Клод Пюэль деярли уч йил Англияда ишлади - дастлаб «Саутгемптон»да, сўнгра «Лестер»да. Ҳар икки клубдан истеъфога чиқарилди. Бироқ франциялик мутахассис L`Equipe нашрига берган интервьюсида барчасини тўғри қилгани, шунчаки Премьер-лигада вазият ўзгаргани - ҳатто Чемпионлар Лигасида зафар қучган мураббийни ҳам бир зумда ишдан бўшатишлари мумкинлигини таъкидлади.
- Яқинда (2019 йил 24 февраль) «Лестер» сизни истеъфога чиқарди. Бу борада қандай фикрдасиз?
- Ишимиз шунақа. Янги жамоага келганингда, лойиҳани юргизишни хоҳлайсан, аммо қаршингиздан турли муаммолар чиқади. Баъзан эса раҳбарият қайд этилаётган натижалар кутилганидан паст эканлигини таъкидлайди. Премьер-лигада натижа ҳамма нарсадан устун, жамоани дастлаб шакллантириб олиш кераклиги эътибордан четда қолади. «Лестер» базавий масалаларда ўзгаришларга муҳтож эди. Бироқ мураббий шундай ўйлаганда, раҳбарият ва футболчилар унинг фикрига қўшилишадими? Ҳамма гап шунда.
- Айрим ўйинчилар (Варди, Шмейхель, Морган) сизга қарши чиқишгани якуний қарорга таъсир ўтказди, деб ўйлайсизми?
- Жамоага 2017 йилнинг октябрида келгандим, улар эса мавсум-2015|2016да чемпион бўлишганди. Бу ўзига хос сенсация эди. Боз устига, ўзгача услубда муваффақият қозонишганди: чуқур ҳимоя, тезкор қарши ҳужумлар, тўпни назорат қилиш... Аммо рақиблар бу услубни ўрганиб олишгач, муаммолар бошланди. Дейлик, «Лестер» ҳимоявий ўйин кўрсатадиган рақибларига қарши ҳеч нарса қилолмади. Жамоавий ўйинни йўлга қўйиш, муайян футболчилар ўйинига ўзгартириш киритиш эҳтиёжи туғилди. Позицион ҳужумлар йўқ эди, тўп назорати йўқолганди. Айнан шу жиҳатлар бўйи-ча ишладик. Албатта, норозилар йўқ эмасди. Лекин «Саутгемптон» (мавсум-2016|2017), «Ницца» (2012-2016) ва «Лилл»да (2002-2008) шу каби можароларга дуч келганман, билган ҳолда уларга пешвоз чиққанман. Ўзгаришларга муҳтож жамоаларга келдим, ўз ишимни бажардим ва уялишга арзийдиган натижаларга эришмадим. Маълум бир услубга ўрганиб қолган фахрийлар янгиликларга қарши чиқишлари турган гап. Аммо мураббий, нима бўлишидан қатъий назар, ўз фикрида қолиши лозим. «Лестер»да қилган ишларимдан мамнунман. Таркибни ёшартириш керак эди. Ҳозир АПЛда футболчиларининг ўртача ёши «Лестер»никидан пастроқ бўлган битта жамоа бор, холос. Бу ёшларнинг келажаги порлоқ.
- Сизнинг кетишингизга футболчилар сабабчи, деган фикрга қўшиласизми?
- Одамларнинг одатий ҳаёт тарзини ўзгартиришга уринсангиз, уларнинг миясига янги ғоялар киритсангиз, янги вазифалар белгиласангиз, албатта, кескинлик вужудга келади. Аммо кетганимдан сўнг футболчилардан 15та хат келди, буни айнан ўша йигитлардан кутмагандим. Айни пайт Англия миллий ва ёшлар жамоасида ўйнаётган ёшлар билан муносабатим яхши эди. Умуман олганда, натижалар у қадар ёмон эмасди: 7-ўринда бораётгандик. Ҳаммаси яхши кетаётганди, аммо президент вафот этди (2018 йилнинг 28 октябрь куни вертолётда ҳалокатга учраган). Еттинчи поғона - ҳозирча бу жамоа учун максимум.
- Тузилмада ҳам ўзгаришлар қилишга уриндингиз - хорижлик мураббий учун бу таваккал эмасми?
- Нима алоқаси бор? Ҳамма кўпроқ очко тўплашни хоҳлайди, бу тушунарли. Бироқ пулингиз кўп бўлмай туриб, етакчи клубларга муносиб рақобат туғдириш эҳтиёжи туғилса, жамоавий ўйинни йўлга қўйиш, иқтидорли бўлишига қарамай, назардан четда қолаётган йигитларни топишга тўғри келади. «Лестер»да айнан шундай қилдим ва ишончим комилки, келажакда бу ажойиб жамоа бўлади.
- Инглиз тилини яхши билмай туриб Премьер-лигада иш бошладингиз. Балки бу сизнинг зиёнингизга ишлагандир?
- Дастлаб «Саутгемптон»да иш бошлаганимда (2016 йилнинг июнида), дарҳақиқат, қийин бўлган. Фикримни футболчиларга етказиш учун сўз тополмасдим. Аммо вақт ўтиб тил ўргандим ва «Лестер»да бу борада муаммога йўлиқмадим. Аниқроғи, ўзим учун керакли бўлган сўзларни ёд олдим. Аслида, албатта, она тилингиз билан ишлаш осонроқ.
- Сизнинг истеъфоингиздан ке-йин Премьер-лигада бошқа франциялик мураббий қолмади. Бу француз мураббийларининг фикри инқирозга учраганидан далолатми?
- Вазият ўзгарди - рақобат кучли. Аксарият клублар хорижлик бадавлат кишилар томонидан сотиб олинди, эндиликда мураббийдан нафақат малакали бўлиш, балки хўжайинлар билан тўғри муносабат ўрнатиш ҳам талаб этилади. Мен учун муҳими - фақат ўз ишим: машғулотлар, футболчилар билан муносабат. Бугун Премьер-лигада фаолият юритиш учун ўзингизни бағишлашингиз, хорижий тилларни ўзлаштириш, матбуот билан ишлашни билиш лозим.
- ОАВ сизнинг ишингизни нотўғри талқин қилган ёки сиз ҳақингизда кам ёзган, деб ҳисоблайсизми?
- Францияда муваффақиятли ишлаганим учун «Саутгемптон»га таклиф қилишган, жамоаларим («Лилль» ва «Лион») Чемпионлар Лигасида ёмон қатнашишмади, шогирдларим ўсишга эришишди. Мени Англия клубига жамоавий ўйинни йўлга қўйишим учун чақиришди. Аммо маълум бўлишича, бундан ташқари ўз имиджингиз устида ҳам ишлашингиз керак экан - шу тариқа мухлислар ва матбуотда ёрқин таассурот қолдираркансиз.
- «Саутгемптон» ва «Лестер»даги лойиҳаларингиз кутилган натижаларни бермагани ранжитса керак?
- Лекин Премьер-лигада бир йил ишлаш ҳам ажойиб кўрсаткич. Конте «Челси»га (2016 йил) юқори натижаларга эришган мутахассис сифатида ташриф буюрди - Италия термасига устозлик қилди, «Челси» у билан АПЛ чемпионлигини нишонлади (2017), мамлакат кубогини қўлга киритди (2018) - аммо барибир ишдан бўшатишди (2018 йилнинг июлида)! Мануэль Пеллегрини ҳам «Манчестер Сити»да худди шундай ҳолатга тушганди. Ўртага катта нарсалар қў-йилган. Чемпионлар Лигасида зафар қучсангиз ҳам сизни истеъфога чиқаришлари мумкин. Ўйин қоидалари шунақа. Қаторасига учта мағлубиятдан сўнг клуб эгаларининг сенга нисбатан муносабати ўзгаради. Уларга дарҳол натижа ва очколарга эришиш зарур, ўша натижа ниманинг ҳисобига келади, жамоани қандай тайёрлаш керак - қизиғи йўқ. Муаммо айнан шунда - мураббий келажакка қараб иш тутади, очколар эса ҳозироқ даркор. Нима қилса бўлади? Англия чемпионатидаги мураббийлар аҳволига назар солинг. Фақат Клопп ва Гвардиола келажаклари борасида хавотирланишмаса бўлаверади. Қолганларни, ҳатто машҳурларини ҳам исталган пайтда бўшатишлари мумкин.
- Нима деб ўйлайсиз, Англияда яхши рейтингга эга бўлдингизми?
- Матбуот билан муносабатларим яхши эди, деярли барчалари жамоада нима қилмоқчилигим хусусида тўғри маълумотлар ёзишди. Ҳамкасбларим билан ҳам алоқаларимиз ёмон эмасди. Етакчи клубларни мағлубиятга учратганимизда («Лестер» бу мавсум Пюэль бошчилигида «Челси»ни 1:0, «Манчестер Сити»ни 2:1 ҳисобида мағлубиятга учратди), уларнинг мураббийлари мени мақташди, айрим клублар президентлари бизнинг жамоада рўй бераётган воқеаларни диққат билан кузатишганидан хабардорман. Менинг қўл остимда кейинчалик миллий термага ёрдами тегиши мумкин бўлган англиялик ёш йигитлар тўп суришди.
- Иккита уриниш ўхшамаганидан кейин яна Премьер-лигага қайтишга ҳаракат қиласизми?
- «Ўхшамади» деган фикрингизга қўшилмайман! Ҳозирча қаерда ишлашимни билмайман, аммо Европада қолишим аниқ. Албатта, «Бу мураббий «Саутгемптон» ва «Лестер»да нимани қойиллатди? У ерда нималарни ўзгартирди?» деган фикр пайдо бўлиши мумкин. Бироқ кўплаб маҳоратли футболчиларга эга «Манчестер Сити» ёки «Тоттенхэм»да фаолият бошлаш бош-қа, менинг клубларимдаги иш бошқа. Улар асосан юқоридан йўлланадиган узатмалар орқали ўйнашса нима қилиш керак? Ўртамиёналар қаторида юришни истамасангиз, тўпни ерда ушлашни ўрганиш лозим.
- Қайсидир клублардан таклифлар бўлдими?
- Ҳа, турнир жадвалининг (АПЛ) қуйи қисмидаги клублардан. Аммо мавсум якунланаётганда бундай ишга қўл уришим тўғри бўладими? Даромадли таклифлар тушди, аммо мен учун пул эмас, жамоа даражаси муҳимроқ. Қўл остимдаги клуб Чемпионлар Лигасида қатнашишини хоҳлайман.
- Ишингизни хорижда давом эттириш маъқулми?
- Албатта, чет элда ишлаш яхши, аммо тил ўрганиш керак. Энг яхши вариант - Англия ёки Испания. Франция чемпионатига келсак, у ерда таклифлар ҳозирча йўқ. Аммо шошмайман, бир-икки ой кутаман, Монако яқинидаги уйимда дам оламан.
- Дарвоқе, «Монако» ҳақида. Сиз қачонлардир (1999-2001) бу жамоани бошқаргансиз. Тьерри Анрининг мазкур клубдаги ишига (2018 йил октябрдан 2019 йил январгача) қандай баҳо берасиз?
- Дастлабки уриниши ўхшамади, аммо бу катта тажриба мактаби бўлди. Умид қиламанки, тезда ўзига келиб, янги иш бошлайди - ахир Анри нафсонияти кучли одам. Мураббийдан худди шундай бўлиш талаб этилади. Албатта, ўта мураккаб вазиятда янги мутахассисни тайинлаш таваккал эди. Тьерри «жон» сақлаш учун курашадиган ҳолатга тушмаганди. Жароҳатланганлар бисёр, асосий позицияларга қўядиган ўйин-чилар кам, футболчиларнинг кайфияти бузуқ. Ҳаммаси унга қарши эди. Ҳозир эса «Монако»да мутлақо ўзгача ҳолат ҳукмрон... Тьеррига шунчаки омад етишмади.
- Балки шу ишга киришмагани маъқулмиди?
- Таваккал қилди - бу «рулетка» ўйинига ўхшайди. «Монако» ҳар ҳолда машҳур клуб, Анри кейинги мавсумгача қолиб, шунга кўра иш юритмоқчийди. Бунинг учун вазиятни тезда ўнглаш керак. Аммо ниманинг ҳисобига? Раҳбарлар эса, уни таклиф этишдими, ишлашига йўл қўйиб беришлари лозим эди.
- Яқинда Патрик Виейра билан учрашдингиз - унинг «Ницца»даги мураббийлик дебюти муваффақиятли чиқди, десак бўлади...
- Ўйлашимча, у тўғри йўлдан бормоқда. Клуб яхши, унга ишонишади. Жамоа таркиби ёшлардан тузилган, улар ёрдамида ажойиб ўйинни йўлга қўйиш мумкин. Мабодо, муаммо туғилса ҳам у қисқа муддатда бартараф бўлади. Боз устига, Патрик оғир-босиқ йигит, ўзига ишончи юқори. Ёшлар жамоасида («Манчестер Сити», 2011-2015) иш бошлаб тўғри қилди, АҚШда («Нью-Йорк Сити», 2016-2018) фаолият юритди. «Ницца»да эса жамоа Виейрага яқин бўлган футбол ўйнашга одатланган. Мен (Пюэль 2012-2016 йиллар мобайнида «Ницца»да ишлаган) ва Люсьен (Фавр 2016-2018 йилларда «Ницца»да ишлаган)дан кейин Патрикнинг таклиф этилиши мантиқан тўғри бўлди - у ҳам худди шундай футбол фалсафасига эга. Ўйлашимча, у ерда яна икки мавсум ишлайди, сўнгра уни машҳурроқ клубга таклиф этишади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
