"Даракчи" газетасининг "10 қалтис савол" лойиҳаси меҳмони Ўзбекистон миллий терма жамоаси футболчиси, Ўзбекистон кубоги соҳиби, Ўзбекистон чемпиони, Осиёда икки карра йилнинг энг яхши футболчиси Сервер ЖЕПАРОВ...
— Терма жамоамиз Жаҳон чемпионати саралаш босқичларида суст ўйин намойиш этаётганига сабаб нима?
— Бу борада ҳали аниқ қарорлар чиқаришга ва хулоса қилишга эрта. Олдинда учта ўйин бор ва Жаҳон чемпионатига чиқиш учун имкониятимиз етарли, деб ўйлайман.
— Сизнингча, ўзингиз ўйнаган қайси жамоалар (хориж клублари ҳам)нинг мураббийи услуби бўйича энг кучли?
— Алоҳида кимнидир таъкидлолмайман. Боиси ҳар бир мураббийнинг ўз услуби ва ёндашуви бор. Энг муҳими, бу услуб, ёндашувлар етарлича натижаларни беряпти.
— Агар сиз терма жамоа мураббийи бўлганингизда, кимларни жамоага жалб қилган бўлардингиз? Уч нафар футболчини санаб ўтсангиз...
— Уч нафар футболчини санаб ўтолмайман. Айта олишим мумкин бўлгани, айни дамда жисмоний тайёргарликка эга бўлган, майдонга тушиш истаги бор футболчиларни чақирган бўлардим.
— Ҳозир Ўзбекистонда “Барселона” ва “Реал” жамоалари мухлислари кўпайган. Сиз бу жамоаларнинг қайси бирига ишқибозлик қиласиз ва нега?
— (Кулади) “Барселона” жамоасига, чунки уларнинг ўйин услуби ёқади.
— Дунё футболи “юлдуз"лари нафақат ўйини билан, балки хайр-саховати билан ҳам машҳур. Бизда ҳам шундай футболчилар борми?
— Балки бордир. Ўзимга келсак, ҳали бундай саховатга қўл уриб улгурганимча йўқ.
— Карьерангизни тугатсангиз нима билан шуғулланасиз: футбол мураббийи, футбол “скаут”и, футбол томошабини?
— Аниқ томошабин бўлмайман (мириқиб кулади)! Мураббий ё футбол “скаут”и бўлиш ҳақида ҳали аниқ тўхтамга келганимча йўқ.
— Телеграмингизга “Иккиюзламачи одамларни ёқтирмайман, қайси бири асли эканини билмайсан”, деган афоризм жойлагансиз. Иккиюзламачилардан кўп куйганмисиз, дейман?
— (Хўрсиниб) Минг афсуски, ундайлар жудаям кўп... Атрофимдагиларнинг иккиюзламачилигини билганим заҳоти, дарҳол улар билан алоқани тўхтатаман.
— Гол урганда сальто қилардингиз. Ҳозир гол ҳам йўқ, сальто ҳам...
— Демак, ҳозир шундай вақт. Лекин вақти келиб, бари яхши томонга ўзгаради ва сиз санаб ўтган гол ҳам, сальто ҳам бўлади (кулади)!
— Қизиқчиларимиз футболни асосий мавзуга айлантирганига жавобан, "танқид “тош”ларини отишига имкон яратган ўзимиз", деган фикр бўладими ё жаҳлингиз чиқадими?
— Юмор ҳамма вақт фойдали. Муҳими, юморга юмор билан муносабатда бўлиш керак (кулади). Чунки тўғри қилинган танқид ҳар доим ижобий натижа беради!
Махсус савол:
Алишер Узоқов, актёр: — Сервер, сизни жудаям ҳурмат қиламан. Сизни “Арсенал” жамоасининг футболчиси Месут Ўзилга ўхшатаман. Месутда жисмоний тайёргарлик жуда ёмон ва майдон марказида тўп учун курашмайди. Сизда ҳам шу камчиликлар бор, нега бунга эътибор бермайсиз?
— (Мириқиб кулади) Мени ўзгартиришмоқчими?! Ажойиб савол. Ҳатто нима деб жавоб беришни ҳам билмайман.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
