Futbol olamining old agentlaridan biri - Mino Rayola hamisha diqqat markazida. Binobarin, italiyalik|niderlandiyalik vositachi eng sara yulduzlarning keyingi taqdiriga o‘z xizmat doirasida ta’sir ko‘rsatadi. Xullas, ispaniyalik jurnalistlar yaqinda Rayolaning Monakodagi ofisiga tashrif buyurishdi. Maqsad - uning istiqboli porloq mijozi - Erling Xoland transferi bo‘yicha aniq ma’lumot olish. Aytish o‘rinli, Rayola ispaniyalik mehmonlar bilan aynan ularning tilida muloqotga kirishdi. Zero, u naq 6ta tilda erkin gaplasha oladi.
— Birinchi savol - qiziq, Xolandni qanday topgansiz?
— Uni ilk marta televizorda ko‘rgandim, «Molde» o‘yinida. Keyin darhol uning ortidan bordim. Odatda futbolchilarni bir ko‘rishda yoqtirib qolishim qiyin. Xullas, bunaqasi kam uchraydi. Xolandni ko‘rganim zahoti o‘zimga pichirlagandim - «Bu o‘sha».
— Xo‘sh, Xoland qanday futbolchi?
— Barcha buyuklar kabi oddiy yigit. Futbol uning uchun shubhasiz, birinchi o‘rinda. Ronaldu va Ibragimovichdek yigitlar futbolni allaqachon yuqori maqomga ko‘tarishdi. Sizga aytsam, Xoland hattoki, Dortmunddagi eng yaxshi restoranlar qayerda ekanligini ham bilmaydi. Ya’ni yanada yaxshi o‘ynash uchun faqat va faqat o‘rganadi, tinimsiz shug‘ullanadi. Menimcha, buyuk chempionlar - eng oddiy insonlar.
— Xolandning otasi bilan Madrid va Barselonaga borib, ko‘pchilikni hayron qoldirdingiz...
— Buning asl sababini aytsam, ishonmaysiz. Xolandning otasi Marbelyaga borishni istadi - sayohat uchun. O‘zim ham safarga chiqishni xohlab qoldim. Har holda, Laportani prezidentlik lavozimiga qaytgani bilan tabriklashim, Madridda ba’zi ishlarni hal qilishim kerak edi. Xullas, barchasini bitta safarda amalga oshirdim. Umuman olganda, 99 foiz holatda qayerga borishimni hech kim bilmaydi.
— Bu xuddi marketing yurishiga o‘xshadi.
— Barselonada paparassi tunu kun qorovulchilik qiladi. Menimcha, o‘sha kuni Kataloniyada qaysidir aktrisani kutishgan ekan. Chunki sportga aloqasi yo‘q paparassilarni ko‘rdim. Lekin yashirinishimga hojat yo‘q. «Barsa» direktorlari va Xose Anxel Sanches («Real» bosh direktori) bilan ko‘p muloqotda bo‘laman.
— Umuman, Xoland sizga qayerda o‘ynashni istashini aytdimi?
— Yo‘q. Chunki ayni payt uning nima deyishi uncha qiziq emas. U barchasini kallam joyiga tushgan pallada aytishi kerak. Shunda stoli ustiga menyu tashlab, istagan «taom»ini muhayyo qilishim mumkin... Hozir esa bunday qilolmaymiz. Chunki «Borussiya» qat’iy qarorini bildirdi: «Erlingni sotmaymiz».
— Dortmundliklar chindan ham, Erlingni yozda sotmoqchi emasmilar?
— Xuddi shunday deyishdi. Endi ko‘ramiz, 1 sentyabrgacha o‘z so‘zlarida turisharmikan...
— Nima, Xoland transferi klubning CHLga chiqish-chiqmasligiga bog‘liq emasmi?
— Hozir turli taxminlarga borishimiz mumkin. Bugun «Borussiya»ning rasmiy pozisiyasi - Erlingni sotmaslik. Lekin bu borada shaxsiy fikrim boshqacharoq. Agar barchani qoniqtiradigan taklif tushsa, uni muhokama qilish kerak.
— O‘zi ketish uchun eng ma’qul vaqt qanday tanlanadi?
— Buni hech kim bilmaydi. Qolish - bir tavakkal, ketish ham shunday.
— Lekin Xolandning ketishi tarafdorisiz.
— Bunisi mening fikrim, «Borussiya»niki emas.
— Mijozingizning 2022 yili ketishini yengillashtiradigan biror hujjat bormi?
— Futbolchi menga ishondimi, uning sirlarini qabrgacha olib ketaman. Bordiyu, o‘zi bu haqda gapirishni istasa, bemalol. Umuman olganda, bu muhim emas.
— Qanaqasiga?
— Futbolchining ketish-qolish xohishi shartnomada ko‘rsatilgan har qanday banddan muhim. Deylik, Ibra shartnomasida hech qanday band yo‘q, Pogbanikida ham. Ispaniyada esa qiymati 400 million yevroga yetadigan bandlar bor...
— Sizningcha, Xolandga qaysi chempionat ma’qul - APLmi yoki La Liga?
— Erlingni ikki narsa qiziqtirmoqda - gollar urish va sovrinlar yutish. Shubhasiz, u tanlovda shu ikki jihatga e’tibor qaratadi. Yashirmayman, «Barselona» yoki «Real» kabi shonli tarixga ega va ayni payt yuqori saviyada o‘ynayotgan klubdan taklif tushsa, rad etish mushkul. «PSJ» ham o‘ziga xos top-klub, «Siti» harakat qilyapti, «Yuventus» hamisha elit guruhda. Ligalar ham muhim, albatta. «PSJ» katta klublar uchun eng past ligada o‘ynaydi, «Bavariya» qiziqarli turnirda, ammo hamisha g‘olib bo‘ladi. Ispaniyada esa g‘oliblik uchun 3ta klub kurashadi...
— «Real» balki Xolandni xarid qilishga qodirdir...
— Buni aniq bilmayman. Chunki klub balansini o‘rganib chiqmadim. Lekin fikrimcha, madridliklar transferni bemalol amalga oshirishlari mumkin. Gap boshqa tarafda: «Real» chindan ham, Xolandni sotib olishni istaydimi? «Barsa»chi?
— «Barselona» bu borada biroz qiynalsa kerak.
— Qiyin, lekin iloji bor.
— Ko‘rinishidan, «Real» yozda asosiy e’tiborini Mbappega qaratadi.
— Kilianning bir yillik shartnomasi bor. «PSJ» ikki yo‘ldan birini tanlashi mumkin. Ya’ni bir necha yil oldin Dortmund «Borussiya»si Levandovski masalasida tanlagan yo‘lni. Birinchi variant - sotmaslik va futbolchining bepul ketishiga yo‘l qo‘yib berish. Ikkinchi variant - hozir sotish.
— Xolandning «Real»ga o‘tish-o‘tmasligi qaysidir ma’noda Mbappega ham bog‘liq.
— Bir futbolchining kelajagi hech qachon boshqasiniga bog‘liq bo‘lmaydi. Hammasi o‘z qo‘lida. Katta klublarda buyuk futbolchilar birga o‘ynashlari mumkin. Masalan, Neymar va Messi kabi. Ronaldinyo ham buyuk futbolchilar bilan birga to‘p surgan. Shunday ekan, Xoland va Mbappeni 1ta jamoada ko‘rishimiz ham mumkin.
— Erlingning o‘zi buyuk futbolchilar qatoriga qo‘shilish haqida o‘ylayaptimi?
— Nafaqat o‘zi o‘ylayapti, balki butun jahon. Zero, yigitcha barchasini amalda ko‘rsatib qo‘ydi.
— Unga qaysi jamoalardan jiddiy qiziqish bor?
— Sizlar bilgan barcha katta klublardan.
— Xoland eng ko‘p maosh beradigan klubni tanlaydimi yoki...?
— Yo‘q, yo‘q... Futbolchining iqtisodiy holatini yaxshilash - mening ishim. Kelajak uchun katta reja yoki loyiha bo‘lmasa, istiqbolli futbolchini xarid qilishdan ma’no yo‘q. «Real» va «Barselona» bu borada ancha o‘zgargan. Ushbu klublar hayotida shunday davr kuzatildiki, kelajagini o‘ylamay, futbolchilarni sotib olaverishdi. Natijada ayrim istiqbolli yigitlar hech qanday naf keltirishmadi.
— Xoland xuddi Pogba singari iqtisodiy tomondan katta foyda keltirishi mumkinmi?
— Menimcha, farq bor. Vaqtida «Oltin to‘p» yutgan, ammo marketing jihatidan foyda keltirmaydigan mijozim bor edi - Nedved. Messining boshi o‘rnatilgan Balotelli gavdasini tasavvur qiling. Qanday sifat!
— Pogba nega haligacha «Real»ga o‘tmadi?
— Bu savolni Madrid klubiga berish kerak. Yashirmayman, Polning o‘zi hamisha «Real»da o‘ynashni istagan, xususan, bolalikdagi qahramoni Zidan tufayli.
— Bu transfer amalga oshishi mumkinmi?
— Aniq aytolmayman. Ilojsiz ishning o‘zi yo‘q, ayniqsa, futbolda. Deylik, «Real» ertaga Azarni Pogba bilan almashtirishni istab qolsa, nima bo‘lishini bilish qiyin.
— «Real» haqida qanday fikrdasiz?
— Florentino «Galaktikos» brendini tuzdi - ajoyib g‘oya. Futbolchilar uchun ushbu jamoada o‘ynash - fantastika. Lekin «Barselona» bilan solishtirsak, «Real» buyuk futbolchilar atrofida qurilgan. «Barselona» esa o‘ziga xos falsafaga ega.
— Bu futbolchilarning tanloviga ta’sir qiladimi?
— Menimcha, ha. Agar Ibragimovich «Real»ga o‘tganida, hozir ham uning safida o‘ynayotgan bo‘lardi. Chunki Zlatan falsafa uchun yaralmagan. U xuddi Benzema, Krishtianu, di Stefano yoki Pushkash kabi buyuklikka moyil. «Barselona» Messini nega qo‘yib yubormaydi? Chunki u klubning asosiy falsafasi hisoblanadi.
— Agentlik ishi 30 yil ichida nechog‘li o‘zgardi?
— Bugungi futbolchilar noodatiy iqtisodiy salohiyatga egalar. Ular ko‘p jihatlarda himoyaga muhtojlar. Bugungi futbol - butun bir sanoat.
— Agenti yo‘q Mbappe kabi futbolchilar ham bor...
— Yaxshimi yoki yomon? Bilmayman. Shu narsa aniq - mening mijozlarim baxtlilar.
— Agentlar haqida asosiy fikr - «Ular hech nima qilmay, cho‘ntaklarini to‘ldirishadi»...
— Nima derdim, noto‘g‘ri fikr. Minglab futbolchilar orasida ayrimlarigina professional darajasiga chiqishadi va murakkab sanoatning bir bo‘lagiga aylanishadi. Ibragimovich «Barselona»ga o‘tgan davrni eslang.
— O‘shanda Gvardiola bilan janjallashib qolganmisiz?
— Yo‘q. Gvardiola men bilan janjallashib qolgan.
— O‘zi nima bo‘lgandi?
— Gvardiola - fantastik murabbiy. Uni hech qachon yomon ko‘rmaganman. Chunki Pepni yaqindan bilmayman. Shunchaki, Zlatanga munosabati og‘ir botgandi.
— Yevropa Superligasi g‘oyasiga munosabatingiz...
— FIFAga qarshi urushni hamisha qo‘llab-quvvatlayman. Futbol uchun FIFAning keragi yo‘q. Lekin Superliganing bitta jihati ma’qul kelmadi - CHLni yo‘q qilish g‘oyasi. Bu xato.
— Nimani nazarda tutyapsiz?
— «Ferrari» jamoasi «Formula-1»da 1ta mashina bilan ishtirok etishi mumkin. Ikkinchisi «Le-Man»da qatnashadi. Nima uchun «Real» CHL va Superligada teng o‘ynamasligi kerak? Bu futbol o‘ynash uchun eng chiroyli ekspriment bo‘lardi. Qolganini muxlislarga qo‘yib berish kerak. Ular o‘zlari istagan turnirni tomosha qilaveradilar.
JA’FARALI tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
