"Рома" бош мураббийи Луис Энрике "Кьево"га қарши Италия чемпионати 17-тур учрашувидан сўнг ўз фикрлари билан ўртоқлашаркан, жамоа сардори Франческо Тоттининг ўйинини алоҳида қайд этиб ўтди.
Учрашув 2:0 ҳисобида римликлар фойдасига ҳал бўлди. Ҳар иккала голни пенальтидан Франческо Тотти ўз ҳисобига ёзиб қўйди.
"Тотти энди мунтазам гол уришига умид қиламан. У бугун ўзи излаган нарсани топа олди. Биз учун у шунчаки сардор эмас, балки - ҳисоб-китобнинг бош нуқтасидир", деди испаниялик мутахассис.
"Мен бугунги ўйиндан жуда қониқиш ҳосил қилдим. Бундан ташқари, стадионнинг ишқибозлар билан тўлганини кўриш ҳам ёқимли бўлди. Мен жамоамизга ишонаман. Бугун биз қийин бир рақиб устидан ғалабага эришдик", деди "Рома" устози.
"Афсуски, Освальдо жароҳат олган. Аммо бизда унинг ўрнини боса оладиган футболчилар етарли. Энг муҳими, футболчиларимизда иштиёқнинг борлиги", дея қўшимча қилди "Рома" бош мураббийи Луис Энрике.
"Рома" айни вақтда 17 тур ўйинларидан сўнг, "Наполи" билан бир хил - 27 очко тўплагани ҳолда еттинчи ўринда бормоқда. Жамоа 18-турда "Катания" меҳмони бўлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).