Coca-Cola Суперлига 20-туридан ўрин олган «Насаф» – АГМК беллашувидан кейинги матбуот анжуманида жамоамиз бош мураббийи Рўзиқул Бердиев бугунги учрашув ҳақида ўз фикрлари билан ўртоқлашди.
«Бугунги рақибимиз номдор ва тажрибали жамоа эди. Уларни мағлубиятга учратишимиз учун ўзимизнинг энг яхши ўйинларимиздан бирини ўтказишимиз керак эди. Ўйлайманки, йигитларимиз буни уддалашди. Бунинг учун йигитларга алоҳида миннатдорчилик билдираман. Қўл остимдаги футболчиларим билан фахрланса бўлади. Шу йигитлар билан бирга ишлаётганимдан хурсандман. Мухлисларга ҳам раҳмат айтишимиз лозим, стадионга келган ва ойнаижаҳон орқали кузатган ишқибозлар ўйиндан завқ олишди деб умид қиламан. Футболчилар ўз даражаларида тўп тепишди. Албатта, қайсидир вазиятда бизга омад кулиб боқди, қайсидир вазиятда эса рақибга. АГМК жамоаси кўпроқ стандарт вазиятларда ҳавфлироқ кўринди. Биз бунга тайёр эдик. Ғалабага муносиб ҳаракат қилдик ва уч очкони қўлга киритдик»,— дейди Рўзиқул Бердиев.
— «Насаф» очиқ футболни яхши кўрадиган жамоа. Бироқ, ҳимоявий ўйин кўрсатадиган жамоаларга қарши баҳсларда қийналмоқда...
— «Бухоро» билан ўйинда қийналдик. «Машъал» ҳам ҳимояда ўйнаган эди. Шунга қарамасдан тўртта гол уришга эришдик. «Бухоро» билан ўйинда вазиятлардан гол урганимизда бошқача бўларди. Бу ўйинлар ортда қолди. Кейинги учрашувларни ўйлашимиз керак. Ғолиб Ғайбуллаев бугун бетоблиги сабаб иштирок эта олмади.
— Жамоанинг навбатдаги икки турда нейтрал майдонда ўйнаши ҳақидаги гапларга муносабатингиз?
— Йўқ, нейтрал майдонда ўйнамаймиз. Дастлаб Бекободга борамиз ва «Қўқон-1912»ни уйда қабул қиламиз. Фақат охирги тўртта тур нейтрал майдонда ўтиши ҳақида таклиф бор.
— Ғалабадан сўнг кўнглингиз тўлмаган шогирдларингиз бўлдими?
— Ютуқдан кейин барча нарсани эсдан чиқариб юборасиз. Бугунги ғалаба билан барчани табриклайман.
— Бобур Абдихолиқов тўпни қабул қилиб олишда кўп бор хатоларга йўл қўйди. Шунга қарамасдан уни 80 дақиқага яқин ўйнатдигиз. Ҳусайн Норчаевга кам имконият берилмаяптими?
— Бобурни танқид қилсак бироз нотўғри бўлади. Ўз голлари билан жамоамизга катта фойда келтиряпти. Уни тўғри тушунишимиз керак, барча ўйинларда тўлиқ ҳаракат қилмоқда. Кўп юкламалар оляпти. Шу боис бугун тетик кўринмаган бўлиши мумкин. Норчаев ҳали ёш, тажрибасини ошириши керак.
— «Насаф» икки йилдан бери ОФК лицензиясини ололмаяпти. Бу дегани жамоа халқаро майдонда иштирок эта олмайди. Бу муаммолар қачон бартараф этилади?
— Бизда ҳеч қачон бундай муаммо бўлмаган эди. Барча шароитлари бор жамоани ҳужжатларини тўғрилаб бера олмаслик ўзим учун кутилмаган ҳолат бўлди. «Насаф» ҳар доим лицензия ҳужжатларини биринчи бўлиб топширган. Балки, бу савол менга эмасдир. Ҳеч қачон бу борада камчилик бўлмаган. Жамоамизда барча шароитлар яратилган.
Ғалабага барча ўз ҳиссасини қўшди. Ойбек Бозоровда жароҳати бор эди. Ҳусниддин Алиқулов бугун қандай ўйнаганини кўрдинглар. Барчани ғалаба билан яна бир бор табриклайман.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Олимпик
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
