Мегаюлдузлардан бири бўлган Лионель Месси дунёнинг энг қиммат ва эксклюзив уйларида истиқомат қилади. Бизнингча, сиз ҳам 524 миллион фунтлик бойликларингиз бўлса, шундай уйларда яшашни одат қилган бўлардингиз. Аргентиналик футболчи айни дамда "ПСЖ" сафида ҳаракат қилмоқда. Месси бир йилдан буён Парижнинг энг қиммат туманларидан бирида ижарада яшайди. Уйнинг ижара ҳақи ойига 18 минг фунтни ташкил этади. Йиллар давомида Лео "Барселона" ҳамда Маями шаҳарларида ўзи учун уйлар қурди. Яқиндагина эса бу рўйхатга Ибица ҳамда Росарио шаҳарлари ҳам қўшилди. Қуйида Мессининг ўша шаҳарлардаги уйлари ҳақида гап боради.
Барселона
Ҳаммаси Барселона шаҳридан бошланган. Месси Каталонияда қиролга айланганди. Унинг илк уйи ҳам ўша ерда жойлашган. Шаҳарнинг энг бой казо-казолари жойлашган еридан Месси уй олган эди. У денгиз бўйида жойлашган бўлиб, бутун қирғоқни осонлик билан кўриш мумкин. Шунингдек, Мессининг уйи жойлашган ҳудуд осмонида учоқ ҳаракат қила олмайди. Энг асосийси эса уй "Камп Ноу"га жуда яқин жойлашган. Месси йиллар давомида аёли ва уч фарзанди билан ўша уйда яшаган эди. Уй ўз ичига катта ҳовли, футбол майдончаси, бассейн, ички тренажор зали ҳамда қумлоқни олган. Уйнинг умумий қиймати 5,5 миллион фунтни ташкил этади.
Майами
2020 йилда Месси АҚШдан кошона харид қилади. Унинг янги уйи Маями шаҳрида жойлашган эди. Бу воқеа Мессининг "Интер Маями" жамоасига ўтиши билан боғлиқ миш-мишларни алангалатиб юборган. Пляж яқинидаги уйда 4 та ётоқхона, 4 та ванна, бассейн, СПА, фитнесс зали, ёга студиоси, болалар ўйин майдончаси ҳамда шампан бари мавжуд. Унинг умумий қиймати эса 5 миллион фунтга баҳоланган.
Ибица
Мессининг уй борасидаги энг сўнгги хариди бўлган кошона Ўртаер денгизида, Балеaр оролларида жойлашган. Уйнинг нархи 9,5 миллион фунт экани айтилади. Аммо бунда озгина муаммо мавжуд. Чунки Мессининг янги уйига эгалик қилиш учун маҳаллий ҳукумат вакиллари ҳали сертификат тақдим этмаган. Шундай бўлсада, уй Месси дидига мосланиб қайта қурилмоқда. Кейинги ёзга қадар бу ишлар якун топиши айтилган. Месси эса оиласи билан таътилни Ибицада, илк бор янги уйида ўтказиши мумкин бўлади.
Росарио
Ватан қайда бўлса, кўнгил ҳам ўша ерда, дейишади. Гарчанд, ўз орзулари йўлида 13 ёшидаёқ Аргентинани, Росариони ташлаб кетишга мажбур бўлган бўлсада, Месси доимо у ерга ҳурмат ва меҳр билан қараган. Айтишларича, Месси ўзи туғилиб-ўсган шаҳардан умумий қиймати 3 миллион фунтга тенг бўлган, "The Fortress" деб аталувчи кошонани сотиб олган. Аргентинадаги уй 20-25 та хонадан ташкил топган. Унда йирик уй кинотеатри, тўла жиҳозланган тренажор зали ва бошқа қулайликлар мавжуд. Шунингдек, уйнинг тагида, ертўласида 15 та машина сиғадиган махсус гараж ҳам мавжуд. Месси ушбу уйни сотиб олганидан кейин, отаси Хорхе Мессининг номига ўтказиб қўйган. Бир кун келиб, "Барселона" афсонаси футболни тарк этса, катта эҳтимол билан ўша уйда бутун оиласи билан яшаши мумкин бўлади.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
