Айни пайтда Токио Олимпиадасига катта ҳажмда ишлар амалга оширилаётган сир эмас. Бу борада Жисмоний тарбия ва спорт вазирлиги ҳамда Миллий олимпия қўмитаси билан ҳамкорлигида ишлаб чиқилган қатор дастурлар бўйича ишлар олиб борилмоқда. Унга кўра, юртимизда фаолият олиб бораётган Олимпия ўйинлари дастуридаги ҳар бир федерация Токио Олимпиадасига тайёргарлик бўйича ҳисобот топширади. Бугун МОҚда ана шундай ҳисоботлардан бири ўтказилди. Унда Ўзбекистон “ROWING & CANOE” ҳамда сув спорти федерацияларининг иши кўриб чиқилди.
Йиғилишни МОҚ президенти Рустам Шоабдураҳмонов олиб борди. Унда Жисмоний тарбия ва спорт вазирининг биринчи ўринбосари Ойбек Касимов, МОҚ вице-президентлари Сакен Полатов ва Азиз Камилов, шунингдек, қўмитанинг бошқа ходимлари, барча федерацияларнинг мутасадди раҳбарлари ва ОАВ вакиллари ҳам иштирок этишди.
Таъкидлаш жоиз, ушбу йиғилиш танқидий руҳда ўтказилди. Ҳисобот учун дастлаб ушбу икки федерация танлаб олингани ҳам бежиз эмас. Зеро, мазкур спорт турлари Олимпия ўйинларида энг кўп медаль ўйналадиган йўналишларни қамраб олади. Бироқ бу бўйича олиб борилаётган тайёргарлик ишлари у қадар ҳам кўнгилдагидек эмас. Р.Шоабдураҳмонов бунга алоҳида тўхталиб ўтди.
“Ҳозирги кунда биз учун энг долзарб масала Токио Олимпиадаси ва унга тайёргарлик. Шу асосда спорт федерациялари ва машғулотлар жараёнини янада кучайтириш керак. Яхши натижага эришиш учун биз жон куйдириб ишлашимиз, олдимизда турган барча муаммоларни ҳал қилмоғимиз лозим. Шунингдек, спорт тиббиёти ва фармакологияси бўйича дунёнинг етакчи мамлакатлари билан ҳамкорлик ишларини ҳам йўлга қўйишимиз талаб этилади. Барча федерация ва ассоциациялар диққатига, тақвимдаги лицензион ва рейтинг очко берадиган мусобақалар ҳамда улардаги муваффақиятли иштирокимизни назорат қилиш керак. Атлетларимизнинг юқори натижа қайд этишида фахрийларимизнинг ҳам ёрдами ас қотади. Улардаги бой тажрибадан фойдаланиб қолайлик. Ҳар бир федерацияга фахрийлар тўлиқ бириктирилсин ва улар имконияти даражасида терма жамоа билан ишлашсин”, – деди Рустам Шоабдураҳмонов.
Йиғилишда дастлаб Ўзбекистон “rowing & canoe” федерациясининг ҳисоботи тингланди. Ҳисоботни федерация Бош котиби Вячеслав Дидрих ўқиб эшиттирди. Унда В.Дидрих спортчиларимизнинг йил бошидан бери нуфузли халқаро мусобақаларда қайд этиб келаётган натижаларини, бу йилги жаҳон чемпионатига олиб борилаётган тайёргарлик, Токио Олимпиадаси учун кўзланаётган йўлланмалар ва медаль бўйича таҳлилий тақдимот қилиб берди. Шунингдек, сув спорти турлари федерацияси Бош котиби Алишер Ғаниев ҳам худди шу асосда тайёрлаб келган тақдимотини намойиш қилди.
Йиғилиш давомида ҳар икки федерациянинг фаолиятига танқидий баҳо берилиб, олдинда қилиниши керак бўлган ишлар ва чора-тадбирлар бўйича тегишли кўрсатмалар берилди. Шунинг билан йиғилиш ўз ишини якунлади. Федерацияларнинг келгуси ҳисоботи яна 2 ҳафтадан сўнг ўтказилади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
