Аргентиналик афсонавий голеадор - Серхио Агуэро 2021 йилнинг 15 декабрида юрак тизимидаги муаммолар туфайли футболчилик фаолиятига нуқта қўйганини эълон қилишга мажбур бўлганди. Хуллас, ўтган ёзда «Барселона» билан шартнома тузган «Кун» янги клубида атиги 5 марта майдонга тушди. Аслида у Каталония гранди сафида қадрдон дўсти Лионель Месси билан ёнма-ён тўп суриш ниятида эди. Бироқ «Барса» Леога янги келишув таклиф этолмади ва шу тариқа мавсум Агуэро учун қандайдир кўнгилсиз бошланди. Шунга қарамай, бунга қадар «Индепендьенте», «Атлетико» ва «Манчестер Сити» клубларида жавлон урган Серхио «Барселона»да ҳам ўзини кўрсатишга улгурди, жумладан, «Реал» дарвозасини нишонга олди. Кейин ҳаммага маълум нохушлик рўй берди ва аргентиналик ҳужумчи бутсаларини михга илишдан ўзга чора тополмади. «Кун» яқинда «Твиттер» орқали мухлислар билан мулоқотга киришиб, улардан тушган турли-туман саволларга ошкора жавоб қайтарди. Хусусан, вақтида Лионель Месси билан жанжаллашиб қолганини ҳам яширгани йўқ.
- Серхио, энди кузатувчи сифатида баҳо бериш имкониятига эгасиз: жорий мавсум ЧЛда қайси жамоа ғолиб чиқади, сизнингча?
- Умид қиламанки, кубок «Манчестер Сити»га насиб этади.
Агуэро «шаҳарликлар» либосида 10 йил тўп суриб, кўплаб совринлар ютди, клуб тарихидаги энг яхши тўпурар сифатида ёрқин из қолдирди, аммо ЧЛда зафар қучиш унга армон бўлиб қолди. Серхионинг айтишича, «Сити» соҳиблари ва мухлислари нуфузли турнирни забт этишдан ҳали умид узишмаган, ҳозирги «Сити» ЧЛ кубогига муносиб. Қолаверса, шунча ҳаракат охир-оқибат, натижа бериши керак.
- Айтингчи, футболда айнан қайси ҳимоячига қарши тўп суришда кўпроқ қийналгансиз?
- Шубҳасиз, Жон Террига қарши бориш мушкулот туғдирган.
Қизиғи, Кун 2011 йили «Челси» сафига қўшилиши ва Террининг клубдошига айланиши мумкин эди. Бироқ бу келишувга айнан «кўклар»нинг собиқ сардори қарши чиққан. «Челси» кейинчалик «Ливерпул»дан Фернандо Торресни харид қилди, Жон эса ўз қарорини оддийгина изоҳлади: «Ҳа, Агуэрони «Челси»да кўришни истамадим. Чунки унинг услуби жамоамизга мос келмасди. Ўша вақт еврокубокларда «Кун»га қарши майдонга тушгандим ва у менда кучли таассурот қолдирмади. Лекин аргентиналикнинг трансферига қарши чиққаним клуб қарорига нечоғли таъсир кўрсатганини билмайман. Қисқаси, ўшанда жамоамизнинг ўзгача услубга таянадиган ҳужумчига эҳтиёжи борлигини ўйлаб, бу борада фикримни очиқ баён этгандим. Менимча, «Кун» «Челси»да ўз ўрнини тополмасди».
- Агуэро замонавий футболчилардан қай бирини кўпроқ ёқтиради?
- Фоденни. Ҳа, Филга гап йўқ, у мен учун энг суюкли футболчи.
Дарҳақиқат, Фил Фоден фақат Хосеп Гвардиола эмас, Агуэронинг ҳам ёқимтойи. У «Кун» билан ёнма-ён тўп суриб, бебаҳо тажриба тўплади. Энди Фоден - жаҳон футболидаги энг қимматбаҳо ёш футболчи.
- Вақтида видеоўйинлар туфайли Месси билан жанжаллашган экансиз...
- Ҳа, бу ҳақиқат. Умуман, ўзаро баҳслар натижаси туфайли баъзан кун бўйи бир биримиз билан гаплашмасдик. Бир сафар қаттиқ тортишганимиз ҳам рост, аммо бу арзимас ҳолат...
Серхио - видеоўйинларнинг ашаддий ишқибози, у Twitch платформасида ўз жамоасини ҳам яратган. «Кун» кўпинча видео-ўйинларда айнан Месси билан куч синашади. Аслида иккиси қадрдон дўст. Лекин видеоўйинлар туфайли баъзан келишолмаслик ҳолатлари ҳам юзага келади.
- АПЛдан ташқари, Ла Лигада ҳам етарлича голлар ургансиз. Улардан энг муҳимини айта оласизми?
- Менимча, «Реал»га қарши ўйинда урган сўнгги голим Ла Лигадаги энг яхшиси бўлса керак. Чунончи, ўша паллада тез орада футбол билан хайрлашишимга тўғри келишини билмасдим. Шундай экан, бу гол ҳамиша энг аҳамиятлиси бўлиб қолади.
Маълумот учун, Агуэро «Атлетико» таркибида Ла Лиганинг ўзида 74та гол урган. Табиийки, улар орасида ўта чиройли ва муҳимлари ҳам етарли.
- Серхио қайси ичимликни биринчи ўринга қўяди?
- Қаҳвани. Афсуски, юрак хасталиги туфайли маълум муддат қаҳва ичишдан тийилишим керак.
Таъкидланишича, шифокорлар унинг қаҳва ичишини қатъиян тақиқлаб қўйишган. Тўғри, бу вақтинча парҳез.
- Айтишларича, Аргентина терма жамоаси йиғинлари чоғи фақат Месси билан битта хонада яшаган экансиз...
- Бу оддий ҳол-ку. Ахир Европада жуда кам кўришардик ва терма жамоа йиғини вақтни бирга ўтказиш учун имконият эди. Тўғри, баъзан ўзаро тортишиб қолардик. Айниқса, жамоамиз енгилган пайт ўз-ўзидан асабийлашардик. Ўзингиз ўйланг, мағлубият кимга ёқади?
Агуэро анча ҳазилкаш йигит, яна доимо тик гапиради. У бир сафар Лео билан хонани қандай тақсимлашганини айтиб берганди: «Очиғи, Месси ўта инжиқ йигит. Биз ажралмас жуфтдекмиз. Одатга кўра, ҳар доим телевизорни ўчирмаган ҳолда ухлаб қоламан. Эрталаб эса Леодан роса танбеҳ эшитаман. Мисол учун, меҳмонхонага соат 19:30да қайтамиз, кечки овқат соат 21:00да, орада етарлича бўш вақт бор. Лео хонага кириши билан душга йўл олади ва вақтида тайёр бўлади. Мен эса телефон титкалаб ўтираман. Шунда Лео минғирлайди: «Ҳой бола, соат 21:00да кечки таом, атиги 30 дақиқа қолди». Мен эса телефондан бошимни кўтармайман. Табиийки, бундан Мессининг ғазаби қайнайди: «Атиги 10 дақиқа қолди, 1 соатдан бери телефондан бўшамайсан. Ҳар доим сен туфайли кеч қоламиз...».
- Фаолиятингизга нуқта қўймаслик имконияти ҳам бормиди?
- Футболдан кетишимни тақозо этган муаммо қаердан пайдо бўлганини ҳалигача тушонолмаяпман. Бошқалар ҳам билишмаса керак. Эҳтимол, бу коронавирус ёки эмлашнинг асоратидир. Ҳақиқат шуки, жиддий хасталикка чалиндим, энди саломатлигим хусусида қайғуришим лозим. Ҳа, олдин ҳам юрак тизимига боғлиқ арзимас муаммо сезиларди, эҳтимол, бу навбатдагисидир...
Ҳа, Агуэро футболдан воз кечишига олиб келган муаммо қандай пайдо бўлганини ҳанузгача билмайди. Шиддатли парвозни давом эттираётган голеадорнинг яшил майдон билан барвақт хайрлашгани чиндан ҳам, ачинарли ҳолат, албатта.
- Сиз учун энг муҳим соврин қайси?
- Албатта, Америка кубоги.
«Кун» «Сити» билан кўплаб совринларни қўлга киритган, аммо «Копа Америка»даги зафарни асосий муваффақияти сифатида эътироф этдики, бу унинг ватанпарварлигидан далолат.
- Вақтида «Бавария»дан таклиф олганингиз ростми?
- Ҳа, «Бавария» эътибори хусусида мени огоҳлантиришганди. Мюнхенликлар «Эстидуантес»га қарши ўйинда ҳаракатимни кузатишган ҳам. Бироқ ўша баҳсда чиндан ҳам, ўта суст тўп сургандим. Қисқаси, «Бавария» вакилларига рақиб ҳужумчиси Хосе Соса ўйини маъқул келган, кейинчалик айнан уни сотиб олишганди.
Агуэро «Индепендьенте»да тўп сурган вақт «Бавария» назарига тушган, аммо муҳим паллада унинг ўйини қовушмаган. Орадан бир неча йил ўтгач, «Кун» «Атлетико»дан «Манчестер Сити»га йўл олди, Соса эса «Бавария»дан «Металлист» (Харьков)га «парвоз» қилди.
С.РАҲМОНОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
