Transfer tarixidagi rekord kelishuv Neymarni dunyoning eng qimmat futbolchisiga, otasini esa badavlat agentga aylantirdi.
Holat-minus besh daraja
Oila boshlig‘i hisoblangan katta Neymar San-Paulu shtatining Moji-das Kruzis shahri jamoasi sharafini himoya qilgan, havaskorlik jamoasidagi kamtarona maoshi ro‘zg‘or tebratishga yetib-etmasdi. O‘g‘li dunyoga kelgach, katta Neymarning muammolari yanada ko‘paydi. To‘rt yildan so‘ng Rafael tug‘ilgach, sho‘rlik ota rafiqasi Nadin va farzandlari bilan o‘zi tug‘ilib o‘sgan San-Visenti shahriga yo‘l oldi.
Tabiiyki, futbol bilan xayrlashdi va mexanik sifatida ishga joylashdi. Nadin esa bolalar bilan ovora edi. «Moliyaviy holatimiz noldan pastga tushib ketdi. Hatto minus besh darajaga tushib qolgan payt ham bo‘ldi. Lekin nochorlikdan chiqib keta olishimizga ishonardik», - deya xotirlaydi katta Neymar.
Oiladagi moliyaviy taraqqiyot kichik Neymarning ko‘chaga chiqishi va noyob iqtidorini kashf etishi bilan boshlandi. Yetti yoshida «Portugeza Santista» safidan joy oldi. To‘rt yildan so‘ng bo‘lajak yulduzni «Santos» skautlari sezib qolishdi va shartnoma taklif etishdi. Akademiyadagi 6 yil Neymarning yorqin faoliyati xususidagi taxminlar va Robinyoga qiyoslash bilan o‘tdi.
Shu bois, professional kelishuv hech kimni ajablantirmadi. Hujumchi o‘sha paytdayoq natija va odob-axloqi jihatidan chinakam yulduzga aylanib ulgurgandi. Unga qarshi to‘p surgan himoyachilar ko‘pincha sariq kartochka olishga majbur bo‘lishardi. Maydonda hech kimga yon berishni istamaydigan kichik Neymar hayotda doimo oilasiga g‘amxo‘rlik qilish payida bo‘ldi.
Avtobiografik asarining asosiy qismi ham oilaga bag‘ishlangan. Albatta, o‘g‘lining muvaffaqiyatlarida katta Neymarning hissasi katta. Kitoblardan biriga «Otam bilan muloqot» nomi berilgani bejiz emas.
Qashshoqlar tabaqasidan chiqqan sobiq ishchi hayotning achchiq sinovlariga dosh berib o‘g‘lining saviyali futbolchi bo‘lib yetishishi uchun bor-budini ayamadi. Oxir-oqibat, u hayotda Neymarning eng yaqin maslahatchisi, futbolda esa agentiga aylandi.
Qancha pul ishlagan?
2011 yili «Santos» va «Barselona» klublar o‘rtasidagi JCHning finalida o‘zaro kuch sinashdilar. O‘shanda Neymar bilan Messining qo‘l olishishi Kataloniya grandining Gvardioladan keyingi davri ramziga aylandi. Musobaqa yakunlangach, «Barsa» muzokaralarga kirishdi, katta Neymar esa darhol o‘z shartini ko‘ndalang qo‘ydi - «xomaki» kelishuv uchun 10 mln., chinakam shartnoma uchun esa 40 mln. so‘radi.
Hujumchining 2013 yili kataloniyaliklar safiga qo‘shilishi qanchaga tushganligi haqida hanuzgacha aniq ma’lumot yo‘q. Ayrim manbalarda yozilishicha katta Neymar uchun ajratilgan 40 mln. taxminan «Santos»ga berilgan tovon puliga teng. Ko‘pchilik orasida agentni firibgar, lo‘ttibozga chiqarib qo‘yganlar ham yo‘q emas.
Braziliya klubining sobiq prezidenti Luis Ribeyroning ta’kidlashicha, katta Neymar kataloniyaliklardan olingan daromad hisobidan Londonda dabdabali bazm uyushtirgan. 2016 yili hujumchi kamqonlik xastaligidan forig‘ bo‘lgach, «Barsa» amaldagi shartnomani uzaytirishga urindi.
Bir yoqda «MYU», «Real» bilan muzokaralar boshlandi. Oxir-oqibat, Neymar jamoada qoldi. Lekin bunga «Barsa» o‘g‘lining imzosi uchun 26 mln. talab qilgan agentning shartini bajarish orqali muvaffaq bo‘ldi.
Qizig‘i, ana shu mablag‘ni katta Neymar iyulning oxirida, futbolchi Parij safariga otlanayotgan haftada oldi. Mazkur kelishuv 450 mln.ga baholanmoqda. Tabiiyki, agent ham mo‘may daromaddan benasib qolgan emas - bu gal u 36 mln. miqdorda «cho‘tal» oldi.
Xullas, Neymar da Silva Santos Senyor 6 yil ichida 112 mln. yevroga ega chiqdi! The Sundagilarning ma’lumotiga ko‘ra, El Padre de Neymarning 2013 yildan hozirga qadar qo‘lga kiritgan mablag‘i Messining daromadlaridan ko‘proq. Ko‘pchilik mutaxassislar mazkur transfer moliyaviy «feyr-pley» qoidalariga zidligini ta’kidlashmoqda.
Nima uchun u shunday daromadlarga ega bo‘lmoqda?
Chunki u o‘ta xaridorgir mahsulot lisenziyasining sohibi. Neymar - Nike hamda Red Bullning «yuzi», Tite tasnifiga ko‘ra dunyoning eng nufuzli futbolchisi, mashhur MSN triosining bir bo‘lagi. Hujumchi bir necha yildan buyon Leo va Krishtianu taxtiga vorislik qilmoqda. Otasi esa shunday noyob iqtidor sohibini dunyoga keltirgan shaxs sifatida vaziyatdan unumli foydalanmoqda. «Bu borada juda omadim keldi.
Otam shunchaki, oddiy ota emas. U mening eng yaqin do‘stim. Albatta, ba’zan o‘ta qattiqqo‘l. Lekin nima qilishimdan qat’iy nazar, doimo oilamizni o‘ylaydi», - dedi futbolchi o‘z agenti haqida.
Ha, katta Neymar «minus besh»dan millionlarga ko‘tarildi, qashshoq kulbadan hashamatli qasrga ko‘chib o‘tdi, kamtarin stadionlardan eng shinam arenalarga yo‘l oldi. Uning o‘g‘li futbol tarixidagi qimmatbaho qissani yozish bilan ovora. U esa futbolchini har tomonlama qo‘llab-quvvatlash yo‘lida tinib-tinchimayapti.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
