Энг зўр мундиал қачон бўлган? Ҳамманинг ўлчови ҳар хил, кимгадир кўп голлар, кимгадир сюрпризлар, ким учундир эса, топ терма жамоаларнинг ўзаро ўйинлари ёқади. Шахсан менгаям шу – топ рақиблар (ўша ўрганиб қолганимиз фаворитлар, юлдузли таркиблар) кўпроқ ўзаро тўқнаш келишса, мундиал қизиқроқдек ўтган кўринади. Ҳа, Марокаш ёки Хорватиянинг қаҳрамонликлари ўзгача ҳикоя, лекин тан олинг, барибир Аргентина – Франция жарангдор афиша, тўғрими?
Мана шу ўлчовда қарасак, ушбу мундиалда топ-жамоалар ўйини атиги 4 та экан холос. Германия – Испания, Аргентина – Нидерландия, Англия – Франция, ҳамда финал: Аргентина – Франция. Бунга албатта, Италиянинг чиқа олмагани, немисларнинг гуруҳда қолиб кетгани, Марокаш ва Хорватиянинг Бразилия, Испания ва Португалиянинг йўлини тўсгани ҳам таъсир қилди. Табиийки, катта ўйинлардан бизни маҳрум қилган жамоалар ўринга етарли эмоцияларни беришди ҳам.
Топ учрашувлар миқдори бўйича ўлчасак, Германияда ўтган ЖЧ-2006 нинг олдига тушадигани йўқ экан. Ўша турнирда жами 9 та катта ўйин бўлган: чорак финалдан бошлаб деярли ҳамма ўйинлар шунақа мақомда эди: Италия – Франция (финал), Германия – Португалия (3-ўрин), Франция – Португалия (яримфинал), Италия – Германия (яримфинал), Португалия – Нидерландия (нимчорак), Франция – Бразилия (чорак), Франция – Испания (нимчорак), Англия – Португалия (чорак), Аргентина – Нидерландия (гуруҳ)! Зўр-а?
Ўшанда ҳеч қайси жамоа сюрприз бўлмаган, қандайдир фуррор кўтарган кашфиётлар ҳам кузатилмаган, гуруҳлардан ким чиқиши керак бўлса, ўша жамоалар чиққан – мана шу фактор мундиалда кўпроқ катта ўйинларни тақдим этган. Яъни кўрпани бошга ёпсангиз, оёқ очилиб қолади, бу шунақа ишлайди – агар катта ўйинларни кутсангиз, гуруҳ ўйинлари анча зерикарли бўлишига, кутилмаган ҳисоблар қайд этилмаслигига рози бўлишингиз керак. Агар кучсизроқ жамоаларнинг сюрпризлари сизга ёқса, сўнгги босқичларда ҳам тайёр туринг, топ учрашувлар нисбатан камроқ бўлади.
Агар қандайдир мувозанат керак бўлса, бу борада, ЖЧ-90 анча қизиқарли ўтганини таъкидлаш керак. Ўша мусобақада ҳам нисбатан кўп – 7 та топ учрашув бўлиб ўтган. Шу билан бирга кашфиёт жамоаларнинг узоққа бориши ҳам (Камерун), кучли рақибларга муносиб қаршилик кўрсатадиган қаттиқ жамоалар ҳам (Чехославакия, Югославия) ҳам, жуда кўп пеналтилар серияси ҳам бўлган. Агар бирини танлаш керак бўлса, ЖЧ-2006'дан кўра, албатта, ЖЧ-90'ни танлардим.
Қаҳрамон Асланов.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
