Сир эмаски, от спорти бўйича Олимпия ўйинларида иштирок этган делегация қатнашувчилар орасида алоҳида ҳурмат-эътиборга лойиқ бўлади, қудратли спорт мамлакати сифатида қайд этилади.
Чунки, спортнинг ушбу турида нафақат чавандозлар, балки отларга ҳам алоҳида эътибор қаратиш лозимдир. Бунгача Ўзбекистон от спорти бўйича Олимпия ўйинларида иштирок этмаган. 2018 йилги Осиё ўйинларига келибгина биз илк маротаба ўз отларимиз билан мусобақада иштирок этдик.
1991 йилдан сўнг от спорти бўйича Олимпия ўйинларига лицензия тақдим этувчи мусобақалар асосан Ғарбий Европа мамлакатларида ташкил этиларди. Бу эса Марказий Осиё мамлакатлари, жумладан Ўзбекистон учун ҳам Олимпиада лицензиясини қўлга киритиш имкониятларини сезиларли равишда пасайтириб юборарди. Чунки, ветеринария талабларига кўра отлар Европа мамлакатларида 90 кун карантинда бўлиши лозим. Бунинг натижасида отлар билан машғулот ўтказиш имконияти камаяди. Қолаверса, бу катта ҳаражатларни талаб этади.
Куни кеча Халқаро от спорти федерациясининг йиғилишида Токио Олимпиадасига лицензион мусобақалардан бири Москва шаҳрида ўтказилиши ҳақида қарор қабул қилинди. Бу бизга нима беради? Юқорида қайд этилганидек, Ғарбий Европа мамлакатларидан фарқли равишда биз отлар билан биргаликда Москва шаҳрига тезроқ етиб борамиз. Шунингдек, отлар учун 90 кунлик карантин белгиланмаган. Бундан ташқари тил, виза билан боғлиқ муаммолар ҳам биз учун бошоғриқ бўлмайди, Европага отлар билан бориш учун сарфланадиган ҳаражатлар ҳам қисқаради. Биз санаб ўтган «плюс» томонлар спортчиларимизнинг лицензия олиш учун имкониятларини сезиларли равишда оширади.
Қайд этиш лозимки, лицензион мусобақани нисбатан яқин бўлган Москва шаҳрида ўтказиш учун Россия, Ўзбекистон ва Қирғизистон от спорти федерациялари ҳамжиҳатликда иш олиб боришди (Чунки, Марказий Осиёда от спорти бўйича бундай лицензион мусобақани ўтказиш учун жаҳон стандартлари талабларига жавоб берадиган иншоот мавжуд эмас. Энг яқини Москва шаҳрида жойлашган). Қолаверса, Ўзбекистон Миллий олимпия қўмитаси томонидан бу борада Халқаро от спорти федерациясига мурожаатномалар юборилди. Бу эса ўз самарасини берди ва Москва шаҳри Токио Олимпиадасига йўлланма берувчи мусобақага мезбонлик қилиш ҳуқуқини қўлга киритди.
Умид қиламизки, 2019 йилнинг 27-31 июль кунлари Россия Федерацияси пойтахтида ўтказиладиган мусобақада ўзбек чавандозлари тарихда илк маротаба Олимпия ўйинлари лицензиясини қўлга киритадилар. Миллий олимпия қўмитаси бу йўлда Ўзбекистон йилқичилик ва от спорти федерациясига муваффақиятлар тилаб қолади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
