Европа чемпионлар лигасидаги ажойиб баҳслар билан андармон бўлиб, нуфузи бўйича ЧЛдан сўнг турувчи Европа лигаси баҳсларини унутиб қўйгандек бўлганимиз рост. Бугун ушбу турнирнинг ҳам ярим финал дастлабки учрашувлари бўлиб ўтди.
Чемпионлар лигасида барча масала жавоб ўйинига қолган эди. Қайсидир маънода Европа лигасида ҳам дастлабки ўйинлардан кейин, шундай ҳулосага келиш мумкин.
Лиссабонда кечган учрашувда ярим финал баҳсларидаги ягона испан жамоаси бўлмаган "Спортинг" бир қатор грандларни мусобақадан чиқариб юборган ва автоматик равишда мусобақанинг асосий фаворитларидан бирига айланган Бильбаонинг "Атлетик" клубини қабул қилди.
Биринчи бўлим тенг курашлар остида ўтди ва ҳисоб очилмади. Иккинчи бўлим бошидан эса Бильбаоликлар ташаббусни ўз қўлларига олгандек кўринишди. Жуда тартибли ва ақлли ўйин намойиш этган "Атлетик" биринчи бўлиб ҳисобни очди. Жуда кўп учрашувларда бўлганидек бу сафар ҳам стандарт вазиятдан жуда унумли фойдаланилди. "Спортинг" ҳимояилари бўйи бироз узун бўлган Льоренте ҳамда Аморьбеталарни қўриқлашга тушиб кетишди ва бильбаоликларнинг бошқа бир футболчисини кўздан қочирди. Чап қанот ҳимоячиси Хоан Ауртенече деярли қийинчиликсиз ҳисобни очди - 0:1.
Бу гол меҳмонларни бироз ҳотижамликка берилишига сабаб бўлдими, билмадик. Аммо ўз дарвозаларидан тўп олиб чиққач, португалиялик футболчилар олдинга ташланишди. "Спортинг" футболчилари Бильбаодаги жавоб ўйинида жуда катта қийинчиликка дуч келишларини билишарди. Шунинг учун ҳам ҳеч йўғи ҳисобни тенглаштириш учун улар жон-жаҳдлари билан олдинга ташланишди.
Тан олиш керакки, кетма-кет ҳужумлардан сўнг "Спортинг"нинг гол ура олмаса адолатдан бўлмасди. Ўйиннинг 75-дақиқасида ҳужумчиларга ёрдамга отланган Эмилиано Инсуа боши билан бироз ностандарт тарзда дарвозани ишғол қилди ва ҳисобни тенлаштирди. Голдан руҳланган мезбонлар яна ҳужумга отланишди ва саросимага тушиб қолган бильбаоликларни яна бир бора жазолай олишди. Инсуанинг голидан 4 дақиқа вақт ўтмай "Атлетик"дарвозасидан яна бир тўп жой олди. Марат Измайловнинг пасидан сўнг Диего Капель ўз ҳамюртларини ранжитди. Испаниялик футболчининг чамаси 25 метрлардан йўллаган жуда кучли ва чиройи зарбаси Ираисос қўриқлаётган дарвозанинг чап бурчагидан ўрин олди - 2:1.
Шундан сўнг "Спортинг" учинчи ҳамда тўртинчи голларни киритиш учун ҳам бир қатор имкониятарга эга бўлди. Бироқ қандайдир сантиметрлар ва омад уларга бугун етишмади. 2:1 Барчаси жавоб ўйинида ҳал бўладиганга ўхшайди. Ҳа, дарвоқе, "Спортинг" таркибидаги ягона испаниялик бўлган футболчи, испанча финал кўришимизга ҳалақит бериши мумкин. Диего Капельнинг голи жавоб учрашувида лиссабонликларга қўл келиши мумкин.
СПОРТИНГ (Португлия) — АТЛЕТИК (Испания) 2:1 (0:0)
Голлар: Инсуа, 76, Капель, 80 — Ауртенече, 54
Спортинг: Патрисиу, Ж. Перейра, Полга, Шандао, Инсуа, Каррису (Карильо, 69), Андре Мартинс (Диего Рубио, 78), Схаарс, Измайлов, Капель (Перейринья, 84), ван Волфсвинкел
Атлетик: Ираисос, Ираола, Экиса, Аморебьета, Ауртенече, Итурраспе, Де Маркос, Эррера (Сан Хосе, 74), Сусаета (Ибай Гомес, 84), Муньяин, Льоренте (Токеро, 88)
Огоҳлантиришлар: Измайлов, Ж. Перейра - Де Маркос, Итурраспе, Льоренте
"Висенте Кальдерон" стадионида кечган иккинчи ярим финал баҳси эса ажойиб ва қизиқарли курашларга бой тарзда кечди. Стадионга йиғилган мухлислар бугун ажойиб ва драмматик ўйин гувоҳига айланишди десак муболаға бўлмайди.
Биринчи бўлим тенг курашлар остида ўтди. Гоҳ у, гоҳ бу жамоа рақиб дарвозасига ҳавф солиб туришди. Аммо ҳисобни очиш мезбонларга насиб қилди. Радамель Фалькао ўйиннинг 18-дақиқаси ўтиб бораётганда жарима майдони ичида ёлғиз қолдирилди. Бу эса гол дегани эди. Колумбиялик ҳужумчи бош билан қандай ўйнаш кераклигини жуда яхши билади - 1:0.
Биринчи бўлимга ҳакам қўшиб берган дақиқалар ўтиб бораётган бир пайтда эса, "Валенсия" бурчак тўпи ишлаб олди ва ҳисобни тенглаштириб олди. Адил Рами ҳаммадан баланд сакраб, боши билан тўпни Жонаснинг оёқларига ташлаб берди. Бунисини "гол в раздевалку" дейишади, начора - 1:1.
Иккинчи бўлим эса фақатгина бир жамоанинг устунлигида ўтди. "Атлетико" барча масалани жавоб ўйинига қолдирмасликни афзал билди ва олдинга ташланди.
Сўнгги ўйинларда бироз толиққанлиги билиниб қолган "Валенсия" жуда кўп ҳатоларга йўл қўя бошлади ва бунинг учун жазоланди. Миранда ҳамда Адриан Лопеснинг кетма кет голлари ҳисобнинг 3:1 бўлишини таъминлади. Ўйин тугашига чамаси 10 дақиқалар қолганида эса, тиниб-тинчимас Фалькао яна бир маротаба валенсияликлар посбонини доғда қолдирди. Таблодаги ҳисоб эса Унаи Эмери жамоаси учун бироз ҳунук кўриниш олди, 4:1.
Бир қараганда масала ҳал бўлгандек эди. Ушбу ҳисоб сақланиб қолса, "Атлетико"ни бемалол биринчи финалчи бўлгани билан табриклайдиганлар кўпайиши аниқ эди. Аммо "Валенсия" бунга кўнмади.
Ҳудди ЕЧЛдаги каби барча масалани жавоб ўйинига қолдиришга эришди. Яна ҳакам қўшиб берган дақиқалар. Яна бурчак тўпи ва гол. Тино Кошта тўпни узатди ва унинг деярли адаши бўлган Рикардо Кошта ҳимоячилардан баланд сакради ва дарвозани нишонга олди - 4:2.
Ўйиндан олдин, "Атлетико" бош мураббийи Диего Симеоне рақибга стандарт вазиятлар пайтида имкон бермаслик кераклигини жуда кўп такрорлаганди. Унинг нечоғлик ҳақ эканлигини ўйин амалда исботлади.
Жавоб учрашувидан олдин, "Атлетико"нинг имкониятлари кўпроқдек. "Валенсия"нинг бугунги ҳимояси ҳатто "Расинг" ёки "Хетафе" каби жамоаларга қарши туриб бера олмаслиги кўриниб қолди. Аммо жавоб учрашувигача бир ҳафта вақт бор. Бир ҳафтадан сўнг эса, испан жамоалари ҳар қандай каромат кўрсатишлари мумкин.
АТЛЕТИКО (Испания) — ВАЛЕНСИЯ (Испания) 4:2 (1:1)
Голлар: Фалькао, 18, 78, Миранда, 49, Адриан, 54 - Жонас, 45+3, Рикарду Кошта, 90+4
Атлетико: Куртуа, Хуанфран, Миранда, Альваро Домингес, Филипе Луис, Марио Суарес, Габи, Арда Туран (Тьягу, 81), Диего (Переа, 88), Адриан (Сальвио, 90), Фалькао
Валенсия: Диего Алвес, Рикарду Кошта, Рами, Виктор Руис, Матье, Фегули (Каналес, 72), Мехмет Топал, Коста, Хорди Альба (Пьятти, 72), Жонас, Солдадо
Огоҳлантиришлар: Арда Туран - Фегули
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
