2016 йилги жаҳон чемпионлари сафида Ўзбекистонга қарши футзал баҳсларида майдонга тушган Дамиан Стассоне юртимиздаги сафардан сўнг, Аргентина футбол ассоциацияси веб-сайтига интервью берди.
35 ёшли футзалчи Тошкентда ўтган учрашувлар давомида ЎФА томонидан Аргентина терма жамоасига кўрсатилган эътибор, Ўзбекистонда Диего Марадона хотирасига бўлган ҳурмат ҳақида сўзлаб берди.
“Испания чемпионатида фаолият олиб борадиган футзалчиларимиз аллақачон Мадридга етиб олишди. Биз эса якшанба куни Истанбулдан Буэнос Айрес томон йўл оламиз.
Ўзбекистон мамлакати ҳақида гапирадиган бўлсам, Ўзбек халқи бизга юқори даражада ҳурмат кўрсатди, доимо эътиборда бўлдик. Бизга бириктирилган таржимондан тортиб, меҳмонхонадаги хизматчиларгача аъло даражада хушмуомалалик кўрсатди, барча илиқ муносабатда бўлди. Биз турли хил мусобақаларда иштирок этиш учун ҳар сафар мамлакат ташқарисига чиққанимизда, Жаҳон чемпионатида ғалаба қозонганимиз катта таъсир ўтказишини кўрамиз.
Бизга Ўзбекистондакатта ҳурмат кўрсатишди. Сабаби, бу ерда футзалнинг жуда катта ўрни бор. Бизга ажойиб миллий кийимлар совға қилинди. Ўйинлардан 1 кун аввал интервью бериш учун Ўзбекистон футбол ассоцияцияси биносига келганимизда, шунга ўхшаш миллий либос сотиб олиш ҳақида ўйлагандик. Шунинг учун, бу совғанинг қиймати жуда ҳам юқори бўлди. Биз Ўзбекистонда бундай катта ҳурматга лойиқ кўрилганимиздан хурсандмиз.
Тўғриси, мамлакатни кўпроқ кузатиш имконияти бўлмади. Чунки вақтимиз жуда кам эди. Фақатгина меҳмонхона ва ўйин майдони орасида шаҳар манзараларидан баҳраманд бўлдик. Шунинг ўзидан ҳам шаҳарнинг нақадар чиройли эканлигини кўришга муваффақ бўлдик.
Футзал терма жамоамиз Диего Марадона вафотидан кейин сафарда ўйин ўтказган Аргентина футбол ассоцияциясидаги илк жамоа бўлди. Марадонага Ўзбекистон футбол ассоциацияси томонидан жуда катта ҳурмат кўрсатилди. Албатта, бундан яхшироқ нарса ўйлаб топиш мушкул эди.
Барчамиз Диегонинг сурати туширилган либосларда майдонга тушиб келдик ва бу жуда чиройли кўринди. Биз Марадонанинг вафотидан кейин ҳали ўйин ўтказмагандик ҳамда бу афсонага ҳурмат бажо келтиришни жуда ҳам истагандик.
Ўша дақиқалар ҳаяжонли бўлди. Айниқса, бир дақиқалик сукут. Унинг сурати ва рақами туширилган либосни майдон марказига қўйдик, сардорлик боғичини бириктирдик ва атрофида жам бўлдик.
Диего Марадонанинг даражаси бизни доим ҳайрон қолдиришда давом этади. Сабаби, бизга узоқ туюлган Ўзбекистонда ҳам унинг шу қадар ҳурматга сазоворлигини кўрдик.
Бир йил давомида мусобақаларсиз қолиб кетгандик, аммо жамоа ичида жуда яхши кайфият ҳукмрон эди. Майдонда ҳам, унинг ташқарисида ҳам бир оила сифатида шаклланганмиз. Менимча, ҳар икки учрашувда жисмоний томондан яхши ҳаракат қилдик. Узоқ масофани босиб ўтганимиз, икки кунда кетма-кет иккита учрашувда майдонга тушганимизга қарамай, майдонда яхши ҳаракат қилдик деб ўйлайман.
Бироқ ривожлантиришимиз керак бўлган муаммоларимиз бор ва буни англаб турибмиз. Бу нарсалар ҳар бир машғулот жараёнида яхшиланадиган жиҳатлар ҳисобланади. Шунга қарамай, кўрсатган ўйинимиз бизга ҳам, бош мураббийимизга ҳам маъқул келди. Натижа биз учун муҳим, чунки Аргентина доимо ғалаба учун майдонга тушади. Жаҳон чемпионати олдидан реал ҳолатимизни билишимиз керак. Мақсадимиз Жаҳон чемпионлигини ўзимизда сақлаб қолиш.
Албатта, яхши томонга ҳаракат қилишда давом этишимиз лозим. Ҳар бир учрашувга мослашган ҳолда, иложи борича ўйинлар сонини кўпайтиришимиз керак.
Жаҳон чемпионати ҳақида гапирадиган бўлсак, Жанубий Америкадаги саралаш баҳсларини аввалроқ ўтказганимизда бошқача ҳолатда етиб келган бўлардик. Аммо пандемия шароитида ФИФА 2020 йилги мусобақани 2021 йилга кўчирди. Шунинг сабабли, барча терма жамоалар бир хил ҳолатда етиб боради. Энди ҳеч қандай баҳоналар кетмайди. Биз оптимистмиз ва бизни кутиб турган ҳолатларга ҳам тез мослаша оламиз.
Иккинчи учрашувнинг 13-дақиқасида Матиас Росани шифокорлар майдондан ташқарига олиб чиқишди. Дастлабки қўйилган диагностга кўра, унинг ўнг тиззасида жиддий жароҳат борлиги аниқланди. Худди шундай жароҳат 2019 йилда унинг чап оёғида ҳам кузатилганди. Энди у Аргентинага қайтганидан кейин, операция қилинади.
Албатта, Матининг жароҳати ушбу сафар давомидаги энг кўнгилсиз ҳолат бўлди. Бу бутун жамоага ҳам салбий таъсирини кўрсатмай қолмади. Биз нафақат бир терма жамоа аъзолари, балки бир оиладекмиз. Бу спортда тез-тез учраб турадиган ҳодиса бўлсада, бизнинг кайфиятимизга салбий таъсир қилди. Чунки унинг узоқ ва қийин тикланиш жараёнидан хабардор эдик. Биз доим унинг ёнидамиз ва тезроқ тузалиб, майдонга қайтишини кутиб қоламиз”.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
