Футбол оламининг олд агентларидан бири - Мино Райола ҳамиша диққат марказида. Бинобарин, италиялик|нидерландиялик воситачи энг сара юлдузларнинг кейинги тақдирига ўз хизмат доирасида таъсир кўрсатади. Хуллас, испаниялик журналистлар яқинда Райоланинг Монакодаги офисига ташриф буюришди. Мақсад - унинг истиқболи порлоқ мижози - Эрлинг Холанд трансфери бўйича аниқ маълумот олиш. Айтиш ўринли, Райола испаниялик меҳмонлар билан айнан уларнинг тилида мулоқотга киришди. Зеро, у нақ 6та тилда эркин гаплаша олади.
— Биринчи савол - қизиқ, Холандни қандай топгансиз?
— Уни илк марта телевизорда кўргандим, «Мольде» ўйинида. Кейин дарҳол унинг ортидан бордим. Одатда футболчиларни бир кўришда ёқтириб қолишим қийин. Хуллас, бунақаси кам учрайди. Холандни кўрганим заҳоти ўзимга пичирлагандим - «Бу ўша».
— Хўш, Холанд қандай футболчи?
— Барча буюклар каби оддий йигит. Футбол унинг учун шубҳасиз, биринчи ўринда. Роналду ва Ибрагимовичдек йигитлар футболни аллақачон юқори мақомга кўтаришди. Сизга айтсам, Холанд ҳаттоки, Дортмунддаги энг яхши ресторанлар қаерда эканлигини ҳам билмайди. Яъни янада яхши ўйнаш учун фақат ва фақат ўрганади, тинимсиз шуғулланади. Менимча, буюк чемпионлар - энг оддий инсонлар.
— Холанднинг отаси билан Мадрид ва Барселонага бориб, кўпчиликни ҳайрон қолдирдингиз...
— Бунинг асл сабабини айтсам, ишонмайсиз. Холанднинг отаси Марбельяга боришни истади - саёҳат учун. Ўзим ҳам сафарга чиқишни хоҳлаб қолдим. Ҳар ҳолда, Лапортани президентлик лавозимига қайтгани билан табриклашим, Мадридда баъзи ишларни ҳал қилишим керак эди. Хуллас, барчасини битта сафарда амалга оширдим. Умуман олганда, 99 фоиз ҳолатда қаерга боришимни ҳеч ким билмайди.
— Бу худди маркетинг юришига ўхшади.
— Барселонада папарацци туну кун қоровулчилик қилади. Менимча, ўша куни Каталонияда қайсидир актрисани кутишган экан. Чунки спортга алоқаси йўқ папарацциларни кўрдим. Лекин яширинишимга ҳожат йўқ. «Барса» директорлари ва Хосе Анхель Санчес («Реал» бош директори) билан кўп мулоқотда бўламан.
— Умуман, Холанд сизга қаерда ўйнашни исташини айтдими?
— Йўқ. Чунки айни пайт унинг нима дейиши унча қизиқ эмас. У барчасини каллам жойига тушган паллада айтиши керак. Шунда столи устига меню ташлаб, истаган «таом»ини муҳайё қилишим мумкин... Ҳозир эса бундай қилолмаймиз. Чунки «Боруссия» қатъий қарорини билдирди: «Эрлингни сотмаймиз».
— Дортмундликлар чиндан ҳам, Эрлингни ёзда сотмоқчи эмасмилар?
— Худди шундай дейишди. Энди кўрамиз, 1 сентябргача ўз сўзларида туришармикан...
— Нима, Холанд трансфери клубнинг ЧЛга чиқиш-чиқмаслигига боғлиқ эмасми?
— Ҳозир турли тахминларга боришимиз мумкин. Бугун «Боруссия»нинг расмий позицияси - Эрлингни сотмаслик. Лекин бу борада шахсий фикрим бошқачароқ. Агар барчани қониқтирадиган таклиф тушса, уни муҳокама қилиш керак.
— Ўзи кетиш учун энг маъқул вақт қандай танланади?
— Буни ҳеч ким билмайди. Қолиш - бир таваккал, кетиш ҳам шундай.
— Лекин Холанднинг кетиши тарафдорисиз.
— Буниси менинг фикрим, «Боруссия»ники эмас.
— Мижозингизнинг 2022 йили кетишини енгиллаштирадиган бирор ҳужжат борми?
— Футболчи менга ишондими, унинг сирларини қабргача олиб кетаман. Бордию, ўзи бу ҳақда гапиришни истаса, бемалол. Умуман олганда, бу муҳим эмас.
— Қанақасига?
— Футболчининг кетиш-қолиш хоҳиши шартномада кўрсатилган ҳар қандай банддан муҳим. Дейлик, Ибра шартномасида ҳеч қандай банд йўқ, Погбаникида ҳам. Испанияда эса қиймати 400 миллион еврога етадиган бандлар бор...
— Сизнингча, Холандга қайси чемпионат маъқул - АПЛми ёки Ла Лига?
— Эрлингни икки нарса қизиқтирмоқда - голлар уриш ва совринлар ютиш. Шубҳасиз, у танловда шу икки жиҳатга эътибор қаратади. Яширмайман, «Барселона» ёки «Реал» каби шонли тарихга эга ва айни пайт юқори савияда ўйнаётган клубдан таклиф тушса, рад этиш мушкул. «ПСЖ» ҳам ўзига хос топ-клуб, «Сити» ҳаракат қиляпти, «Ювентус» ҳамиша элит гуруҳда. Лигалар ҳам муҳим, албатта. «ПСЖ» катта клублар учун энг паст лигада ўйнайди, «Бавария» қизиқарли турнирда, аммо ҳамиша ғолиб бўлади. Испанияда эса ғолиблик учун 3та клуб курашади...
— «Реал» балки Холандни харид қилишга қодирдир...
— Буни аниқ билмайман. Чунки клуб балансини ўрганиб чиқмадим. Лекин фикримча, мадридликлар трансферни бемалол амалга оширишлари мумкин. Гап бошқа тарафда: «Реал» чиндан ҳам, Холандни сотиб олишни истайдими? «Барса»чи?
— «Барселона» бу борада бироз қийналса керак.
— Қийин, лекин иложи бор.
— Кўринишидан, «Реал» ёзда асосий эътиборини Мбаппега қаратади.
— Килианнинг бир йиллик шартномаси бор. «ПСЖ» икки йўлдан бирини танлаши мумкин. Яъни бир неча йил олдин Дортмунд «Боруссия»си Левандовски масаласида танлаган йўлни. Биринчи вариант - сотмаслик ва футболчининг бепул кетишига йўл қўйиб бериш. Иккинчи вариант - ҳозир сотиш.
— Холанднинг «Реал»га ўтиш-ўтмаслиги қайсидир маънода Мбаппега ҳам боғлиқ.
— Бир футболчининг келажаги ҳеч қачон бошқасинига боғлиқ бўлмайди. Ҳаммаси ўз қўлида. Катта клубларда буюк футболчилар бирга ўйнашлари мумкин. Масалан, Неймар ва Месси каби. Роналдиньо ҳам буюк футболчилар билан бирга тўп сурган. Шундай экан, Холанд ва Мбаппени 1та жамоада кўришимиз ҳам мумкин.
— Эрлингнинг ўзи буюк футболчилар қаторига қўшилиш ҳақида ўйлаяптими?
— Нафақат ўзи ўйлаяпти, балки бутун жаҳон. Зеро, йигитча барчасини амалда кўрсатиб қўйди.
— Унга қайси жамоалардан жиддий қизиқиш бор?
— Сизлар билган барча катта клублардан.
— Холанд энг кўп маош берадиган клубни танлайдими ёки...?
— Йўқ, йўқ... Футболчининг иқтисодий ҳолатини яхшилаш - менинг ишим. Келажак учун катта режа ёки лойиҳа бўлмаса, истиқболли футболчини харид қилишдан маъно йўқ. «Реал» ва «Барселона» бу борада анча ўзгарган. Ушбу клублар ҳаётида шундай давр кузатилдики, келажагини ўйламай, футболчиларни сотиб олаверишди. Натижада айрим истиқболли йигитлар ҳеч қандай наф келтиришмади.
— Холанд худди Погба сингари иқтисодий томондан катта фойда келтириши мумкинми?
— Менимча, фарқ бор. Вақтида «Олтин тўп» ютган, аммо маркетинг жиҳатидан фойда келтирмайдиган мижозим бор эди - Недвед. Мессининг боши ўрнатилган Балотелли гавдасини тасаввур қилинг. Қандай сифат!
— Погба нега ҳалигача «Реал»га ўтмади?
— Бу саволни Мадрид клубига бериш керак. Яширмайман, Полнинг ўзи ҳамиша «Реал»да ўйнашни истаган, хусусан, болаликдаги қаҳрамони Зидан туфайли.
— Бу трансфер амалга ошиши мумкинми?
— Аниқ айтолмайман. Иложсиз ишнинг ўзи йўқ, айниқса, футболда. Дейлик, «Реал» эртага Азарни Погба билан алмаштиришни истаб қолса, нима бўлишини билиш қийин.
— «Реал» ҳақида қандай фикрдасиз?
— Флорентино «Галактикос» брендини тузди - ажойиб ғоя. Футболчилар учун ушбу жамоада ўйнаш - фантастика. Лекин «Барселона» билан солиштирсак, «Реал» буюк футболчилар атрофида қурилган. «Барселона» эса ўзига хос фалсафага эга.
— Бу футболчиларнинг танловига таъсир қиладими?
— Менимча, ҳа. Агар Ибрагимович «Реал»га ўтганида, ҳозир ҳам унинг сафида ўйнаётган бўларди. Чунки Златан фалсафа учун яралмаган. У худди Бензема, Криштиану, ди Стефано ёки Пушкаш каби буюкликка мойил. «Барселона» Мессини нега қўйиб юбормайди? Чунки у клубнинг асосий фалсафаси ҳисобланади.
— Агентлик иши 30 йил ичида нечоғли ўзгарди?
— Бугунги футболчилар ноодатий иқтисодий салоҳиятга эгалар. Улар кўп жиҳатларда ҳимояга муҳтожлар. Бугунги футбол - бутун бир саноат.
— Агенти йўқ Мбаппе каби футболчилар ҳам бор...
— Яхшими ёки ёмон? Билмайман. Шу нарса аниқ - менинг мижозларим бахтлилар.
— Агентлар ҳақида асосий фикр - «Улар ҳеч нима қилмай, чўнтакларини тўлдиришади»...
— Нима дердим, нотўғри фикр. Минглаб футболчилар орасида айримларигина профессионал даражасига чиқишади ва мураккаб саноатнинг бир бўлагига айланишади. Ибрагимович «Барселона»га ўтган даврни эсланг.
— Ўшанда Гвардиола билан жанжаллашиб қолганмисиз?
— Йўқ. Гвардиола мен билан жанжаллашиб қолган.
— Ўзи нима бўлганди?
— Гвардиола - фантастик мураббий. Уни ҳеч қачон ёмон кўрмаганман. Чунки Пепни яқиндан билмайман. Шунчаки, Златанга муносабати оғир ботганди.
— Европа Суперлигаси ғоясига муносабатингиз...
— ФИФАга қарши урушни ҳамиша қўллаб-қувватлайман. Футбол учун ФИФАнинг кераги йўқ. Лекин Суперлиганинг битта жиҳати маъқул келмади - ЧЛни йўқ қилиш ғояси. Бу хато.
— Нимани назарда тутяпсиз?
— «Феррари» жамоаси «Формула-1»да 1та машина билан иштирок этиши мумкин. Иккинчиси «Ле-Ман»да қатнашади. Нима учун «Реал» ЧЛ ва Суперлигада тенг ўйнамаслиги керак? Бу футбол ўйнаш учун энг чиройли экспримент бўларди. Қолганини мухлисларга қўйиб бериш керак. Улар ўзлари истаган турнирни томоша қилаверадилар.
ЖАЪФАРАЛИ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
