“Металлург” – “Қизилқум” жамоалари учрашувида навоийликлар дарвозасига иккита тўп киритган Зоҳид Абдуллаев кучлилар сафидаги жами голлари сонини 100 тага етказиб олди ва “Геннадий Красницкий клуби” аъзосига айланди. Учрашувдан кейин биз ўйин қаҳрамонини суҳбатга тортдик.
- Зоҳид , аввало сизни ғалаба билан, “Геннадий Красницкий клуби” аъзосига айланганингиз ҳамда “учрашувнинг энг яхши ўйинчиси” деб эътироф этилганлигингиз билан табриклаймиз.
- Раҳмат. Мен ҳам фурсатдан фойдаланиб барча ишқибозларимизни бугунги ғалаба билан табриклайман. Ютуқларимиз эса давомий бўлишини истаб қоламан.
- Масъулият юқори бўлган паллада мақсадга эришиш ҳам қийинлашади. Бугун рақиб дарвозасини ишғол этиш осон бўлмагандир.
- Албатта. Самарқанддаги мағлубиятдан кейин ютуққа эришишимиз, мухлисларимизни хурсанд этишимиз керак эди. Мен тўп киритаманми, боша ўйинчи муваффақият қозонадими, бундан қатъий назар ишқибозларимиз биздан ғалаба талаб этаётганди. Учрашув эса ҳақиқатан ҳам қийин бошланди. Анча пайтгача “Қизилқум” бизнинг эркин ҳаракат қилишимизга, тўпни назоратда ушлаб туришимизга имкон бермади. Пенальтидан кейин эса навоийликлар ҳисобни тенглаштириш мақсадида олдинга ташланишди. Натижада пайдо бўлган бўшлиқлар бизга қўл келди.
- Аммо “Қизилқум” тезда жавоб голини киритишга ҳам муваффақ бўлди...
- Шундай. Лекин Андреевнинг голидан кейин бизда ғалаба қозонишга, муҳим 3 очкони қўлга киритишга ишончимиз ортди. Бевосита ўзим киритган голларга тўхталадиган бўлсам, жамоадошларимнинг ёрдамини алоҳида эътироф этган бўлардим. Музаффар, Серёжа, Баҳром билан тандемларимиз, тезкор комбинацияларимиз рақибни доғда қолдирди. Дарвозабон қаршида ёлғиз қолганимда эса Худо шукур, техника панд бермади.
- Бугунги голларингизни кимга бағишлайсиз.
- Яқинларимга, оила аъзоларимга ва мени доимий равишда қўллаб қувватлаб турувчи, менга ишонувчи содиқ мухлисларимга бағишлайман. Бугунги ютуқ барча бекободликларни ва “Металлург” ишқибозларини хурсанд этганидан бахтиёрмиз.
- Зоҳид, аввалги учрашувларда заҳирадан майдонга туширилгандингиз, бугун эса илк дақиқалардан асосий таркибда ҳаракат қилдингиз. Бу ҳам ўз ўйинингизни намойиш этиш, гол киритишингизга ёрдам бердими?
- Эҳтимол. Аммо футболчи ҳар қандай ҳолатда бор кучи билан ўйнаши, мураббийлар ва мухлислар ишончини оқлашга тайёр туриши керак. Футболчи учун эл эътиборида туриш, уларнинг меҳрини қозонишданда ёқимли ва қийин вазифа бўлмаса керак. Бунинг учун эса тинимсиз меҳнат қилиш, изланишдан тўхтамаслик лозим.
- Юзлик довонни забт этдингиз. Навбатдаги мақсадлар қандай?
- Мақсадимиз ҳамиша чиройли голлар билан халқимизни, ишқибозларимизни хушнуд этиш. Бу йўлда эса айтиб ўтганимдек меҳнат қилишдан бўйин товламаслик, ишлаш ва ишлаш керак.
- Самимий суҳбатингиз учун раҳмат. Ғалаба билан яна бир бор табриклаймиз.
- Сизларга ҳам, мухлисларимизга ҳам раҳмат, стадионга келганингиз, бизга ишонганингиз ва қўллаб қувватлаганингиз учун. “Металлург” ҳамиша мухлислар учун ўйнайди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
