Ўзбекистон футбол ассоциацияси вакиллари ҳудудларда футбол оммавийлигини ошириш, болалар-ўсмирлар футболини янада ривожлантириш бўйича амалга оширилаётган ишлар билан танишиш мақсадида Қорақалпоғистон Республикасига ташриф буюришди.
Дастлаб Нукус шаҳрида жойлашган болалар-ўсмирлар футбол мактабининг иш фаолияти, инфратузилмаси ва футболчилар учун яратилган мавжуд шароитлар ўрганиб чиқилди. Айрим масалалар бўйича аниқланган камчиликлар ва қилиниши керак бўлган вазифалар юзасидан аниқ топшириқлар берилди. Масъуллар билан суҳбатда ўлкада истеъдодли ёшлар кўп эканлиги, уларни тўғри йўналтириб, замонавий стандартлар асосида катта футболга тайёрлаш лозимлиги, бу борада халқаро тажрибаларни ўрни муҳим эканлиги таъкидланди.
Шундан кейин, болалар футболи бўйича масъул мутасаддилар иштирокида 2022-йил якунлари ҳамда 2023 йилда амалга оширилиши лозим бўлган режаларга бағишланган йиғилиш ўтказилди. Унда бир қатор йўналишлар бўйича жорий йилда амалга оширилган ишлар таҳлил қилинди ҳамда келгуси йилги иш режалари муҳокама қилинди.
Кун тартибига кўра, йиғилишда маҳорат мактабига директор тайинлаш масаласи ҳам кўриб чиқилди. Унга кўра, Спортни ривожлантириш вазирлиги ҳамда Ўзбекистон футбол ассоциациясининг буйруғига асосан, Искандеров Дамир Конисбаевич Қорақалпоғистон футбол маҳорати мактаби директори лавозимига тайинланди. Янги раҳбар олдида ёш футболчиларни кашф қилиш, турли терма жамоаларимизга истеъдодли футболчиларни тизимли етказиб бериш каби масъулиятли вазифалар тургани таъкидлаб ўтилди.
Куннинг иккинчи қисмида Қорақалпоғистон Республикаси Жўқорғи Кенгеси Раиси Аманбай Ўринбаев иштирокида учрашув ташкил этилди. Унда мазкур ҳудудда футбол инфратузилмасини яхшилаш, унинг оммавийлигини ошириш ва болалар-ўсмирлар футболини янада ривожлантириш бўйича келажакдаги истиқболли лойиҳалар муҳокама этилди.
Матнда хатолик топсангиз, ўша хатони белгилаб, бизга жўнатинг (Ctrl + Enter).