Ўзбекистон чемпионатида тўп сураётган легионерлар жуда кўп. Турли хил мамлакатлардан келиб олий лигада ўйнаб озми-кўпми фойда келтиришмоқда. Буларнинг орасида тожикистонлик Фарҳод Тоҳиров ҳам бор.
Ҳозирча у чемпионатимизда Тожикистондан ягона легионер ҳисобланади. Айтиш жоизки, унинг ўз мамлакатида ҳурмати жуда ҳам баланд. Ҳамма Тоҳировни ёрқин келажак кутиб турганига ишонмоқда. Шунинг учун Фарҳоднинг мухлислари ҳам анчагина. Тожикистон миллий терма жамоасида ҳам ўз ўрнига эга. Бу йилдан бошлаб «Андижон» учун тўп сураётган иқтидорли ҳужумчи иқшибозларда яхши таассурот қолдирмоқда. Тўғри, мавсум андижонликлар учун қониқарсиз бошланди. Аммо тожикистонлик легионер ўз ҳаракатлари ва меҳнати билан барчада илиқ таассурот қолдиряпти. Боз устига унинг «Нефтчи» дарвозасига киритган ягона голи водий дербисида қимматли ғалабани тақдим этди. Бироқ ҳар бир футболчини жароҳат таъқиб қилади. Шу боис «Пахтакор»га қарши ўйинда у оёғидан жиддий жароҳат олди. Натижада маълум муддатга сафдан чиқди. Шу сабабли куни-кеча клуб базасида Тоҳиров билан суҳбатлашдик.
- Фарҳод, айни пайтда аҳволингиз қандай?
- Аста-аста ижобий томонга ўзгариш сезиляпти. Оёғимдаги гипсни олиб ташладик. Оғриқлар ва шишишлар камайган.
- Бу жароҳат «Пахтакор»га қарши учрашувда юз берди. Аслида ўша вазиятда нима бўлганди?
- Ҳимоячи билан тўп учун курашдик. Иккаламиз ҳам тўпга қарагандик ва у оёғимни босиб олди. Натижада бутун гавдаси билан мени босиб қўйди. Оёғим эса қайрилди. Аслида унинг айби йўқ. Чукни айтганимдек, мен ҳам, у ҳам тўпга қарагандик.
- Олдин ҳам бу каби жароҳатларга дуч келганмисиз?
- Ҳа, бўлган. Тожикистонда «Парвоз» жамоаси учун ўйнаганимда оёғимни гипс қилдирганман.
- Ҳозирда жамоа учун жуда ҳам керак эдингиз. Аммо жароҳат туфайли ёрдам бера олмаяпсиз. Бу ҳолатда ўзингизни қандай ҳис қиляпсиз?
- Тўғри, «Локомотив» билан учрашувда ёрдам бера олмадим. Тўғриси, бундан ўзим роса афсусланяпман.
- «Локо» - «Андижон» ўйинини кўрдингимзи?
- Ҳа, телевизор орқали томоша қилдим. «Андижон» яхши ўйин кўрсатди. Бизда уч очко билан қайтиш имкони бор эди. Лекин сафарда бир очко ҳам ёмон натижа эмас.
- Бу йил жамоага янги келган ўйинчилардан бирисиз. Аксига олиб чемпионат «Андижон» учун муваффақиятсиз бошланди. Бунинг сабабини нимада кўряпсиз?
- Ўйлашимча, бу вазиятда бош мураббийнинг ҳеч қандай айби йўқ. Мураббий ўзи танлаган ўйинчиларига қараб жамоа тузади. Масалан, ҳужумкор ўйин тактикасини ёки ҳимоявий тактикани танлаши мумкин. Боз устига мураббий футболчиларни шуғуллантиради ва кўрсатмалар беради. Майдонда эса ўйинчилар ўйнашади. Демак, ҳаммаси ўзимизга боғлиқ. Мавсумни ёмон бошлаганимизга келсак, назаримда биз футболчилар бир-биримизни яхши тушуна олмадик. Ҳозирда эса кўриб турганингиздек ўйиндан-ўйинга ҳаммаси яхши бўлиб бормоқда.
- Умуман, бош мураббий Алексан Аверьянов билан илк бор ишлаяпсиз. Ҳозиргача олган таассуротларингиз қандай?
- Мураббий ҳамма вақт 100 фоиз ҳақ. Унинг машғулот ўтказиш жараёнлари, кўрсатма беришлари, жамоага жон куйдиришлари, ҳар бир ўйинчи билан алоҳида гаплашишлари менга ёқади. У юқори савиядаги мутахассис.
- Сиз ҳозирча битта гол урдингиз. Ушбу голингизни «Нефтчи» дарвозасига киритдингиз ва бу ҳозиргача ягона бўлиб турган ғалабани келтирди.
- Биринчи навбатда жамоадошларимга раҳмат дейман. Бу ўйиндаги ғалаба бизга жуда ҳам зарур эди. Мухлисларимиз, раҳбарларимиз олдида юзимизни ёруғ қилишимиз муҳим аҳамиятга эга эди. Ҳамма ғалаба учун ҳаракат қилди. Голим эса жамоамга уч очко келтирганидан хурсандман.
- «Андижон»га келганингизда табиийки, катта мақсадлар билан ташриф буюргансиз. Лекин аксига олиб жамоа мавсумни омадсиз бошлади. Бу ҳолат сизнинг кайфиятингизга ва руҳиятингизга таъсир кўрсатмадими?
- Ҳар бир футболчи профессионал бўлиши керак ва ушбу ҳолатларга профессионал тарзда ёндошиш лозим. Биз ўз майдонимизда икки марта қимматли очколарни бой бердик. Ҳар қандай ўйинчида ҳис-ҳаяжон бўлиши табиий. Омадсиз ўйинларда футболчининг кўрсатаётган ўйини ҳам қовушмай қолади. Лекин ҳозирда ҳаммаси яхши томонга ўзгариб бормоқда. Ҳар қандай жамоа билан ўйнаса бўлади. Бунинг учун футболчининг ўзига бўлган ишонч бўлиши керак. Ҳамма ҳам майдонга ютаман деб чиқади. Ўша «Бухоро» билан учрашувда икки марта стандарт вазиятдан гол ўтказиб юбордик. «Динамо» билан ўйинда эса битта гол стандартдан ва иккитаси қарши ҳужумда киритилди. Қолаверса, омад ҳам биздан юз ўгирганди.
- Кейинги учрашувларда мухлислар жамоадан янада яхшироқ натижаларни кутишмоқда...
- Сафардан бир очко билан қайтишди. «Локомотив» анчайин қизиқарли ва кучли жамоа. Кўпчилик ташқаридан қараганда «Андижон»ни ютқазади деб ўйлашганди. Ҳозирги пайтда «Локомотив» «Пахтакор»дан ҳам кучлироқ. Албатта, меҳмонда қайд этилган дуранг кейинги ўйинларда ижобий таъсирини кўрсатади. Худо хоҳласа, биз ғалабалар билан ишқибозларимизни хушнуд этамиз.
- Тезроқ майдонга тушиб жамоага ёрдам беришни хоҳлаётганингиз сезилиб турибди. Яъни, буни сабрсизлик билан кутаётганингиз билиняпти.
- Ҳақиқатдан майдонга қайтишимни сабрсизлик билан кутяпман. Мен бу ерга ўйнаш ва ёрдам бериш учун келганман.
- Фаолиятингизни биринчи марта Ўзбекистонда давом эттираётганингизни инобатга олганда қандай таассуротлар уйғонмоқда?
- Ҳаммаси яхши. Масалан, мени бу ерда жуда илиқ кутиб олишган. Жамоада барча билан муносабатим яхши. Андижонда футболга ишқибозлик юқори даражада. Шаҳар ҳам менга жуда ёқди.
Шуҳратбек ЖЎРАЕВ суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
