Кеча, 28 март куни теннис бўйича Ўзбекистон ўсмирлар терма жамоаси яна бир йирик мусобақада иштирок этиш учун Малайзияга жўнаб кетди. Куала-Лумпур шаҳрида ушбу спорт тури бўйича бўлиб ўтадиган ўсмирлар ўртасидаги ITF жамоавий чемпионатида мамлакатимиздан 6 нафар ёш ракетка устаси қатнашиши кутилмоқда.
Мазкур чемпионатда юртимиз шарафини ўғил болалардан Амир Милушев, Бобурмирзо Ёқубжонов, Қодиржон Одилов, қизлардан Мафтунабону Қаҳрамонова, Шаҳноза Маримова ҳамда Муниса Ашурбековалар ҳимоя қилишади. Ўзбекистон теннис федерацияси томонидан мусобақа ташкилий қўмитасига юборилган буюртмада захирадаги спортчи Исмоил Турдиевнинг номи ҳам қайд этилган.
Эътиборли томони Малайзияга жўнаб кетган таркибимиз асосини 14 ёшли теннисчилар ташкил этган, биргина Шаҳноза Маримова 13 ёшда. Шунингдек, 6 спортчимизнинг 5 нафари Теннис бўйича Республика ихтисослаштирилган олимпия захиралари спорт мактаби тарбияланувчилари эканлигини ҳам маълумот ўрнида келтириб ўтиш мумкин. Ягона теннисчимиз, Қодиржон Одилов Фарғона вилояти спорт ўйинлари ва енгил атлетика бўйича ихтисослаштирилган болалар-ўсмирлар спорт мактабида машғулот олиб боради.
Турнир давомида вакилларимизга Фаррух Обидов ва Муҳаммадризо Саидхўжаев мураббийлик қилишади.
Натижалар ҳақида хабар бериб борамиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).