Колумбия терма жамоаси тарихидаги энг яхши тўпурар Радамель Фалкао 2026 йилги Жаҳон чемпионатининг илк тури олдидан ўз фикрлари билан ўртоқлашди. Терма жамоа собиқ сардори ESPN FANS YouTube каналига берган интервьюсида Ўзбекистонга қарши баҳс ва жамоадан кутилаётган натижа ҳақида фикр билдирди.
“Америка Кубогида ажойиб ўйин кўрсатиб, финалгача етиб борганимиздан сўнг, Колумбия терма жамоаси кейинчалик барчамиз кутган барқарорликни намойиш эта олмади. Жамоа бу ўйинини мустаҳкамлаб, саралаш босқичини анча хотиржам ўтказади деб ўйлагандик. Аммо саралашдаги воқеалар ривожи кутилганидек бўлмади ва жамоа учинчи ўрин билан йўлланмани қўлга киритди”, дейди Фалкао.
Унинг фикрича жамоанинг ўйинидан қониқмаганлар жуда кўп:
“Буни тушунса бўлади, чунки мундиал бошланишидан олдинги кунларда футболчилар ўзларини ортиқча хавфга қўйишни истамайди. Кўнгилдагидек етиб кела олишмагандир, лекин бу муаммо эмас”.
Собиқ сардор биринчи турдаги Ўзбекистонга қарши баҳс энг муҳим учрашув эканини маълум қилди.
“Муаммо биринчи ўйиндан бошланади, футболчилар руҳий ва жисмоний жиҳатдан тайёр бўлишлари керак. Ортда қолган ишлар қолиб кетди. Ҳатто энг идеал ҳолатда етиб келинганда ҳам, бунинг Жаҳон чемпионатига ҳеч қандай таъсири бўлмасди. Энг муҳими – ҳар қандай қийинчилик Ўзбекистон билан ўйинда юз беради. Жамоада жуда яхши футболчилар йиғилган, фақат улар худди 2024 йилги Америка Кубогидагидек ўз ўйинларини топиб олишлари керак”, деди 40 ёшли футболчи.
Маълумот учун, Радамель Фалкао 36 та гол билан Колумбия терма жамоаси тарихидаги энг яхши тўпурар ҳисобланади. Бироқ у ҳозирда терма жамоадаги фаолиятини якунлаган.
Ўзбекистон МТЖ мундиалдаги илк ўйинини Мексикада ўтказади, қолган икки учрашув эса АҚШдаги стадионларда бўлиб ўтади. “Оқ бўрилар” 18 июнь куни биринчи турда Колумбияга қарши майдонга тушади. Ушбу учрашувга Мексика пойтахтидаги “Ацтека” стадиони мезбонлик қилади.
Жамоа иккинчи тур доирасида 23 июнь куни Криштиану Роналду бошчилигидаги Португалия терма жамоаси билан ўйнайди. Мазкур беллашув АҚШдаги “Хюстон” стадионида ўтказилиши белгиланган. Гуруҳдаги сўнгги учрашув 28 июнь куни “Атланта” стадионида Конго Демократик Республикасига қарши бўлиб ўтади.
Матнда хатолик топсангиз, ўша хатони белгилаб, бизга жўнатинг (Ctrl + Enter).