Яқинда немис футболи жамоатчилигини кутилмаган янгилик ларзага келтирди. Шу пайтгача Мёнхенгладбахнинг «Боруссия» клубида спорт директори вазифасини адо этиб келган чинакам афсона - Макс Эберль жамоани тарк этди. Қуйидаги материал «Боруссия-Парк»да ажойиб лойиҳани воқеликка айлантирган фидойи мутахассис фаолиятига бағишланган.
Ортда қолган 20 йилдан кўпроқ вақт, аниқроғи, 8429 кундан кейин 48 ёшли мутахассис фаолиятига парда тортди. Унинг даврида «тойчоқлар» сафидан етишиб чиққан Марко Ройс, Данте, Хуан Аранго, Марк-Андре тер Штеген, Гранит Жака каби кўпгина футболчилар машҳур «айғирлар»га айландилар. Жамоа эса йил сайин қаддини ростлаб, элитадаги ўрнини сақлаб қолишга интиладиганлар гуруҳидан ўртамиёналар сафига кўтарилди. Кейин «Боруссия» совринли ўринлар учун курашадиган асосий рақобатчилар даврасида еврокубок мусобақаларининг доимий иштирокчисига айланди. Шу тариқа жамоа ва мухлисларда ўтган асрнинг 70-йилларидаги порлоқ даврни тиклаш умиди пайдо бўлди. Макс Эберль ўзининг ўринли қарорлари билан муваффақиятга сезиларли ҳисса қўшди.
Футболчи сифатида «Бавария», «Бохум» ва «Гройтер-Фюрт» шарафини ҳимоя қилган бўлажак мутахассис фаолиятини айнан «тойчоқлар» сафида якунлагач, янги соҳага 2005 йилда ёшлар академиясининг координатори мақомида кириб келди. 2008 йилда собиқ футболчини спорт директори лавозимига таклиф этишди.
Лекин Гладбахда Макс фақат кадрлар масаласини муваффақиятли ҳал этиш билан кифояланиб қолгани йўқ, у бир қатор стратегик режаларни амалга оширишда ҳам фаол иштирок этди. Макс Эберль давридаги дастлабки тўлиқ мавсумдан бошлаб «Боруссия» ўртача 52тадан гол урди. Ундан аввалги 12 мавсумнинг ўртача кўрсаткичи 39та голга тенг бўлганди. Собиқ спорт директори давридаги 12 мавсумни «тойчоқлар» ўртача 12-поғонада якунлаган бўлсалар, янги спорт директори уларни ўртача 7-ўринга олиб чиқди. Охирги 12 мавсумнинг 6тасини «Боруссия» етакчи олтиликда якунлаганди. Шу мавсумларда жамғарган очколар бўйича эса, жамоа фақат «Бавария», дортмундлик номдош рақиби ва «Байер»ни олдинга ўтказиб юборган ҳолда, 668 очко билан 4-ўриндан жой олди.
Шунингдек, Эберлнинг «Боруссия»си 4 марта ЕЧЛда иштирок этиб, 3 марта гуруҳ босқичида тўп суришга муваффақ бўлди. Бундан ташқари, жамоа ЕЛда 3 мавсум тўп сурди, 2020|2021 йиллар мавсумида «Реал», «Интер» ва «Шахтёр» жой олган «ўлим гуруҳи»да нимчорак финал йўлланмасини қўлга киритди. Мазкур натижа Макс Эберль учун спорт директори лавозимидаги энг юксак кўрсаткич сифатида ажойиб совға бўлди.
Гладбахдаги фаолияти давомида Эберль 7 нафар мураббий билан ҳамкорликда иш юритди: Ханс Майер, Михаэль Фронтцек, Люсьен Фавр, Андре Шуберт, Дитер Хеккинг, Марко Розе ва Ади Хюттер. Бу борада спорт директори мантиқан тўғри қарорларни қабул қилиш билан жамоанинг босқичма-босқич ривожланишини таъминлай олди.
Макс Эберлнинг муваффақиятини таъминлаган яна бир севимли қуроли - сайқал берилмаган ноёб иқтидорларни ўз вақтида аниқлай олиш хусусияти. Айнан шу фазилати туфайли, у Марко Ройсни кашф этганди. «Ханс Майернинг менга берган саволини яхши эслайман: «Макс, 4та гол урган 2-Бундеслига ўйинчиси учун 800 минг евро кўп эмасми?» Ханснинг шундай мазмундаги мулоҳазасидан сўнг, сизда мўлжаллаётган режангизга шубҳа пайдо бўлиши аниқ. Бироқ Марко ишончимни қозонган, ички сезги улкан салоҳият соҳибини харид қилаётганимизни айтиб, менга далда берганди. 800 минг евро ўша пайтда «Гладбах» учун катта маблағ ҳисоблансада, фикримдан қайтмадим», - деганди Эберль.
Кейин нима бўлганини футбол мухлислари яхши биладилар. 2011 йилда жамоани қуйи лигага тушиб кетишдан қутқариб қолган Ройснинг трансфер қиймати геометрик прогрессияда қимматлаша бошлади, 12 ойдан кейин эса у «Боруссия»ни 4-ўрин соҳибига айлантирди. 2012 йилнинг ёзида «тойчоқлар» ўз халоскорлари билан хайрлашишга мажбур бўлдилар. Чунки Марко қадрдон Дортмундга қайтишга қарор қилганди. Бир пайтлари «қовоғарилар» рад этган озғин қувғиндининг қисқа вақт ичида Бундеслига мега-юлдузига айланишига Эберлнинг зийраклиги ва қатъияти сабаб бўлганди.
Гладбахликлар спорт директорининг навбатдаги зафарли юриши бироз «соя»да қолиб кетган бўлсада, ўз аҳамиятини йўқотмайди. 2009 йилда «Мальорка»дан келган Хуан Аранго «Боруссия-Парк»да анча вақт ўз салоҳиятини юзага чиқара олмади. Ҳатто жамоанинг ўша даврдаги бош мураббийи Люсьен Фавр ҳам унга бўлган ишончни бутунлай йўқотганди. Лекин венесуэлалик футболчи кейинчалик ўзининг ажойиб ўйинлари ва голлари билан шубҳага ўрин қолдирмади.
Арангонинг Гладбахдаги дебют голи ўта чиройли услубда амалга оширилганди. Агар Мануэль Нойер бўлмаганида, Марк-Андре тер Штеген узоқ вақт Бундестим дарвозасини қўриқлаган бўларди. Гарчи Эберль унинг харид қилинишига алоқадор бўлмасада, Люсьен Фаврга асосий таркибнинг иккинчи дарвозабони ролига тавсия этганди. «У Германиядаги энг моҳир киперлардан бири», - Макс Эберлнинг берган баҳосини тер Штеген «Кёльн»га қарши Рейн дербисидаги ишончли ўйини (5:1) билан исботлади. Марк-Андре сал аввалроқ, 17 ёшгача бўлган терма жамоа сафида қитъа чемпионатида иштирок этган ва 5 учрашувда атиги 2та тўп ўтказиб юбориб, ғолибликни таъминлаганди.
Барселоналиклар таклифини рад этишнинг иложи йўқлигини аввалдан ҳис этган Макс жаҳон миқёсидаги янги юлдузни кашф этди. Унинг истеъфосидан ижтимоий тармоқлар орқали хабар топган Гранит Жака кўплаб касбдошлари қаторида Эберлга ўз миннатдорчилигини изҳор этди. 2012 йилда «Базел»дан харид қилинган швейцариялик футболчи 4 йилдан кейин «Арсенал» сафига ўтиб, клубига катта даромад келтирганди. «Гладбахдаги шарт-шароитлар учун Максни жуда ҳурмат қиламан. У инсон ва менежер сифатида ўта самимий ва тўғрисўз, доимо ўйинчиларга ёрдам беришга шай. Расман у - спорт директори, аммо ҳаётда... Мен уни футболни миридан сиригача пухта ўзлаштирган, керакли паллада тегишли қарорларни қабул қиладиган буюк шахс сифатида ҳурмат қиламан», - деганди Жака 2020 йили.
Гладбахда Макс ёрқин фаолият юритди. Бироқ Жаканинг фикрича, у ҳар қандай бошқа жамоада ҳам шундай муваффақиятга эриша олишига шубҳа йўқ: «У футбол оламини яхши билади, клуб ва жамоаси эҳтиёжларини аниқ ҳис этади. Қисқаси, Макс - ўз вазифасини аъло даражада маромига етказадиган мутахассис».
Ҳа, Бундеслига ўта ноёб функционердан жудо бўлди. Қизиқ, бу йўқотиш Гладбахнинг «Боруссия»сига қандай таъсир этаркин?
МУҲАММАДСОДИҚ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
