Гонконгда қиличбозлик бўйича Осиё XXI чемпионати бошланди. 20 июнга қадар давом этадиган нуфузли мусобақада Ўзбекистон терма жамоаси 11 нафар спортчи билан иштирок этмоқда. Шпага бўйича эркаклар ўртасидаги баҳсларда юртимиз шарафини Файзулла Алимов, Роман Александров, Жавоҳирбек Нурматов ва Олег Соколов ҳимоя қилса, ушбу йўналишда қизлар ўртасидаги беллашувларда Малика Ҳакимова кураш олиб боради. Рапира бўйича терма жамоамиз таркибидан Дониёр Саъдуллаев, Аброр Собиров, Жонибек Холмуродов, Қурбон Қаноатовлар ўрин олишган. Мазкур йўналиш бўйича қизлар ўртасида Мадинабону Парпиева ўз омадини синаб кўрди. Шунингдек қилич йўналишида Евгений Коновалов ғолиблик учун куч синашади.
Мусобақанинг дастлабки кунида 4 нафар спортчимиз ўз имкониятларини синаб кўришди. Дониёр Саъдуллаев илк босқичда ҳиндистонлик Кумар Велаутамни 15:13 ҳисобида мағлубиятга учратиб, иккинчи босқичга йўл олганди. Аммо кейинги даврада у Жанубий Корея вакили Ки Сон Йонгга қарши жанг қилди ва 8:15 ҳисобида ютқазди. Қолган вакилларимиздан Аброр Собиров таиландлик, Қурбон Қаноатов эса вьетнамлик рақибига 1/64 финал босқичида ютказиб қўйишди. Терма жамоамизнинг яна бир аъзоси Жонибек Холмуродов эса асосий давра ўйинларида иштирок этмади.
Бугун турнирда эркаклар ўртасида шпага, қизлар ўртасида эса рапира йўналишларида баҳслар бўлиб ўтди. Шпага бўйича беллашувларда иштирок этган спортчимиз Олег Соколов Осиё чемпионатида ўзига ҳос сенсация қайд этиб Рио-2016 Олимпия ўйинлари чемпиони Жанубий Кореялик Парк Санг Йонгни 15:11 ҳисобида мағлуб этди ва кейинги босқичга йўл олди. Ушбу жангга қадар Соколов эронлик Муҳаммад Али Кейҳанини ҳудди шу ҳисобда мағлубиятга учратган эди. Шу йилнинг март ойида Финляндиянинг Турку шаҳрида бўлиб ўтган жаҳон кубоги босқичининг “В” тоифасида ғолиблигини қўлга киритган Олег Соколов афсуски нимчоракфинал йўлланмаси учун кечган жангда қозоғистонлик Дмитрий Алексанинга имкониятни бой бериб, яккалик баҳсларида мусобақадаги иштирокига якун ясади.
Бугун шунингдек, Файзулла Алимов, Роман Александров, Жавоҳирбек Нурматов ва Мадинабону Парпиева ҳам қитъа чемпионатидаги иштирокларини бошлашди. Файзулла илк жангини австралиялик Жереми Шеллига қарши ўтказиб 15:11 ҳисобида рақибидан устун келди. Иккинчи босқичда эса япониялик Масару Ямадага худди шу ҳисобда имкониятни бой бериб, яккалик баҳсларидаги иштирокини якунлади. Жавоҳирбек Нурматов ҳам илк жангида мўғулистонлик Дулгун Энксогтни мағлуб этиб иккинчи босқичга йўлланма олганди. Аммо 1/32 финал босқичида япониялик Уяма Саторуга ютказиб қўйди. Роман Александров ва Мадинабону Парпиевалар эса дастлабки босқичининг ўзидаёқ мағлубият аламини тотиб қўришди. Энди эркаклар терма жамоамиз жамоавий баҳсларда ўз омадини синаб кўради. Мусобақа 20 июнга қадар давом этади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
