси Рой Кин жума оқшомида “Блекберн”га ўтишга розилик беради. “Блекберн” мураббийи Кенни Далглиш ўша куни ҳуқуқшуносларни топа олмайди. Бир-икки жойга қўнғироқ ҳам қилади. Аммо ҳеч қандай наф чиқмайди. Шундан сўнг мураббий ҳамма ишни душанба кунига қолдиради. Бундай паллада “МЮ”нинг айёр мураббийи сер Алекс Фергюсон дам олиш куни Ройга қўнғироқ қилиб, уни ўзи томонга оғдириб олади. Далглиш бу воқеани эшитганидан сўнг, “ғазаб оти”га минади. Бироқ поезд кетиб бўлганди.
4. Микаэл Лаудруп
Қаерга: “Ливерпуль” (1983 йил)
Лаудруп 1983 йили Европадаги келажаги порлоқ футболчилардан бири сифатида эътироф этиларди. “Ливерпуль” данияликни тезроқ сотиб олишни хоҳлади. Футболчи ва клуб келишув шартлари ва маош борасида бир тўхтамга келишди. Фақат жамоанинг 4 йиллик битим тузиш ҳақидаги илтимоси Микаэлга маъқул тушмайди. У эркинроқ бўлиш учун 3 йилга чеклашни хоҳлади. Шундан сўнг, орада келишмовчиликлар пайдо бўлди ва Лаудруп “туманли албион”дан кўра Апеннин ярим оролларини афзал кўриб “Ювентус”га ўтиб кетди.
3. Эрик Кантона
Қаерга: “Шеффилд Уэнсдей” (1992 йил)
Кантона ўша пайтлари футболчилик фаолиятини якунлаш ҳақида ўйлай бошлади. Бироқ Франция термаси бош мураббийи Мишел Платини Эрикни бу фикридан қайтарди. “Ливерпуль” жанжалкаш футболчини ўз сафига қўшишдан бош тортади. “Шеффилд” эса унга синов муддатини ўташни таклиф этди. Жамоа бош мураббийи Тревор Францис шундан сўнг иккиланишда давом этади ва Кантонадан яна бир ҳафталик синов муддатини ўташни сўрайди. Бундай ишончсизликдан сўнг Кантона “Шеффилд” таклифини рад этиб, “Лидс” сафига бориб қўшилади. Натижаси нима бўлди дейсизми? “Лидс” ва Кантона Англия чемпионлигини қўлга киритишди.
2. Кака.
Қаерга: “Газиантепспор” (2000 йил)
Кака 2000 йилда “Сан Паулу”нинг захира футболчиси эди. У ёшлар ўртасидаги халқаро мусобақаларда ёрқин ўйинлар намойиш эта бошлаганидан кейин, кўплаб скаутларнинг оромини ўғирлайди. Туркиянинг “Газиантепсор” жамоаси 18 ёшли йигитча учун 1,5 миллион доллар таклиф қилади. Бразилияликлар таклифга рози бўлишади. Бироқ кутилмаганда турк клуби таклифни қайтариб олади. Клуб раҳбарларидан бири “Ёш футболчига шунча тўлаш аҳмоқлик”, деган эди. Орадан 3 йил ўтгач эса “Милан” Кака учун 9 миллион таклиф қилди ва уни харид қилди. Натижа ҳам чакки эмас. Кака “россонери”лар билан Чемпионлар лигасида зафар қучди ва “Олтин тўп”ни қўлга киритди.
1. Диего Марадона
Қаерга: “Шеффилд Юнайтед” (1978 йили)
18 ёшли Марадона 70-йилларнинг охирларида секин-аста скаутлар эътиборини ўзига жалб эта бошлади. “Шеффилд Юнайтед” бош мураббийи Херри Хеслам жамоасида юксак техникали футболчи бўлишини хоҳларди. Бироқ Диегода Европада ўйнаш тажрибаси йўқлиги уни бироз хавотирга солиб қўяди. “Шеффилд” ва “Аргентинос Хуниорс” раҳбарлари Марадонани нархини 1 миллиондан 600 мингга туширишади. Бироқ мураббий шунча маблағни бир футболчига ажратишни хоҳламайди. Балки Хесси таваккал қилиб кўрганида “Шеффилд” бу маблағни 10 баробар кўпайтириб олган бўлармиди.
Фурқат Юсупов
Манба: sports.uz
Киритилди: 10:31, 02.12.2015. Ўқилди: 6492 марта. Фикрлар: 1 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
