Трансфер тарихидаги рекорд келишув Неймарни дунёнинг энг қиммат футболчисига, отасини эса бадавлат агентга айлантирди.
Ҳолат-минус беш даража
Оила бошлиғи ҳисобланган катта Неймар Сан-Паулу штатининг Можи-дас Крузис шаҳри жамоаси шарафини ҳимоя қилган, ҳаваскорлик жамоасидаги камтарона маоши рўзғор тебратишга етиб-етмасди. Ўғли дунёга келгач, катта Неймарнинг муаммолари янада кўпайди. Тўрт йилдан сўнг Рафаэль туғилгач, шўрлик ота рафиқаси Надин ва фарзандлари билан ўзи туғилиб ўсган Сан-Висенти шаҳрига йўл олди.
Табиийки, футбол билан хайрлашди ва механик сифатида ишга жойлашди. Надин эса болалар билан овора эди. «Молиявий ҳолатимиз нолдан пастга тушиб кетди. Ҳатто минус беш даражага тушиб қолган пайт ҳам бўлди. Лекин ночорликдан чиқиб кета олишимизга ишонардик», - дея хотирлайди катта Неймар.
Оиладаги молиявий тараққиёт кичик Неймарнинг кўчага чиқиши ва ноёб иқтидорини кашф этиши билан бошланди. Етти ёшида «Португеза Сантиста» сафидан жой олди. Тўрт йилдан сўнг бўлажак юлдузни «Сантос» скаутлари сезиб қолишди ва шартнома таклиф этишди. Академиядаги 6 йил Неймарнинг ёрқин фаолияти хусусидаги тахминлар ва Робиньога қиёслаш билан ўтди.
Шу боис, профессионал келишув ҳеч кимни ажаблантирмади. Ҳужумчи ўша пайтдаёқ натижа ва одоб-ахлоқи жиҳатидан чинакам юлдузга айланиб улгурганди. Унга қарши тўп сурган ҳимоячилар кўпинча сариқ карточка олишга мажбур бўлишарди. Майдонда ҳеч кимга ён беришни истамайдиган кичик Неймар ҳаётда доимо оиласига ғамхўрлик қилиш пайида бўлди.
Автобиографик асарининг асосий қисми ҳам оилага бағишланган. Албатта, ўғлининг муваффақиятларида катта Неймарнинг ҳиссаси катта. Китоблардан бирига «Отам билан мулоқот» номи берилгани бежиз эмас.
Қашшоқлар табақасидан чиққан собиқ ишчи ҳаётнинг аччиқ синовларига дош бериб ўғлининг савияли футболчи бўлиб етишиши учун бор-будини аямади. Охир-оқибат, у ҳаётда Неймарнинг энг яқин маслаҳатчиси, футболда эса агентига айланди.
Қанча пул ишлаган?
2011 йили «Сантос» ва «Барселона» клублар ўртасидаги ЖЧнинг финалида ўзаро куч синашдилар. Ўшанда Неймар билан Мессининг қўл олишиши Каталония грандининг Гвардиоладан кейинги даври рамзига айланди. Мусобақа якунлангач, «Барса» музокараларга киришди, катта Неймар эса дарҳол ўз шартини кўндаланг қўйди - «хомаки» келишув учун 10 млн., чинакам шартнома учун эса 40 млн. сўради.
Ҳужумчининг 2013 йили каталонияликлар сафига қўшилиши қанчага тушганлиги ҳақида ҳанузгача аниқ маълумот йўқ. Айрим манбаларда ёзилишича катта Неймар учун ажратилган 40 млн. тахминан «Сантос»га берилган товон пулига тенг. Кўпчилик орасида агентни фирибгар, лўттибозга чиқариб қўйганлар ҳам йўқ эмас.
Бразилия клубининг собиқ президенти Луис Рибейронинг таъкидлашича, катта Неймар каталонияликлардан олинган даромад ҳисобидан Лондонда дабдабали базм уюштирган. 2016 йили ҳужумчи камқонлик хасталигидан фориғ бўлгач, «Барса» амалдаги шартномани узайтиришга уринди.
Бир ёқда «МЮ», «Реал» билан музокаралар бошланди. Охир-оқибат, Неймар жамоада қолди. Лекин бунга «Барса» ўғлининг имзоси учун 26 млн. талаб қилган агентнинг шартини бажариш орқали муваффақ бўлди.
Қизиғи, ана шу маблағни катта Неймар июлнинг охирида, футболчи Париж сафарига отланаётган ҳафтада олди. Мазкур келишув 450 млн.га баҳоланмоқда. Табиийки, агент ҳам мўмай даромаддан бенасиб қолган эмас - бу гал у 36 млн. миқдорда «чўтал» олди.
Хуллас, Неймар да Силва Сантос Сеньор 6 йил ичида 112 млн. еврога эга чиқди! The Sunдагиларнинг маълумотига кўра, Эль Падре де Неймарнинг 2013 йилдан ҳозирга қадар қўлга киритган маблағи Мессининг даромадларидан кўпроқ. Кўпчилик мутахассислар мазкур трансфер молиявий «фэйр-плей» қоидаларига зидлигини таъкидлашмоқда.
Нима учун у шундай даромадларга эга бўлмоқда?
Чунки у ўта харидоргир маҳсулот лицензиясининг соҳиби. Неймар - Nike ҳамда Red Bullнинг «юзи», Tite таснифига кўра дунёнинг энг нуфузли футболчиси, машҳур MSN триосининг бир бўлаги. Ҳужумчи бир неча йилдан буён Лео ва Криштиану тахтига ворислик қилмоқда. Отаси эса шундай ноёб иқтидор соҳибини дунёга келтирган шахс сифатида вазиятдан унумли фойдаланмоқда. «Бу борада жуда омадим келди.
Отам шунчаки, оддий ота эмас. У менинг энг яқин дўстим. Албатта, баъзан ўта қаттиққўл. Лекин нима қилишимдан қатъий назар, доимо оиламизни ўйлайди», - деди футболчи ўз агенти ҳақида.
Ҳа, катта Неймар «минус беш»дан миллионларга кўтарилди, қашшоқ кулбадан ҳашаматли қасрга кўчиб ўтди, камтарин стадионлардан энг шинам ареналарга йўл олди. Унинг ўғли футбол тарихидаги қимматбаҳо қиссани ёзиш билан овора. У эса футболчини ҳар томонлама қўллаб-қувватлаш йўлида тиниб-тинчимаяпти.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
