Олий лига-2015. “Спектакл"лар тугади. Энг яхшиларни аниқлайдиган пайт етиб келди. Биз ўз анънамизга содиқ қолган ҳолда мавсумнинг энг яхшиларини аниқлаб, уларга ўзига хос “Оскар” ҳайкалчаларини топширамиз. Буёғига озгина “ижод” қиламиз, рози бўласизлар!
“Энг яхши сценарий”
“Пахтакор” – “Металлург” (3:2) “фильми”нинг сценарийcи шу қадар зўр чиқдики, уни хоҳлаган режиссёр фильм қилиб, мавсум охирида катта бойлик эгасига айланиши мумкин эди. Ҳаттоки, ўша Жеймс Кемерон ҳам бу сценарийга тан берса, ҳайрон қолмасдик асло.
Актёрлар ҳам ўз ишларини қойилмақом бажардилар. Бу ўйин Голливуд фильмлари сингари охирига келиб авж олди. Эсингизда бор-а, учрашув тугашига 10 дақиқа қолганида меҳмонлар 2:0 ҳисобида олдинда эдилар?! Бироқ, қолган дақиқаларда воқеалар ривожи бутунлай ўзгариб кетди ва ҳаммаси мезбонлар учун худди ҳинд кинолари сингари омадли якунланди. Томошабинлар ҳам бу фильмнинг охири “яхшилик” билан тугашини билиб, хотиржам кузатардилар. “Ўзбекфильм” хижолат...
“Энг яхши сериал”
“Бабаян тайм!” деб номладик бу сериални. Мавсум давомида “Пахтакор” жамоаси бир нечта учрашувларнинг сўнгги дақиқаларида ғалабани илиб кетди. Шундан сўнг, мухлислару журналистлар орасида “Бабаян тайм” тушунчаси пайдо бўлди. Умуман олганда, Бабаян “шерлар”ни тарк этганидан сўнг ҳам, жамоанинг бу “иродаси” сақланиб қолди. Бир неча ўйинларда охирги дақиқалар айнан пахтакорчиларга аталди. Нимаям дердик, кўз тегмасин, деймиз ва бунақа “сўнгги таймлар” Осиё кубокларида ҳам давом этишига тилакдошмиз. Акс ҳолда, шубҳаланиб қоламиз-аJ
“Энг яхши рассом”
Мазкур номинация ғолиблиги ПФЛ тақвимининг тузувчиларига насиб этди. Ушбу мавсумда тақвим шу қадар аъло даражада бўялдики, Пикассо бу "санъат асари"ни кўриб, рассом бўлиб туғилганига пушаймон бўлиб кетарди. Битта таклиф-де бу ҳам – ҳалиям бу “шоҳасар”ни “Лувр” музейига топшириш керак, кеч бўлмасидан...
“Энг кассабоп фильм”
Мавсумнинг энг кассабоп “фильми” Фарғонадаги “кинотеатр”да қўйилди. “Нефтчи” – “Насаф” картинасини “кинотеатр”да бевосита 17143 томошабин томоша қилган. Биз бу кассабопликни бир нарсага йўйдик – томошабинлар ва ҳатто актёрлар-да сценарийдан хабарлари бўлмаган, шунинг учун қизиқарли кечган томоша...
“Энг энг яхши “қора одам”
Бу соврин яқин йиллар ичида Равшан Эрматовдан бошқасига насиб этмаса керак. Жаҳон чемпионатларида энг кўп ўйинни бошқарган Эрматов бу йил Олий лигада 27 та ўйинда ҳакамлик қилди. Унинг асосий рақобатчиси Владислав Цейтлинда бу кўрсаткич 22 ни ташкил қилди. Асосийси, айнан Равшан Эрматов бошқарувидаги ўйинларда ҳар хил “фильмлар”ни кўрмадик. Кучлилар енгди ростан...
“Энг яхши фахрий актёр”
Наманганнинг “Навбаҳор” жамоаси аъзоси Улуғбек Қодиров, э-э-э, Бақоев 37 ёшида ҳам юқори спорт формасида эканлигини кўрсатиб қўйди ва ушбу номинациямиз ғолибига айланди. У мавсум мобайнида 21 ўйинда 7 та гол уриб, шу ёшда ҳам саҳнада тура олиш мумкинлигини исботлади. Яхшиям Улуғбек Италияда туғилмаган, акс ҳолда Тоттига қийин бўларди...
“Энг кўп фильмда суратга тушган актёр”
“Металлург”дан Ҳикмат Ҳошимов ва “Нефтчи”дан Евгений Черемисин Олий лиганинг барча 30 та учрашувини ҳам тўлиқ 90 дақиқа давомида майдонда ўтказишди. Шу боис, ҳар иккала “актёр” ҳам ушбу совринга муносиб деб топилди. Гонорар бобида ҳам бу икковлон рекорд натижа қайд этган бўлсалар ҳам керак, афсуски, бизга бу суммалар номаълум бўлгани боис, аниқ бир рақамни келтира олмаймиз.
“Жангари роли учун”
“Олмалиқ” сардори Евгений Гоголь ҳақиқий сардор эканини кўрсатди. У мавсум давомида 3 та жангари ролни ижро этди. Олий лигада бошқа ҳеч қайси футболчига 3 та қизил карточка олиш “бахти” насиб этмади. “Олмалиқ” сардорининг бу феълига, бизнингча, унинг фамилияси сабаб бўлган. Буюкларнинг номини кўтариб юриш осонмас-да ўзиям...
“Энг яхши ёш актёр”
ОФК йил якунларига кўра “Бунёдкор”нинг уч нафар “актёри” - Зибиҳилло Ўринбоев, Достонбек Ҳамдамов ва Элдор Шомуродовни “Йилнинг энг яхши ёш футболчиси” совринига номзод қилиб кўрсатди. Улар орасида Достонбек Ҳамдамов мукофотни қўлга киритганини инобатга олсак, мазкур соврин ҳам унга насиб этди. Умид қиламизки, Достонбек олдинги акалари сингари фақат шу ном билан кино оламидан йўқолиб кетмайди.
“Энг яхши хорижлик актёр”
Бу совринга “Насаф”нинг туркманистонлик легионери Артур Геворкян ва “Олмалиқ”нинг серб легионери Неманья Йованович даъвогарлик қилишди. Қаршиликлар билан чемпионатда бронза медалини қўлга киритган ва кубок олтин медалига сазовор бўлган Геворкян бу борада асосий рақибидан бироз устунлик қилди ва “энг яхши хорижлик актёр” номинацияси ғолиби бўлди. Хорижликларни ҳам аста-секин ўзимизнинг фильмларга кўниктиряпмиз, қойил!
“Салбий роли учун”
“Металлург” бош мураббийи Рустам Мирсодиқов мавсум давомида САЛБИЙ ҚАҲРАМОН ролини маромига етказиб ижро этди. Унинг роли шу қадар салбий чиқдики, натижада уни ёмон йўлларга бошлаган инсонлар ҳам кўзга кўринмай қолди ва Мирсодиқовнинг ўз барча айбни ўз бўйнига олди. Бу инсоннинг шу фазилатига беш кетдик лекин – бошқаларни “сотмадилар”!
“Энг яхши режиссёр”
“Пахтакор”, “Локомотив”, “Бунёдкор” каби пойтахтдаги гранд “киностудия”ларнинг бош “режиссёр”лари мавсум давомида ўзгариб кетди. Натижада соврин учун асосий номзод Қашқадарёнинг энг катта “студияси” “режиссёри” Рўзиқул Бердиев бўлди. У мана бир неча йилдирки “Насаф”ни аъло даражада бошқармоқда. Бу мавсум Бердиев учун анча омадли кечди. Чемпионатда бронза ва Ўзбекистон кубоги бош соврини!
Фильм ишлаб чиқишни бошладингми, охиригача етказ-да!
“Энг яхши актёр”
Энг яхшиларни аниқлашда табиийки натижалар биринчи ўринга чиқади. “Пахтакор” “актёри” Игор Сергеев 23 та гол уриб тўпурар бўлди, бунинг устига гол+пас тизими бўйича ҳам етакчилик қилиб, жамоасининг чемпионлигига муносиб ҳисса қўшди. Шундай экан, бу совринни бошқа бировга бериб юборсак адолатсизлик бўларди. Унга яна “сўнгги дақиқалар қироли” деган совринни ҳам топширишлари мумкин. Бу совринни ким топширади, денг? Шахсан норвегиялик Оле Гуннар Сульшер! “Мендан ҳам ўтиб кетдинг-е, укам!” деб...
“Энг йиғлоқи актёр”
Ушбу номинацияни очиқ қолдирамиз. “Энг йиғлоқи актёр” номини қайси ўйинчига беришимиз кераклигини сиздан сўраб қоламиз. Ўзи биламизу, аммо сиздан эшитганимиз яхши-да...
Фурқат Юсупов, Чемпион + газетаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Пахтакор
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
