Суперлиганинг 26-туридан ўрин олган “Навбаҳор” – “Қўқон-1912” учрашувидан кейин меҳмонлар бош мураббийи Бахтиёр Ашурматов ўйин ҳақидаги фикрлари билан ўртоқлашди.
- Ўйиндан аввал ҳам “Навбаҳор” билан ўйин дерби мақомига эга бўлганлиги сабабли, қайси жамоа ютишидан қатъий назар, жанговар ўйин бўлиши, футболчилар охиригача курашишини айтгандим. Гапларим ўз исботини топди. Иккала жамоа ҳам ўйин сўнгигача чиройли футбол намойиш этишди. Йигитлар айтган кўрсатмаларимни тўғри бажаришди ва ўйлайманки, бугун ҳаққоний ғалабага эришдик. “Навбаҳор” футболчиларига ҳам миннатдорчилик билдирмоқчиман. Чунки улар 1:3 ҳисобида ютқазаётганда ҳам мухлислари учун астойдил курашишди, ишқибозлар ҳам чиройли футбол гувоҳига айланишгани сабабли охиригача жамоаларни қўллаб-қувватлашди. Жамоамиз номидан уларга миннатдорчилик билдираман, доимо соғ-саломат бўлишсин. Ва албатта, Қўқондан узоқ йўл босиб келиб, бизга ишонишгани учун катта раҳмат. Ўйлайманки, кейинги мавсум “Навбаҳор” ҳам, “Қўқон-1912” ҳам ўз олдига янада юқорироқ вазифаларни қўяди, ҳар икки жамоа мухлислари жамоалари юқори ўринларни эгаллашига муносиб, - дейди Бахтиёр Ашурматов.
- Жамоангиз биринчи даврада “Навбаҳор”га ютқазиб қўйишгани сабабли ҳам, бугун футболчилар ўзгача иштиёқ билан тўп суришдими?
- Гапнинг очиғи, бугунги ўйин шахсан мен учун ҳис-ҳаяжонга бой ўйин эди. Чунки бундан аввал “Навбаҳор”да ишлаганман, бу жамоа ва унинг мухлислари, ўша ишлаган йилларим қалбимда чуқур из қолдирган. “Навбаҳор” мухлисларига нисбатан меҳрим баландлигини ҳеч қачон яширмаганман. Шу сабабли, бугунги учрашув мен учун принципиал аҳамиятга эга эди. Биринчи даврада бой берилган ўйин учун реванш олишга интилдик, Худога шукр, мухлисларимиз ва раҳбарларимиз олдида юзимиз ёруғ бўлди. Ўйин охирида бўлган вазият учун “Навбаҳор” мухлисларидан узр сўрайман. Футболчимизга ҳам танбеҳ бердик, ёшлик қилиб бироз провокацион ҳаракат қилиб қўйди. Ўйлайманки, кейинги ўйинларда жамоамиз томонидан бундай ҳаракатлар қилинмайди. Қўқон ва Наманган жамоалари, мухлислари ҳурматга муносиб, шу боис, кейинги ўйинлар бунданда чиройли ўтади, деб ўйлайман.
- “Қўқон-1912”нинг жорий мавсумдаги натижаси бўйича фикрингиз қандай?
- Натижадан қониқмаганлигимиз аниқ, чунки бу мавсум водий футболи учун муваффақиятсиз бўлди. Биз ҳам, “Навбаҳор” ҳам катта ниятлар билан мавсумни бошлагандик, лекин афсуски, ўз майдонимизда жуда кўп очко йўқотишимиз сабабли юқори ўринларни эгаллай олмадик. Мавсумни биз учун қониқарсиз деб айтиш мумкин. Афсуски, “Турон” ва “Андижон” жамоалари Суперлигани тарк этишди. Менимча, водий жамоалари ҳам юқори ўринлар учун курашадиган даражага чиқса, бундан чемпионатимиз савияси янада ошади. Зеро, водийлик мухлислар футболни жуда яхши кўришади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
