2004 йили Португалияда бўлиб ўтган Европа чемпионатида Греция терма жамоаси чемпионликни қўлга киритганидан хабарингиз бор. Ушбу жамоа сафида Евро-2004 мусобақасида ўзбекистонлик футболчи ўйнаганидан хабарингиз бўлмаса керак, албатта. У ҳақида маълумот бериб ўтамиз.
Грециялик ҳужумчи Димитрис Пападопулос Ўзбекистон ва Қозоғистонда туғилгани ҳақида маълумотлар бор. Sports.kz сайти эса ушбу масалага ойдинлик киритиш мақсадида футболчи билан гаплашишга муваффақ бўлди. Суҳбат давомида Пападопулос айнан Ўзбекистонда туғилгани маълум бўлди.
— Димитрис, кўп интервьюларингизда Қозоғистонда туғилганингизни айтгансиз, аммо Википедия сизни Ўзбекистонда туғилганингизни қайд этган. Қайси бир тўғри?
— Икки давлат ўртасида туғилганман. Ростдан ҳам Ўзбекистон ва Қозоғистон чегарасида таваллуд топганман. Мен таваллуд топган Гагарин Ўзбекистон томонда эди. Менинг икки синглим ва укам Қозоғистонда туғилишган. Боиси, ўша пайтда оилам Қозоғистонда яшаётган эди. Бувим ва бувам Қозоғистон тарафда истиқомат қилишган. Шу тариқа, мен Ўзбекистонда туғилганман, аммо Қозоғистонда улғайдим деса бўлади.
— Оилангиз билан Грецияга кетганингизда неча ёшда бўлгансиз?
— Етти ёшда эдим. 1989 йилда кўчиб кетганмиз. Ўрта Осиёда яшайдиган греклар билан биргаликда поездда бир ҳафта йўл босиб, Греция чегарасига етиб келгандик.
— Грецияга кўчиб ўтгунингизга қадар футбол билан танишганмисиз?
— Дастлабки футбол сирларини Гагаринда ўрганганман. У ерда икки йил давомида футбол мактабига қатнаганман. Етти ёшимда футбол мактаби жамоасида ўйнаганман. Греция томон йўлга чиқишимиздан бир кун олдин мактаблараро мусобақада иштирок этгандим.
— Отангиз Қозоғистон терма жамоасига мухлислик қилиши ҳақида ўқигандим. Шундайми? Отангиз ҳам футбол ўйнаганми?
— Отам «Пахтакор»га мухлислик қилган ва Василис Хадзипанагиснинг ишқибози бўлган. У футбол ўйнамаган. Автобус ҳайдовчиси бўлиб ишлаган.
— Фаолиятингиз давомида «Бернли», «Панатинаикос», «Лечче», «Динамо» (Загреб), «Сельта», ПАОК клублари сафида ўйнагансиз. Уларнинг қайси биридаги фаолиятингизни муваффақиятли деб айта оласиз?
— Ҳар бир жамоада нимадир янги нарса ўрганганман. Шубҳасиз, «Панатинаикос»даги фаолиятим энг муваффақиятлиси бўлган. Биз «олтин дубл»га эришганмиз ва мен илк марта Грециянинг энг яхши футболчиси деб топилганман. Бу жамоа сафида беш йил ўйнадим, жамоа сардори бўлдим. Энг катта футбол тажрибасини эса Англиянинг «Бернли» клубида олганман. Ўша пайтда ёш эдим ва бу клуб менга катта ҳаётий тажриба берган.
— Назаримда, 2004 йил сиз учун энг муваффақиятли мавсум бўлган?
— 2004 йил энг унутилмас йил бўлган. «Панатинаикос»да «олтин дубл» қайд этдик. Мен эса жамоанинг энг яхши тўпурари бўлдим ва йилнинг энг яхши футболчиси совринига эга бўлдим. Олимпия терма жамоаси сафида Афинадаги ёзги олимпиадада иштирок этдим ва Европа чемпионатида олтин медалларни қўлга киритдим. Португалиядаги мусобақа терма жамоа сафидаги ҳар бир футболчи учун фаолиятидаги энг юқори чўққи бўлган.
— Фаолиятингиздаги қайси голингиз сиз учун унутилмас бўлган?
— Мен «Олимпиакос» дарвозасига урган иккита голимга алоҳида тўхталиб ўтган бўлардим. Биринчиси — 2004 йилда Греция кубоги финалида. Ўшанда узоқ йиллик танаффусдан кейин нуфузли совринга эга бўлгандик. Иккинчиси — Афина дербиси доирасида «Караискакис» стадионида 2007 йилда азалий рақибимиз дарвозасига урган голим. Ўшанда «Панатинаикос» 10 йил деганда «Олимпиакос» майдонида бўлиб ўтган дербида ғалаба қозонишга муваффақ бўлганди.
— Ҳозир 35 ёшдасиз. Неча ёшгача футбол ўйнамоқчисиз?
— Ўзимни кучли ва соғлом ҳис қиляпман. Юқори савияда ўйнай оларканман, майдонга чиқишда давом этаман...
— «Атромитос» — фаолиятингиздаги сўнгги клуб бўладими?
— Бирор нарса дейиш қийин! Эртага нима бўлишини олдиндан айтиб бўлмайди. Кўрамиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
