Eng zo‘r mundial qachon bo‘lgan? Hammaning o‘lchovi har xil, kimgadir ko‘p gollar, kimgadir syurprizlar, kim uchundir esa, top terma jamoalarning o‘zaro o‘yinlari yoqadi. Shaxsan mengayam shu – top raqiblar (o‘sha o‘rganib qolganimiz favoritlar, yulduzli tarkiblar) ko‘proq o‘zaro to‘qnash kelishsa, mundial qiziqroqdek o‘tgan ko‘rinadi. Ha, Marokash yoki Xorvatiyaning qahramonliklari o‘zgacha hikoya, lekin tan oling, baribir Argentina – Fransiya jarangdor afisha, to‘g‘rimi?
Mana shu o‘lchovda qarasak, ushbu mundialda top-jamoalar o‘yini atigi 4 ta ekan xolos. Germaniya – Ispaniya, Argentina – Niderlandiya, Angliya – Fransiya, hamda final: Argentina – Fransiya. Bunga albatta, Italiyaning chiqa olmagani, nemislarning guruhda qolib ketgani, Marokash va Xorvatiyaning Braziliya, Ispaniya va Portugaliyaning yo‘lini to‘sgani ham ta’sir qildi. Tabiiyki, katta o‘yinlardan bizni mahrum qilgan jamoalar o‘ringa yetarli emosiyalarni berishdi ham.
Top uchrashuvlar miqdori bo‘yicha o‘lchasak, Germaniyada o‘tgan JCH-2006 ning oldiga tushadigani yo‘q ekan. O‘sha turnirda jami 9 ta katta o‘yin bo‘lgan: chorak finaldan boshlab deyarli hamma o‘yinlar shunaqa maqomda edi: Italiya – Fransiya (final), Germaniya – Portugaliya (3-o‘rin), Fransiya – Portugaliya (yarimfinal), Italiya – Germaniya (yarimfinal), Portugaliya – Niderlandiya (nimchorak), Fransiya – Braziliya (chorak), Fransiya – Ispaniya (nimchorak), Angliya – Portugaliya (chorak), Argentina – Niderlandiya (guruh)! Zo‘r-a?
O‘shanda hech qaysi jamoa syurpriz bo‘lmagan, qandaydir furror ko‘targan kashfiyotlar ham kuzatilmagan, guruhlardan kim chiqishi kerak bo‘lsa, o‘sha jamoalar chiqqan – mana shu faktor mundialda ko‘proq katta o‘yinlarni taqdim etgan. Ya’ni ko‘rpani boshga yopsangiz, oyoq ochilib qoladi, bu shunaqa ishlaydi – agar katta o‘yinlarni kutsangiz, guruh o‘yinlari ancha zerikarli bo‘lishiga, kutilmagan hisoblar qayd etilmasligiga rozi bo‘lishingiz kerak. Agar kuchsizroq jamoalarning syurprizlari sizga yoqsa, so‘nggi bosqichlarda ham tayyor turing, top uchrashuvlar nisbatan kamroq bo‘ladi.
Agar qandaydir muvozanat kerak bo‘lsa, bu borada, JCH-90 ancha qiziqarli o‘tganini ta’kidlash kerak. O‘sha musobaqada ham nisbatan ko‘p – 7 ta top uchrashuv bo‘lib o‘tgan. Shu bilan birga kashfiyot jamoalarning uzoqqa borishi ham (Kamerun), kuchli raqiblarga munosib qarshilik ko‘rsatadigan qattiq jamoalar ham (Chexoslavakiya, Yugoslaviya) ham, juda ko‘p penaltilar seriyasi ham bo‘lgan. Agar birini tanlash kerak bo‘lsa, JCH-2006'dan ko‘ra, albatta, JCH-90'ni tanlardim.
Qahramon Aslanov.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
