Ваъда амали билан гўзал бўлганидек, биз ҳам 5 кун ўтиб ўзимизни кичик визуал анализимизни тақдим этмоқдамиз.
Демак, Жаноб Абрамов келганидан кейин, Ўзбекистон МТЖсида қандай ўзгаришлар, ҳозирча кўзга ташланмоқда:
ЮТУҚЛАР
1. Ҳужумкор ўйин.
Ўзбекистон ўйин бошидан ҳужум тактикасида ўйнамоқда, рақибни иккинчи жамоа ролида ўйнашга, яъни ҳимояланишга мажбурламоқда. Агар футбол ўйнашдан мақсад гол уриш бўлса, демак, ҳужумкор ўйнаш керак. Асосий мақсад ғалабага ҳам, фақатгина гол урилгандан кейин эришилади.
2. Кесма узатмалар
Ўзбекистон қанотлар ва вертикал паслар билан ўйнамоқда, шунингдек, Сингапурга қарши учрашувда рақиб жарима майдонида ўткир кесма паслар билан ҳам ўйнади, учинчи гол бунга мисол. Кутилмаганда, рақиб ҳимоячилари орасидан берилган кесма пас, замонавий футбол ҳужумларида приоритет ҳисобланади, буни албатта янада мукаммалаштириб боравериш керак.
3. Прессинг
Ўзбекистон прессинг қилишни ҳозирча уддаламоқда. Охирги 2та ўйиндаги тўплар 8-1, ҳозирча рақибларга ҳужум қилишда катта имконият қолдирилмаганидан далолат берди. Лекин, Саудия Арабистони, Жанубий Корея, Япония каби шаклланган жамоалар билан бўладиган ўйинларда, прессинг бундан 2 карра кўп кучни талаб қилади. Демак, шу калибрдаги жамоаларни ютиш учун Санжар Қодирқулов каби 95 минут тинмай югуриб, тўп учун курашиб, “энержайзер” режимида ҳаракат қилиш талаб этилади. Энди бу жисмоний мураббий Йелечич муаммоси.
4. Кашфиётлар
Ҳозиргина номи тилга олинган Санжар Қодирқулов охирги 2 ўйин натижасига кўра, шахсий фикримча, “фойдали ҳаракатлар коэффиценти” бўйича 1-ўринда турибди. Санжар яхши маънода Д'артаньян ролини бажармоқда ёки ўзбекча айтганда, аравани бошқаларга қараганда кўпроқ тортмоқда. Бу жаноб Абрамовнинг кашфиёти ва ўзбек футболи ютуғи!
5. Икки ғалаба
6 очко чиройли ўйинларда ҳалол қўлга киритилди! Муҳим миссия бажарилди! Кейинги босқич — “Саудияга мастер класс ўташ” режаси!
КАМЧИЛИКЛАР
1. Дарвозабон
Суюнов зўр тажрибага эга кипер, лекин, шахсий фикримча, у “Насаф”да ўйнаган вақтларда ҳозирги ҳолатига қараганда маҳоратлироқ эди. Корея, Япония, Эрон каби топ-ҳужумчиларга эга жамоаларга қарши ўйинларда Ўзбекистонга реакцияси янада тез, ётган жойидан сакраб тура оладиган дарвозабон зарур. Шу сабаб, дарвозабонлар мураббийи Д.Иванков бу чизиқда янги, чайир кандидатларни синаб кўравериш керак. Машғулотда зўр кўринган ҳаракатлар, Фаластиннинг биринчи голидаги вазиятда сэйв билан тугаши керак эди. Аммо, лекин, бироқ – страховка қилиб қўйиш керак шу чоқ! Бу чизиқни кучайтириш вариантларини ўйлаб кўриш керак.
2. Бош билан яхши ўйнай олмаймиз
Элдор Шомуродов ҳозирча истисно, лекин иккинчи қаватда Анзур Исмоилов кетганидан сўнг, зўр ўйнайдиган, ҳаводаги 5та жангнинг 5тасида тўпни рақибнинг бошидан олиб қўядиган футболчилар кўринмаяпти. Бу Анзурни фишкаси эди! Шу сабаб, кучли рақиблар билан бўлган ўйинларда қанотлардан ошириладиган пасларнинг Шомуродовгача етиб бормаслик эҳтимоли ошади. Сабаби, уни энди камида 2 марказий ҳимоячи ҳавода қўриқлайди. Шу сабаб марказий ярим ҳимоячилар, флангдаги ҳужумларда Элдорга ҳаво жангларида ёрдамлашишлари зарурияти пайдо бўлади, бу эса ўз ўрнида Элдорга бироз енгиллик яратади ва ҳужум якуни учун вариантлар тақдим этади. Бунинг учун эса, жамоа бош билан нормал ўйнаш керак ёки бош билан ўйнаш ҳадисини эплай олмасак, флангдаги паслар ердан узатилгани самаралироқдир.
3. Стандартлар
Жалолиддин Машарипов жарима тўплари ва бурчак тўпларини тепмагани маъқул. Термада нимагадир унинг “Пахтакор”даги каби аниқлик коэффиценти пас. Фикримча, альтернатив вариант сифатида жарима, бурчак зарбаларини чап қанотдан Фаррух Сайфиев, ўнг қанотдан Достон Ҳамдамов оширишлари, ҳужумга ранг баранглик, рақиб ҳимоячиларига эса хавотир олиб киради. Одил Аҳмедов ва Икром Алибоев эса, ўзларига жонажон бўлган ҳар қандай нуқтадан жарималарни ошираверишсин, сабаби уларда аниқ зарба шаклланган. Жалол эса стандартлар бўйича қўшимча ишлаши зарур. Жалол каби латерал ёки фланг ҳужумчиларини асосий номери бу аслида.
4. Гемоглобини темирдан иборат янги қон
Чап қанот ярим ҳимоясида Сардор Мирзаевни ҳаракатлари, фикримча, МТЖга тортмайроқ турибди. Тезлиги юқори эмас, Жалол каби дриблингига ишониб 1 та рақибни яккама-якка алдаганини Сингапур билан бўлган ўйинда кўрмадим. Сайфиев ҳужум бошлаш учун берган пасни рақиб келиши билан Сайфиевни ўзига орқага қайтарадиган футболчи, флангларда катта эффект бермайди. Тезлиги юқори, 1 та рақибни алдаб, чалғитиб, рақиб жарима зонасига аниқ “навес” қиладиган чап оёқли футболчиларни синаб кўриш керак. Янги Жасур Ҳасановлар керак ҳозир термага!
5. Фойдаланилмаган имкониятлар.
Аввалги постимнинг бирида, кучли рақибларга қарши жангларда максимум 3 та имконият бўлиши ва шу 3 имкониятни 2 таси чала имконият бўлиши ҳақида ёзгандим. Мақсад, ана шундай грандлар билан бўладиган ўйинларда 3 та имкониятни камида 2 тасидан фойдаланиш маҳоратини оширишда. Мисол учун, Туркия максимум 2 та реал имкониятга эга бўлди, 1 тасидан фойдаланди ва Франциядан 1 очко олиб кетди. Бу энди классика! Шу сабаб, бу элемент устида ишлаш зарур!
Агар, бугун Элдорга ўйин олдидан: "Бугун яратиладиган вазиятларни камида 70%ни гол билан якунлашинг шарт!”, дейишганида, ҳисоб камида 1:6 бўларди бизнинг фойдамизга!
Биламан, футболда вазиятларга олдиндан гарантия бериш қийин, лекин пухта таёрланган уй вазифалари, албатта ўз натижасини беради.
“Йўқ, бунинг учун бизга Левандовски керак!” каби скептик қарашлар эса, шарҳловчи айтганидек: "Аааажойииб, заргарона зарба, лекин ноаниқ!” бўлиб қолаверади!
Ўша гап, 5 кара 5=25! Пакс!
Фурқат Қурбонов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
