Албатта футболдаги энг муҳим нарса бу гол. Голнинг ҳаяжони ва қувончига тенг келадиган нарса йўқ. Лекин, ўша голлар замирида футболчиларнинг узатмаси ҳам ётади. Кўпинча голлар ҳақида гапирамиз ва рекордларни ҳисоблаб чиқамиз. Бугун stadion.uz футбол тарихида энг кўп голли узатма амалга оширган 10 футболчи ҳақида сўз олиб боради.
10. Кевин Де Брюйне (Белгия) – 225 узатма
Кевин ва пас бу синонимлар десак муболаға бўлмайди. “Вольфсбург”дан “шаҳарликлар” таркибига келгач, белгиялик ростмана ажойиб ўйинлар кўрсатмоқда. Унинг бир-биридан чиройли узатмаларини кўрмаган мухлис бўлмаса керак. Агар “Манчестер Сити” хужумчилари КДБнинг ҳамма пасини голга айлантира олганда у сўзсиз биринчи бўлар эди. 2019-2020 йилги мавсумда белгиялик плеймейкер Англия Премьер-лигасида 20 та голли узатма амалга оширди ва у шу тариқа "Арсенал" афсонаси Терри Анрининг рекордини такрорлаган. Де Брюйне - гол + пас тизими бўйича бугунги кунда дунёнинг энг яхши ҳужумкор ярим ҳимоячиларидан бири. У клубда ҳам, терма жамоада ҳам мунтазам гол уради ва узатма беради: ҳар икки жамоада ҳам футболчи мутлақ етакчи.
9. Хави (Испания) - 230 голли узатма
Хави “Барселона”да ажойиб ўйинлар кўрсатган. У “кўк-анорранглилар” таркибида 20га яқин соврин юта олган. Шунингдек, Хави терма жамоа таркибида Жаҳон чемпионати ва Европа чемпионатида зафар қучган. Фаолияти якунида испаниялик Қатарнинг “Ас-Садд” клубида тўп тепган ва у ерда ҳам бир нечта голли узатма амалга оширган.
8. Сеск Фабрегас (Испания) - 241 голли узатма
Фабрегас ҳақиқий маестролардан бири ҳисобланади. У кўп гол урмайди. Аммо унинг паслари жамоаси учун доим фойда келтирган. “Арсенал”, “Барселона” ва “Челси” каби клубларда ўзини кўрсатган испанияликни ёмон кўрувчи мухлис бўлмаса керак. Унинг энг ёдда қоларли узатмаси бу 2010 йилги Жаҳон чемпионати финалида бўлган. Айнан у ўша ўйинда Иньестанинг голига узатмани амалга оширган эди.
7. Томас Мюллер (Германия) - 242 голли узатма
Томасга ортиқча таърифлар керак эмас. У авваллари топ голеадор эди. Аммо сўнгги йилларда Мюллер кўплаб голларга узатмалар бермоқда. “Бавария”нинг супер жамоага айланишида унинг ҳизматлари жуда катта бўлмоқда. 2019-2020 йилги мавсумда Томас Мюллер Бундеслиганинг энг кўп голли узатмаси бўйича рекорд ўрнатди - 33 ўйинда 21 та голли узатма берди + футболчи 8 та гол урди. Агар Томас яна бир-икки мавсум шу даражада ўйин кўрсатса, уни биз янада юқори поғонада кўришимиз шубҳасиз.
6. Франк Рибери (Франция) - 244 голли узатма
Франк “Бавария” сафида жуда ажойиб ўйинлар ўтказган. Агар Месси ва Роналду бўлмаганида у ҳеч бўлмаганда бир марта “олтин тўп”ни қўлга киритар эди. У ва Роббен қанотларда жуда фаол ўйнар эди. Аммо француз голдан кўра кўпроқ ассистни амалга оширар эди. Унинг юқори тезлиги ва майдонни кўра олиш қобилияти “Бавария”га жуда кўп бор фойдаси тегган. “Бавария” ўша йилларда “Барселона” ва “Реал”га қаршилик кўрсата оладиган кам сонли жамоалардан бири бўлган.
5. Анхель Ди Мария (Аргентина) - 248 голли узатма
Ди Мария энг омадли футболчилардан бири ҳисобланади. У Криштиану Роналду, Лео Месси, Неймар ва Мбаппе сингари юлдузлар билан бир жамоа сафида ҳарақат қилиш бахтини билади. Аммо у бундай юлдузлар орасида йўқолиб қолмади. Унинг узатмалари туфайли ҳам юқоридаги футболчилар кўплап голлар киритган. Анхель бир мавсумда энг камида 11 та голли узатма берган. Унинг энг муваффақиятли мавсуми 2013-2014 йилги мавсум ҳисобланади.
4. Месут Ўзил (Германия) - 256 голли узатма
Сўнгги йилларда Артета қадрламаган юлдуз футбол тарихидаги энг яхши плеймейкерлардан бири ҳисобланади. У голли узатмалар амалга ошириш бўйича энг яхши ярим ҳимоячи. Шундан билишингиз мумкинки, олдиндаги 3 футболчининг ҳаммаси хужумчи. Ўзил ўзининг “олтин даври”ни “Реал Мадрид” таркибида ўтказган. Умуман футбол оламида уни ёмон кўрувчи мухлис топилмаса керак. Унинг бир хислатини ҳамма ҳурмат қилар эди. Гол уриш учун ўзида имконият бўлса ҳам шерикларига узатма бериш ҳамманинг ҳам қўлидан келавермайди. Ўзил учун голдан кўра пас муҳимроқ ҳисобланар эди.
3. Криштиану Роналду (Португалия) - 265 голли узатма
Роналду кўплаб гол уришдан ташқари анча голли узатмани ҳам ўз ҳисобига қайд этиб қўйган. Унинг 265 бор голли узатма амалга оширганига ишониш қийин, аммо шундай қилган. Роналду “Реал” таркибида кўплаб ассистларни амалга оширган. Албатта ҳозирги кун футболида икки буюк футболчи бўлса уларнинг бири сўзсиз Криштиану. Роналдунинг жисмоний ҳолати ҳамон аъло даражада эканлигини ҳисобга олсак, у яна бир неча мавсум футбол ўйнай олади. Балки у ўзининг ўрнини янада кўтара олар. Роналду бу кўрсаткич бўйича ҳозирча учинчи ўринни эгаллаган.
2. Луис Суарес (Уругвай) - 268 голли узатма
Луис энг яхши хужумчилар қаторига кира олади. У Месси ва Неймар билан футбол тарихидаги энг дахшатли триони ташкил этган. Суареснинг асосий вазифаси гол киритиш бўлса-да, унинг голли узатмалари ҳам талайгина. Албатта бунга сабаб у “Барселона” таркибида тўп тепганлиги. Роналду ва Суарес тез-тез ушбу рейтингдаги иккинчи ўринни алмашиб туради. Луисда рақобат бор. Демак ҳали у иккинчи ўринни сақлаб қолиш учун курашиши керак.
1. Лионель Месси (Аргентина) - 335 голли узатма
Балки мақола бошидаёқ сиз биринчи ўрин соҳиби ким эканлигини англаб улгургандирсиз. Таъкидлаш жоизки, Леонинг бу рейтингдаги ўрнини яқин орада ҳеч ким тортиб ололмаса керак. У кўплаб гол уришдан ташқари анча кўп голли узатмани ҳам амалга ошириб улгурган. Уни бекорга даҳо дейишмайди. Фаолиятининг асосий қисмини “Барселона”да ўтказган футболчини бу кўрсаткичи шунчаки фантастика. Келинг, Мессини яна бир ном билан атаймиз “ассистентлар қироли”.
Миржалол Пардабоев тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
