Сўнгги пайтларда Россия чемпионатида кўплаб иқтидорли футболчилар етишиб чиқаётганидан хабарингиз бор. Айни дамда РПЛдаги бир нечта футболчилар Европанинг топ-чемпионатларидаги клубларнинг эътибор марказида турибди, бироқ трансферлар негадир амалга ошмаяпти. Бугун аллақачон кучлироқ чемпионатга йўл олиши кера бўлган футболчилар ҳақида сўз боради.
Фёдор Чалов
Москванинг ЦСКА клуби ҳужумчиси ёш бўлишига қарамай, ўтган мавсумда тўпурарлар пойгасида 15 та гол билан ғолиб чиққанидан хабарингиз бор. Тезкор ва вазиятлардан унумли фойдалувчи ҳужумчи ўтган мавсумнинг ўзидаёқ “Кристал Пэлас” жамоаси сафига бориб қўшилиши мумкин эди, бироқ жамоалар Фёдорнинг трансфер қиймати борасида келишувга эриша олмади. “Bild” нашри берган маълумотларга қараганда, Лондон клуби ҳужумчи учун 18 миллион евро таклиф қилган, бироқ ЦСКА раҳбарияти бу суммадан икки баробар кўпроқ сўраган ва музокаралар эрта якунланган. Айни дамда москваликларнинг ўйини кўнгилдагидек чиқмаётган бўлиши қарамай, Чаловнинг маҳоратига ҳеч кимда ҳеч қандай шубҳа йўқ. Рус нашрлари ҳужумчини “Рома” скаутлари кузатиб юргани борасида маълумотлар тарқатишмоқда. Чалов ва унинг агенти эса, Европа жамоалардан бўлаётга таклифларни кўриб чиқишга тайёр эканлигини билдирмоқда.
Элдор Шомуродов
Янги мавсумни кўтаринки кайфиятда бошлаган ҳамюртимиз биринчи даврада нафақат Россия, балки кўплаб хорижлик мутахассисларни ҳам эътиборини тортишга муваффақ бўлгани қувонарли. Тезкор, иккинчи қаватда яхши ўйин кўрсатувчи Шомуродов ҳужумда универсал футболчи саналади. У исталган қанотда ёки ҳужумчи ортида ҳам катта наф келтришига гувоҳ бўлиб келяпмиз. Тўғри, айни дамда унда голлар борасида муаммо мавжуд, лекин Элдорнинг майдондаги фойдали ҳаракатлари сони ортиб бормоқда.
Ажойиб стартдан сўнг, аввалига ҳужумчига қизиқиш билдирган “Шальке” трансфер қийматидан чўчиди шекили, бошқа бу борада хабарлар пайдо бўлмади. Кейинчалик, ҳамюртимизни “Галатасарой” жамоасига ўтиши ҳақидаги маълумотлар турк нашрларида пайдо бўлишни бошлади. Ҳозирги кунга келиб “Лион” клуби томонидан қизиқиш пайдо бўлгани ҳақида маълумотлар мавжуд. Ҳамюртимизнинг трансфери борасидаги янгиликлар сони кўп бўлсада, катта эҳтимол билан у қишки трансфер ойнаси чоғида жамоада қоладикан кўринмоқда. Шунга қарамай, унинг кучлироқ чемпионатда тўп суриш имкониятлари тўлиқ сақланиб қолинади.
Ҳозирги кунда “Ростов” жамоаси молиявий муаммолар қуршовида қолган. Клуб узоғи билан мавсум сўнггига қадар ўз етакчиларини ушлаб туришга қодир, кейинчалик бир неча йиллар аввалги “Анжи” сингари кўтарасига ўз футболчиларини сотиб юборадиган кўринмоқда. Вазият шундай кўриниш олса, Шомуродов биринчилардан бўлиб клубни тарк этишга шубҳамиз йўқ.
Алексей ва Антон Миранчук
Эндиликда бу футболчиларни ёш ва иқтидорли дейиш ноўрин бўлса, ажаб эмас. Октябр ойида 24 ёшни қаршилаган ярим ҳимоячиларнинг янги даражага кўтарилишлари учун энг қулай палла кириб келганига анча бўлди.
Бугунги кунга келиб иккита футболчига ҳам Европанинг гранд жамоалари катта қизиқиш билдирмоқда. Рус нашрларида томонидан, ёзда “Локомотив” жамоасига ака-ука Миранчуклар учун “Милан” 100 миллион евро таклиф этгани ҳақида маълумотлар пайдо бўлгани ёдингизда бўлса керак. Тўғри, бу маълумот тезда клуб расмийлари томонидан инкор этилди, бироқ шамол бўлмаса дарахтнинг учи қимирламаслиги барчага аён. Россиялик эркин журналистлардан бири Владимир Бабаниннинг хабар беришича, клуб Миранчукларнинг бир нечта трансферини атайин барбод қилган экан. Айниқса, чемпионлик мавсумидан сўнг, кўплаб ўртамиёна Европа клублари Миранчуклар борасида алоқага чиққан ва катта даромад илинжидаги “Локо” раҳбарлари айтган сумма сабабли трансфер амалга ошмай келган.
Бу мавсумда Алексей Миранчук ўзини ЕЧЛ ўйинларида жуда яхши намойиш этди ва ҳақли тарзда Италия грандлари эътиборига тушди. Афсуски, “Милан” раҳбарияти “Локомотив”нинг талаблари сабабли футболчидан тўлиқ воз кечишга қарор қилди. Айни дамда “Soccer.ru” нашри Миранчукларнинг трансфери борасидаги барча саволлар мавсум сўнггида кўриб чиқилишини маълум қилган. Воқеалар ривожини кузатишда давом этамиз.
Магомед-Шапи Сулайманов
Ушбу рўйхатдаги энг ёш футболчи бўлишига қарамай, “Краснодар” жамоасининг етакчиларидан бирига айланган Сулаймановнинг атрофида миш-мишлар тобора кўпайиб бормоқда.
Ўзининг 17 ёшидаёқ РПЛда омадли дебют қилган қанот ярим ҳимоячиси ажойиб тезлик ва ўзгача техника соҳиби саналади. Кичик жуссали бўлишига қарамай, дриблинг орқали қанотда ўзи учун бошлиқ яратишга қодир вингер борасида “Краснодар” кўплаб таклифларни қабул қилишда давом этмоқда. Ушбу мавсумда “Валенсия” ва “Порту” дарвозаларига Сулейманов томонидан киритлган голлар унга Европа эшикларини очиши мумкин. Ўз услубига эга футболчи айни дамда атиги 20 ёшга кирган бўлсада, “буқалар”нинг алмаштириб бўлмас футболчисга айланиб улгургани қувонарли ҳолат. Россия нашрларининг хабар беришича, Сулейманов билан Испаниянинг “Вильярреал” жамоси жиддий қизиқиб қолган. Клуб раҳбарлари уни Денис Черешевдан ҳам иқтидорлироқ эканлигига шубҳа қилмаяпти. Афсуски, яна ўша трансфер суммасидаги муаммолар Магамед-Шапини Краснодарда ушлаб қолиши мумкин. Гап шундаки, маҳаллий клуб ўз тарбияланувчисини жуда юқори баҳолаб юбормоқда. Кўрамиз, “Краснодар” Сулеймановни бир пайтлар ЦСКА Алан Дзагоевни ушлаб қолгани каби олиб қоладими ёки Россия футболи равнақи йўлида сотиб юборадими. Барчасини вақт кўрсатади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ўзбекистон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
