Argentinalik afsonaviy goleador - Serxio Aguero 2021 yilning 15 dekabrida yurak tizimidagi muammolar tufayli futbolchilik faoliyatiga nuqta qo‘yganini e’lon qilishga majbur bo‘lgandi. Xullas, o‘tgan yozda «Barselona» bilan shartnoma tuzgan «Kun» yangi klubida atigi 5 marta maydonga tushdi. Aslida u Kataloniya grandi safida qadrdon do‘sti Lionel Messi bilan yonma-yon to‘p surish niyatida edi. Biroq «Barsa» Leoga yangi kelishuv taklif etolmadi va shu tariqa mavsum Aguero uchun qandaydir ko‘ngilsiz boshlandi. Shunga qaramay, bunga qadar «Independyente», «Atletiko» va «Manchester Siti» klublarida javlon urgan Serxio «Barselona»da ham o‘zini ko‘rsatishga ulgurdi, jumladan, «Real» darvozasini nishonga oldi. Keyin hammaga ma’lum noxushlik ro‘y berdi va argentinalik hujumchi butsalarini mixga ilishdan o‘zga chora topolmadi. «Kun» yaqinda «Tvitter» orqali muxlislar bilan muloqotga kirishib, ulardan tushgan turli-tuman savollarga oshkora javob qaytardi. Xususan, vaqtida Lionel Messi bilan janjallashib qolganini ham yashirgani yo‘q.
- Serxio, endi kuzatuvchi sifatida baho berish imkoniyatiga egasiz: joriy mavsum CHLda qaysi jamoa g‘olib chiqadi, sizningcha?
- Umid qilamanki, kubok «Manchester Siti»ga nasib etadi.
Aguero «shaharliklar» libosida 10 yil to‘p surib, ko‘plab sovrinlar yutdi, klub tarixidagi eng yaxshi to‘purar sifatida yorqin iz qoldirdi, ammo CHLda zafar quchish unga armon bo‘lib qoldi. Serxioning aytishicha, «Siti» sohiblari va muxlislari nufuzli turnirni zabt etishdan hali umid uzishmagan, hozirgi «Siti» CHL kubogiga munosib. Qolaversa, shuncha harakat oxir-oqibat, natija berishi kerak.
- Aytingchi, futbolda aynan qaysi himoyachiga qarshi to‘p surishda ko‘proq qiynalgansiz?
- Shubhasiz, Jon Terriga qarshi borish mushkulot tug‘dirgan.
Qizig‘i, Kun 2011 yili «Chelsi» safiga qo‘shilishi va Terrining klubdoshiga aylanishi mumkin edi. Biroq bu kelishuvga aynan «ko‘klar»ning sobiq sardori qarshi chiqqan. «Chelsi» keyinchalik «Liverpul»dan Fernando Torresni xarid qildi, Jon esa o‘z qarorini oddiygina izohladi: «Ha, Agueroni «Chelsi»da ko‘rishni istamadim. Chunki uning uslubi jamoamizga mos kelmasdi. O‘sha vaqt yevrokuboklarda «Kun»ga qarshi maydonga tushgandim va u menda kuchli taassurot qoldirmadi. Lekin argentinalikning transferiga qarshi chiqqanim klub qaroriga nechog‘li ta’sir ko‘rsatganini bilmayman. Qisqasi, o‘shanda jamoamizning o‘zgacha uslubga tayanadigan hujumchiga ehtiyoji borligini o‘ylab, bu borada fikrimni ochiq bayon etgandim. Menimcha, «Kun» «Chelsi»da o‘z o‘rnini topolmasdi».
- Aguero zamonaviy futbolchilardan qay birini ko‘proq yoqtiradi?
- Fodenni. Ha, Filga gap yo‘q, u men uchun eng suyukli futbolchi.
Darhaqiqat, Fil Foden faqat Xosep Gvardiola emas, Agueroning ham yoqimtoyi. U «Kun» bilan yonma-yon to‘p surib, bebaho tajriba to‘pladi. Endi Foden - jahon futbolidagi eng qimmatbaho yosh futbolchi.
- Vaqtida videoo‘yinlar tufayli Messi bilan janjallashgan ekansiz...
- Ha, bu haqiqat. Umuman, o‘zaro bahslar natijasi tufayli ba’zan kun bo‘yi bir birimiz bilan gaplashmasdik. Bir safar qattiq tortishganimiz ham rost, ammo bu arzimas holat...
Serxio - videoo‘yinlarning ashaddiy ishqibozi, u Twitch platformasida o‘z jamoasini ham yaratgan. «Kun» ko‘pincha video-o‘yinlarda aynan Messi bilan kuch sinashadi. Aslida ikkisi qadrdon do‘st. Lekin videoo‘yinlar tufayli ba’zan kelisholmaslik holatlari ham yuzaga keladi.
- APLdan tashqari, La Ligada ham yetarlicha gollar urgansiz. Ulardan eng muhimini ayta olasizmi?
- Menimcha, «Real»ga qarshi o‘yinda urgan so‘nggi golim La Ligadagi eng yaxshisi bo‘lsa kerak. Chunonchi, o‘sha pallada tez orada futbol bilan xayrlashishimga to‘g‘ri kelishini bilmasdim. Shunday ekan, bu gol hamisha eng ahamiyatlisi bo‘lib qoladi.
Ma’lumot uchun, Aguero «Atletiko» tarkibida La Liganing o‘zida 74ta gol urgan. Tabiiyki, ular orasida o‘ta chiroyli va muhimlari ham yetarli.
- Serxio qaysi ichimlikni birinchi o‘ringa qo‘yadi?
- Qahvani. Afsuski, yurak xastaligi tufayli ma’lum muddat qahva ichishdan tiyilishim kerak.
Ta’kidlanishicha, shifokorlar uning qahva ichishini qat’iyan taqiqlab qo‘yishgan. To‘g‘ri, bu vaqtincha parhez.
- Aytishlaricha, Argentina terma jamoasi yig‘inlari chog‘i faqat Messi bilan bitta xonada yashagan ekansiz...
- Bu oddiy hol-ku. Axir Yevropada juda kam ko‘rishardik va terma jamoa yig‘ini vaqtni birga o‘tkazish uchun imkoniyat edi. To‘g‘ri, ba’zan o‘zaro tortishib qolardik. Ayniqsa, jamoamiz yengilgan payt o‘z-o‘zidan asabiylashardik. O‘zingiz o‘ylang, mag‘lubiyat kimga yoqadi?
Aguero ancha hazilkash yigit, yana doimo tik gapiradi. U bir safar Leo bilan xonani qanday taqsimlashganini aytib bergandi: «Ochig‘i, Messi o‘ta injiq yigit. Biz ajralmas juftdekmiz. Odatga ko‘ra, har doim televizorni o‘chirmagan holda uxlab qolaman. Ertalab esa Leodan rosa tanbeh eshitaman. Misol uchun, mehmonxonaga soat 19:30da qaytamiz, kechki ovqat soat 21:00da, orada yetarlicha bo‘sh vaqt bor. Leo xonaga kirishi bilan dushga yo‘l oladi va vaqtida tayyor bo‘ladi. Men esa telefon titkalab o‘tiraman. Shunda Leo ming‘irlaydi: «Hoy bola, soat 21:00da kechki taom, atigi 30 daqiqa qoldi». Men esa telefondan boshimni ko‘tarmayman. Tabiiyki, bundan Messining g‘azabi qaynaydi: «Atigi 10 daqiqa qoldi, 1 soatdan beri telefondan bo‘shamaysan. Har doim sen tufayli kech qolamiz...».
- Faoliyatingizga nuqta qo‘ymaslik imkoniyati ham bormidi?
- Futboldan ketishimni taqozo etgan muammo qayerdan paydo bo‘lganini haligacha tushonolmayapman. Boshqalar ham bilishmasa kerak. Ehtimol, bu koronavirus yoki emlashning asoratidir. Haqiqat shuki, jiddiy xastalikka chalindim, endi salomatligim xususida qayg‘urishim lozim. Ha, oldin ham yurak tizimiga bog‘liq arzimas muammo sezilardi, ehtimol, bu navbatdagisidir...
Ha, Aguero futboldan voz kechishiga olib kelgan muammo qanday paydo bo‘lganini hanuzgacha bilmaydi. Shiddatli parvozni davom ettirayotgan goleadorning yashil maydon bilan barvaqt xayrlashgani chindan ham, achinarli holat, albatta.
- Siz uchun eng muhim sovrin qaysi?
- Albatta, Amerika kubogi.
«Kun» «Siti» bilan ko‘plab sovrinlarni qo‘lga kiritgan, ammo «Kopa Amerika»dagi zafarni asosiy muvaffaqiyati sifatida e’tirof etdiki, bu uning vatanparvarligidan dalolat.
- Vaqtida «Bavariya»dan taklif olganingiz rostmi?
- Ha, «Bavariya» e’tibori xususida meni ogohlantirishgandi. Myunxenliklar «Estiduantes»ga qarshi o‘yinda harakatimni kuzatishgan ham. Biroq o‘sha bahsda chindan ham, o‘ta sust to‘p surgandim. Qisqasi, «Bavariya» vakillariga raqib hujumchisi Xose Sosa o‘yini ma’qul kelgan, keyinchalik aynan uni sotib olishgandi.
Aguero «Independyente»da to‘p surgan vaqt «Bavariya» nazariga tushgan, ammo muhim pallada uning o‘yini qovushmagan. Oradan bir necha yil o‘tgach, «Kun» «Atletiko»dan «Manchester Siti»ga yo‘l oldi, Sosa esa «Bavariya»dan «Metallist» (Xarkov)ga «parvoz» qildi.
S.RAHMONOV tayyorladi
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
