Биринчи бўлим кутилганидек, "Барселона"нинг тотал босими остида ўтди. Гарчи дастлабки хавли вазият биринчи дақиқа тугаб улгурмасидан меҳмонлар томонидан содир этилган бўлса-да.
"Челси" тартибли ҳимояланаётган, "Барселона" зич ҳимояни ёриб ўтаётган биринчи бўлимнинг тугашига 10 дақиқалар қолгандан бошлаб, майдонда бутун бир ўйинга ҳам татийдиган воқеалар содир бўла бошлади.
Исаак Куэнканинг 35-дақиқада чап қанотдан кўндаланг узатмасини дарвоза томон буриб қўйган Серхио Бусетс ҳисобни очган бўлса, 43-дақиқада худди шу қанотдан Месси-Иньеста комбинацияси иш берди ва Андреснинг ерлатиб узоқ бурчакка берган зарбасини Чех қайтара олмади.
37-дақиқада учрашувни бошқариб бораётган туркиялик ҳакам Жунайд Чақир Алексис Санчесга нисбатан қўполлиги учун "Челси" сардори Жон Террини майдондан четлади.
"Челси" Лондонда ўтган дастлабки учрашувдаги каби биринчи бўлимга қўшиб берилган дақиқаларда гол урди. Қаши ҳужум натижасида Рамирес яхши позицияга чиқарилди ва Валдес билан яккама-якка чиқиб бориб, тўпни унинг устидан ошириб қўйди – 2:1.
Биринчи бўлимда ҳар икки жамоа таркибида мажбурий ўзгаришлар амалга оширилганини қайд этиб ўтиш жоиз. "Челси" таркибида 12-дақиқада Кэҳилл ўрнига Босингва тушган бўлса, орадан яна 14 дақиқа ўтгач мезбонлардан Пике ўрнига Дани Алвеш майдонга туширилди.
Иккинчи бўлим бошланиши биланоқ майдон эгалари пенальти тепиш ҳуқуқини қўлга киритишди. Тўпга яқинлашган Месси ўз услубида баландлатиб зарба берди ва… тўсинни нишонга олди! Жаҳоннинг энг яхши ўйинчисининг пешонасига мана, 8 ўйиндирки "Челси" дарвозасини нишонга олиш ёзилмаган экан.
Бу вақтда таблода порлаб турган ҳисоб "Челси" фойдасига "ишлаётган", "Челси"нинг камайиб қолган ва яримҳимоячилар ва ҳужумчилар ҳисобига "тўлдирилган" ҳимоя чизиғи ҳам бехато ишлаётган эди. "Барселона" минглаб мухлисларнинг меъдасига тегиб улгурган, "ўқилиб" бўлинган услуби – тўпни рақиб жарима майдони остонасидан у ёқдан бу ёққа ошириб пайт пойлашга ҳаракат қилар, лекин "Кам Ноу"нинг кенг майдони ҳам "Челси" футболчиларини хато қилишига замин бўлолмади.
Пеп Гвардиола Куэнка ўрнига Тельони туширди. Тельо эса яқиндагина "Реал"га қарши учрашувда қандай хатоларга йўл қўйган бўлса, айнан ўша хатоларини такрорлаб турди. Марказий ҳужумчи вазифасини бажариши керак бўлган Сейду Кейтанинг оёғига тўп ҳам тегмади.
Ўйиннинг асосий вақти якунланган пайтда бор вужуди билан ҳужумга шўнғиган "блауграна"ларнинг битта тўп йўқотиши ўз жонига суиқасд билан тенг бўлиши аниқ эди ва бу воқеа содир бўлди. Тўп майдон марказида омадини кутаётган Торресга келиб тушди ва унинг бир ўзи Валдесга пешвоз чиқиб, стадиондаги 90 минг, оинаи жаҳон қаршисидаги миллионлаб ишқибозларнинг умидини "кўмди". Вазият шунчалик эдики, "Барселона" футболчиларидан ҳеч ким уни таъқиб ҳам қилиб ўтирмади — 2:2!
Хуллас, ЕЧЛ янги тарихида иккинчи бор финалга йўл олди. Эртага унинг рақиби аниқланади ва бу жамоа ё "Реал" ё "Бавария бўлади.
ЕВРОПА ЧЕМПИОНЛАР ЛИГАСИ – 2011/12.
ЯРИМ ФИНАЛ. ЖАВОБ УЧРАШУВИ
БАРСЕЛОНА – ЧЕЛСИ 2:2 (2:1)
Голлар: Бускетс (35), Иньеста (43) – Рамирес (45+1), Торрес (90+2)
Амалга оширилмаган пенальти: Месси (49)
Огоҳлантиришлар: Иньеста (50), Месси (71) — Жон Оби Микель (32), Рамирес (44), иванович (48), Чех (59), Лэмпард (72), Мейрулеш (89)
Четлатиш: Жон Терри (37)
"БАРСЕЛОНА": Вальдес, Пике (Алвеш, 26), Маскерано, Пуйол, Хави, Иньеста, Бускетс, Фабрегас (Сейду Кейта, 74), Куэнка (Тельо, 67), Санчес, Месси.
"ЧЕЛСИ": Чех, Иванович, Кэҳилл (Босингва, 12) Терри, Коул, Мейрелеш, Рамриес, Лемпард, Мата (Саламон Калу, 58), Микел, Дрогба (Торрес, 80)
Бош хакам: Жунайд Чақир (Туркия)
Дастлабки учрашув: 0:1
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
