Қарийб бир ойдан сўнг Қатарда араб мамлакатлари кубоги старт олади. 16 жамоа ғолиблик учун курашадиган турнир орқали мухлислар ЖЧ-2022да фойдаланиладиган стадионларни ўзлари учун аввалдан кашф этишлари мумкин. FIFA.com мусобақа стартига 31 кун қолган паллада тескари саноқни бошлаб, мавжуд рақамларга доир фактлар билан таништирди.
31 - Жазоир термасининг мағлубиятсиз ўйинлари шунчага тенг. Ҳайратланарли кетма-кетлик 2018 йилнинг октябрида бошланган.
30 - Ҳамза ал Дардурнинг Иордания термасидаги голлари сони. 12 октябрда Ўзбекистон термасига қарши ўртоқлик ўйинида сўнгги икки йилдаги илк голини урган фахрий футболчи миллий жамоанинг амалдаги тенгсиз тўпурари Ҳасан Абдул Фаттоҳга тенглашиб олди.
29 - Миср термаси Муҳаммад Салоҳнинг ёши, у айни пайт ажойиб формада. «Фиръавнлар» ҳамда «Ливерпуль» клуби ҳужумчиси - жорий мавсум Премьер-лигада энг яхши тўпурар бўлиб турибди. Унинг ҳисобида 11та ўйинда 10та гол бор.
28 - Баҳрайн термасининг ЖЧ-2022 саралаши сўнгги баҳсларида қатнашган жамоасидаги ўртача ёш. Кўриниб турибдики, тажриба биринчи ўринга қўйилган.
27 - ФИФА рейтингида худди шу ўринни эгаллаб турган Тунис термаси мусобақа қатнашчилари орасида етакчи ҳисобланади.
26 - Уммонлик Аҳмад Муборак 2019 йил 28 августда Яман термасига қарши баҳсда ўз мамлакати учун сўнгги бор гол урганидан кейин шунча ой ўтди. 180та ўйинда 23та тўп киритган Уммон миллий жамоасининг 36 ёшли афсонаси ҳали халқаро фаолиятини якунламоқчи эмас.
25 - Саудия Арабистони термаси бош мураббийи Эрве Ренарнинг 2016-2019 йиллар мобайнида эришган ғалабалари сони. Ўшанда у Марокаш миллий жамоасини бошқарган, ҳозиргача бу фаолиятининг энг ёрқин чўққиси ҳисобланади. Тақдир тақозосини қарангки, Ренар жамоаси «С» гуруҳида айнан марокашликларга қарши баҳс юритади.
24 - 30 ноябрдан 7 декабргача Араб кубоги гуруҳ босқичида ўтказиладиган ўйинлар сони. Унинг якунига кўра, чорак финалга 8 жамоа чиқади.
23 - Мусобақада қатнашадиган жамоалар сони. Дастлабки саралаш босқичида еттита терма курашни якунлади: Комор ороллари, Жибути, Қувайт, Ливия, Сомали, Жанубий Судан ва Яман.
22 - Баҳрайн термасининг Қатар-2022 саралаш баҳслари учун эълон қилган 23талик рўйхатидаги ички чемпионатда тўп сурадиган футболчилар сони. Фақатгина Саид Дхия мамлакат ташқарисида - Қувайтда тўп суради.
21 - Ливан термаси юлдузи ва сардори Ҳасан Маатукнинг ўз мамлакати жамоасидаги 91та ўйинда урган голлари сони. Ливанликлар тарихидаги энг сермаҳсул футболчи, энг яхши тўпурар ҳисобланган Маатук Араб кубоги-2021да жамоасининг етакчиси бўлиши шубҳасиз.
20 - Тунислик Макрам Дабубгача Фаластин термасида ишлаган мураббийлар сони. Рақамнинг камтарона тус олишига сабаб, Фаластин миллий жамоаси 1998 йилга келибгина ФИФА томонидан тан олинган.
19 - Араб кубоги-2021 шунча кун мобайнида давом этади - 2021 йилнинг 30 ноябридан 18 декабригача.
18 - Араб кубоги-2021 арафасида Қатар термаси ўтказган ўйинлар сони. Мезбонлар агар мусобақа финалига чиқишса, ушбу рақамларни 24га етказишлари мумкин.
17 - Бранко Иванкович Уммон термаси бошқарувини қўлга олгани (2020 йилнинг январи)дан буён ўтказган ўйинлари сони. Умумий натижалар - 12 ғалаба, 2 дуранг, 3 мағлубият.
16 - Араб кубоги-2021 финал босқичида қатнашадиган жамоалар сони. Иштирокчилар 4 гуруҳга тўрттадан бўлинган.
15 - Дастлабки раундда урилган голлар сони. Энг йирик ҳисоб Фаластин - Комор ороллари учрашувида қайд этилди - 5:1.
14 - Воҳид Халилходжичнинг 2019 йили Марокаш термасини қабул қилиб олишдан аввал ишлаган барча жамоалари сони. У келганидан сўнг марокашликлар фақат битта ўйинда - 2019 йилнинг октябрида Габонга 2:3 ҳисобида ютқазишди.
13 - Бирлашган Араб Амирликлари термаси ҳужумчиси Али Мабҳут ЖЧ-2022нинг Осиё қитъаси саралашида шунча тўп киритди.
12 - Саудия Арабистони ЖЧ-2022 саралаши учинчи раундида шунча очко тўплади. «Яшил лочинлар» ҳозирча мусобақанинг мазкур босқичида 100 фоизли натижа қайд этган ягона жамоа бўлиб турибди.
11 - Араб давлатлари кубогининг бу йилги турнирида фаолият юритадиган европалик мураббийлар сони: Феликс Санчес (Испания; Қатар термаси), Жерар Бушер (Франция; Мавритания термаси), Юбер Велуд (Франция, Судан термаси), Карлуш Кейруш (Португалия; Миср термаси), Эрве Ренар (Франция; Саудия Арабистони термаси), Дик Адвокат (Нидерландия; Ироқ термаси), Берт ван Марвейк (Нидерландия; БАА термаси), Хелио Соуза (Португалия; Баҳрайн термаси), Воҳид Халилходжич (Босния ва Герцеговина; Марокаш термаси), Иван Гашек (Словакия, Ливан термаси), Бранко Иванкович (Хорватия; Уммон термаси).
10 - Қатар термаси устози Феликс Санчеснинг афсонавий «Барселона» академияси - Ла Масияда фаолият юритган йиллари.
9 - Баҳрайн термаси тарихидаги энг йирик мағлубият шу сон фарқи билан юзага келганди - 1:10. 1966 йилнинг 5 апрелида Ироқ миллий жамоасига худди шундай ҳисоб билан имконият бой берилган.
8 - Жазоир термаси бош мураббийи Жамол Бельмади шунча йил мобайнида Қатарда фаолият юритган. 2010-2012 йилларда «Лаҳвия»ни бошқарган бўлса, 2014-2015 йилларда Қатар термасида ишлаган. Кейин эса, 3 йил «Ал-Дуҳайл» футболчиларига устозлик қилган. Демак, ушбу мутахассис мусобақа давомида ўзини уйдагидек ҳис қилса бўлаверади.
7 - Қатар термасининг сўнгги ғалабасидан кейин ўтказган ўйинлари сони. Ўшанда қатарликлар Concacaf Gold Cup 2021 турнири чорак финалида Сальвадорни 3:2 ҳисобида мағлубиятга учратишганди.
6 - Араб мамлакатлари кубоги-2021 ўйинлари ўтказиладиган стадионлар сони. Шунингдек, ушбу ареналар келгуси йили жаҳон чемпионати баҳсларига ҳам мезбонлик қилади.
5 - Тунис термаси гол ўтказмаган ўйинлари сони.
4 - Судан термаси бош мураббийи Юбер Велуд бошқарган Жазоир клублари сони. Ушбу мутахассис «D» гуруҳидаги рақиблари сафида эски танишларини учратиши мумкин.
3 - «В» гуруҳидан жой олган Тунис ва Мавритания термалари сўнгги икки йилда шунча марта тўқнаш келишди. Уларнинг иккитасида тунисликлар зафар қучишган бўлса, битта баҳс дуранг билан якунланган.
2 - Мусобақада ўз вакиллари билан қатнашадиган конфедерациялар сони: ОФК ва АФК.
1 - Қатар ва Баҳрайн термалари - Араб кубоги-2021нинг дастлабки учрашуви қатнашчилари.
А.АБДУВАЛИХЎЖАЕВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
