Таҳририятимизга келиб тушган хабарга кўра, андижонлик Ҳожиакбар Шамсутдинов Мадриднинг «Реал» футбол клуби академиясида таҳсил олаётгани баён этилган эди. Ушбу хабарни етказган Абдураҳим исмли шахс, ўзини Ҳожиакбарнинг қариндоши этиб таништирган ва у ҳақдаги шахсий маълумотлар ва фотосуратларни тақдим этган эди.
Таҳририят келтирилган маълумотлар асосида 8 май куни «Реал» ўзбек футболчисини тарбияламоқда сарлавҳа остида ушбу хабарни чоп этди.
Орадан ҳеч қанча вақт ўтмай, stadion.uzсайти мазкур янгиликни сўраб мурожаат қилди ва уни чоп этди.
Саноқли соатлардан кейин uff.uzҳам мазкур маълумотни чоп этган ва ўқувчиларини darakchi.uz фотогалереясига жойлаштирилган Ҳожиакбарнинг фотоларини томоша қилишга таклиф килган.
Кечга бориб эса таҳририятимиз ходимларидан баъзиларига интернет орқали тушунарсиз тавсиялар кела бошлади. Уларга кўра, Ҳожиакбар Шамсутдинов ҳақида «Х» шахс анчадан бери маълумот йиғиб бораётгани ва шу кунларда газета ва сайтларда мақола тайёрлашни режалаштираётгани, ундаги маълумотлар darakchi.uz даги маълумотлардан бир мунча кўплиги айтилиб, ушбу хабарни сайтдан олиб ташлаш сўралган. Тахминимизча шундай мурожаат ушбу хабарни чоп этган бошқа сайтларга ҳам билдирилган ва улар ўша заҳоти мухлислар томонидан билдирилган изоҳ ва фикрларни олиб ташлашган.
darakchi.uz воқеалар ривожини кузатишда давом этди ва футболчининг ўзи билан боғланишга муваффақ бўлди. 8 май куни кечка бориб, биз Ҳожиакбар билан интернет орқали мулоқот килдик ва эртаси кун, соат 20-30 да интервью таёрлашга келишиб олдик.
ИНТЕРВЬЮ!
Ваъдага кўра, Ҳожиакбар белгиланган вақтда биз билан алоқага чиқди ва саволларимизга жавоб берди. Суҳбат мобайнида унга бир неча бор, «Реал» академияси ҳақида савол берилган. Бунга чоп этилган интервью матнида ҳам гувоҳ бўлгандирсиз. Ўз навбатида Ҳожиакбар ҳам ушбу саволларни рад этмаган ҳолда жавоб қайтарди ва бирон марта ҳам ўзи таҳсил олаётган академия номига тузатиш киритмади. Бундан ташқари, таҳририятга юборилган фотосуратларда ҳам асосан «Реал» жамоасига тегишли ўйингоҳ ва музейлар тасвирланган.
Сухбат якунига етгач қаҳрамонимизга омад тилаб хайрлашдик. Эртаси кун мазкур интервью Сайтимизда эълон килинди. Биз билан бир вақтда суҳбатни uff.uz ҳам чоп этди.
Эътибор беринг, икки кунгача футболга ихтисослашган интернет нашрлари Ҳожиакбар хақидаги хабарни тинмай ёритишди. Лекин футболчининг формаси ва академия номи ҳақида янги маълумот пайдо бўлиши билан uff.uz сайти дарҳол darakchi.uzва интервью муаллифини ёлғон хабар тарқатганликда айблаб чиқди. Ҳамкасбларимизнинг бизнинг "хато"дан жуда ҳурсанд бўлишганини пайқаш қийин эмас. Зеро, мақолага илова қилинган суратлар шундай илҳом билан тайёрланганки, бундан darakchi.uz "хато"сини янада бўрттириш мақсад килингани кундек равшан.
«КЎЗДЕК ҚЎШНИ»
Аслида биз uff.uz билан ҳамкорликда фаолият олиб борамиз. Таҳририятлар ўртасида ахборот алмашиш ҳам яхши йўлга қўйилган.
Шундай экан, Ҳожиакбар хақидаги хабар хато бўлган тақдирда хам буни авваламбор бизга маълум қилиб, маслаҳат солинганда, нур устига аъло нур бўлар эди. Зеро, мақсадимиз ўқувчига тезкор ва аниқ маълумот етказиш, бир-биримизнинг хатойимизни топиш эмас.
Тўғри, касбий рақобат деган тушунчалар ҳам мавжуд. Бирок, бу кимнингдир номини булғаш эвазига амалга оширилиши керак эмас, назаримизда. Қолаверса, darakchi.uz спортга ихтисослашган сайтларга рақобатчи ҳам эмас ва бундай режанинг ўзи йўк. Бизнинг йуналишимиз тамомила бошқа ва айрим ихтисосликлар бўйича ўша йўналишнинг мутахссислари билан ҳамкорлик қилишдан манфаатдормиз. Uff.uz билан ҳамкорлик қилишимиздан мақсад ҳам шу, аслида.
Сайт ходимларининг айримлари, биз ёритаётган спорт хабарларини бевосита тайёрлашга кўмаклашишади ва баъзи пайтларда ўз масалахатларини беришади. Бундан миннатдормиз албатта.
ОЛДИН ЎЗИНГА БОҚ
Гарчи бугун бошқа сайтларда хам ушбу тушунмовчилик ҳақидаги хабар кенг ёритилаётган бўлсада, darakchi.uz ўзини ёлғон хабар тарқатган деб ҳисобламайди.
Биз вазиятга аниқлик киритиш учун футболчи ва унинг қариндошлари билан яна бир боғландик. Ҳожиакбарнинг эътироф этишича у хақиқатдан ҳам «Реал» футбол академиясида ўқимокда. «Мен кимнидир алдаб обрў орттирмоқчи эмасман. Мен «Реал» мактабида ўқиябман. Формага келсак, бу ерда жамоалар кўп, бир-биримизга қарши тўп сурганда, турли рангдаги формадан фойдаланамиз», дейди Ҳожиакбар.
Шундай бўлсада, биз унинг айнан «Реал» мактабида ўқиётганига ишонтирмоқчи эмасмиз. Биз фақатгина Мадридда ўзбек ўғлони футбол билан шуғулланаётганидан фахрланиб ушбу хабарни чоп этгандик, қолаверса унинг айнан қайси мактабда таълим олиши унчалик аҳамиятга эга эмас. Асосийси, Ҳожиакбарнинг келажикда ўзбек футболига нафи тегадиган, юртимиз довруғини оламга таратадиган футболчи бўлиб етишишидир.
Афсуски, воқеалар ривожи биз учун кутилмаган томонларга қараб оғиб кетди. Бугун olam.uz сайти ҳам uff.uzда чоп этилган мақолани эълон килиб, «uff.uz даракчи хатоларини кўрсатди» деб оламга жар солди.
Аслида биз ҳам ҳамкасбларимизнинг хатоларини кўрсатиш билан шуғуллансак бўлар экан, шунда балки тезрок «ном» қозонармидик. Ҳалқимизда «Иштони йўк, тиззаси йиртиққа кулади» деган доно нақл бор. Ўзбек тилида фаолият олиб бораётган баъзи сайтлар авваламбор она тилимизни яхшилаб ўрганиб олса, тўғри ёзишга амал қилса ёмон бўлмасди. Журналистикада, айникса тв.да «Битта катта хатодан 10та майда хато томошабиннинг асабига тегади» деган ёзилмаган қоида бор. Ҳар кунлик мақолаларида ўзбек тилини бузиб талаффуз қилаётган ва «адолатли» уз рейтингида биринчи ўринда бораётгани билан кўкрак кераётган сайтлар ишни ўз хатоларини тузатишдан бошлашса ёмон бўлмасди.
Яна бир бор такрорлаймиз, darakchi.uz хато хабар тарқатган деб ҳисобламайди ва ушбу мавзуга Ҳожиакбар Шамсутдиновнинг Тошкентга келганидан сўнг яна бир бор қайтади. Ҳозирча эса сизники тўғри бўла қолсин - «Мадрид ўзбек футбочисини тарбияламокда»!!!
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
