Бразилияда ўтган ёзги Олимпиада ўйинларида футбол бўйича кумуш медални қўлга киритганига бир неча соат ўтганидан кейин ҳимоячи Никлас Зюле терма жамоа мураббийи Ҳорст Ҳрубеш билан алоҳида суҳбатлашди. Учрашув давомида мураббий унга шундай маслаҳат берди: «Агар сен яна бироз самаралироқ ўйнасанг, ўз йўлингни топасан.» Финландия терма жамоасига қарши ўтган синов ўйинида (2:0) Никлас Зюле Германиянинг Йоахим Лёв раҳбарлигидаги асосий терма жамоаси таркибида ўз дебютини нишонлади.
Ёш юлдуздаги бундай ривожланиш кутилмаганда юз бергани йўқ. Ёзги танаффус вақтида бир нечта топ-клублар 21 ёшли марказий ҳимоячини ўз сафига қўшиб олишга ҳаракат қилишди: «Боруссия Д», «Байер», «Рома», «Наполи», «Ливерпул», «Милан», «Челси». Бироқ Зюле барча таклифларга рад жавобини берди ва «Ҳоффенҳайм»да қолишга қарор қилди. Чунки у ўз вазиятига оқилона баҳо бера олади. «Менга ҳали ўзим кўниккан муҳит керак ва ҳали ўз даражамда барқарор тўп суришим зарур», дейди у «Sport Bild» нашрига берган интервьюсида.
«Ҳоффенҳайм»да айнан унга керакли одам бор: Юлиан Нагелсманн. Жамоа бош мураббийи Зюлени беш йилдан бери танийди. Ёшлар жамоасида уларнинг ўртасида бир неча марта келишмовчиликлар бўлган. «Никлас жуда эркин ҳаракат қиларди. У ўз рольини ҳар доим ҳужумкор деб биларди ва онда-сонда танбеҳ эшитиб турарди. Бу эса унга зарар қилмади, кўриб турибмизки, у жуда яхши ривожланди», дейди Нагелсманн. Буни Зюле ҳам тасдиқлайди: «Мен энди ёшлар жамоасидаги каби баланд овозда гапирмайман. Мураббийнинг ҳар бир гапига қаршилик қилавермайман.»
Агар у ривожланишда шундай давом этса, топ-клубларнинг унга нисбатан қизиқиши, 2019 йилгача имзоланган шартномага қарамасдан, асло камаймайди. Чунки Зюле замонавий марказий ҳимоячига нисбатан талабларнинг барчасига жавоб беради. Бўйи 1,94 метр, кенг қоматли. Миллий терма жамоа таркибидан жой олганлиги ҳам айни муддао. Ким билади, бир йилдан кейин у балки АПЛда тўп сурадиган навбатдаги немис футболчисига айланар.
Матнда хатолик топсангиз, ўша хатони белгилаб, бизга жўнатинг (Ctrl + Enter).