Франциялик футболчи аэропортда узоқ йиллик маҳбубасига ўзгача «сюрприз» улашди мажбуран.
У эса бундан йиғлашни ҳам, кулишни ҳам билолмай қолди. Аниқроқ айтсак, «Астон Вилла»нинг франциялик ярим ҳимоячиси Бубакар Камара 3 июнь куни узоқ йиллик севгилиси Корали Порровеккиога уйланди. Футболчи ижтимоий тармоқларда 2 миллиондан кўп обуначиси бор машҳур модель билан 2019 йили танишганди. Жуфтлик ўша вақтдаёқ никоҳдан ўтган бўлсада, 27 ёшли Корали тўй маросимини нақ 4 йил кутди. Бироқ тўйдан кейинги воқелик унинг учун режа бўйича кетмади...
Тўғри, ёш келин-куёв дабдабали маросим ташкил этишди. Унда Поль Погба, Килиан Мбаппе, Фелипе Коутиньо, Унаи Эмери каби футбол оламининг таниқли намояндалари қатнашишгани барчасини кўрсатиб турибди. Бироқ чиройли маросим келинчакнинг хафагарчилигига уланди. Бинобарин, севишганлар режалаштирилган асал ойи Франция миллий жамоаси йиғини туфайли амалга ошмай қолди. Гап шундаки, жамоа бош бош мураббийи Дидье Дешам сўнгги паллада Бубакарни Евро-2024 саралаш босқичи доирасидаги ўйинларга жалб этди. Диққат қилинг, «Астон Вилла» вакили терма жамоадан қўнғироқ бўлган паллада аэропортда турмуш ўртоғи билан Мальдив оролларига рейсни кутаётганди. Оддий айтганда, жуфтлик асал ойига жўнаб кетаётганди. Бироқ насиб эмас экан...
Гап шундаки, Франция миллий термаси машғулотида кутилмаган ҳолат юзага келди - Адриен Рабьо жароҳатланиб сафдан чиқди. Оқибатда Дидье Дешам «Ювентус» ярим ҳимоячиси ўрнига зудлик билан Камарани чақирди. Футболчи ушбу хабарни хурсандчилик билан қарши олгандир балки. Ҳар ҳолда, Франция терма жамоаси мураббийи назарига тушиш осон эмас. Аммо Корали хоним-чи? У турмуш ўртоғининг Франция термасига боришидан қувонганми ёки асал ойи чиппакка чиққанидан куюнган? Жуфтлик сафар жомадонларини самолёт юкхонасидан қайтариб олганини ҳисобга олсак, бельгиялик модель аросатда қолгани ойдинлашади. Таъкидланишича, шундан сўнг келин-куёв тезда икки томонга кетган - Камара терма жамоа лагерига, Корали эса алам ичида уйига. «Умид қиламанки, турмуш ўртоғим мендан қаттиқ ранжимайди», - деди Камара Franceinfo нашри мухбирига.
Корали Порровеккио блогер ва сериаллар, реалити-шоулар юлдузи сифатида ҳам танилган модель. У 2014 йили «Бельгия гўзали» танловида ғолибликка даъво қилган, аммо олтин тожга бир қадам қолганида курашдан чиққанди. «Кулишни ҳам, йиғлашни ҳам билмайсан. Узоқ кутилган асал ойи қолдирилди. Бу - ҳамма ҳавас билан боқадиган футболчилар турмуш ўртоқлари ҳаёти... Париж орқали Мальдив томон учишимиз керак эди, аммо ҳозир самолётдан тушиб, Марселга қайтяпман. Ҳа, турмуш ўртоғингизнинг мамлакат терма жамоасига чақиришлари яхши, лекин...», - дея қандай ҳолатга тушганини тавсифлади модель.
Энг ажабланадиган томони, Корали хоним турмуш ўртоғининг Франция миллий жамоаси либосидаги ўйинини кўролмади. Аниқроқ айтсак, Камара Гибралтар (3:0) ва Греция (1:0) термаларига қарши кечган ўйинларда майдонга тушгани йўқ. Демак, у 2та ўйинда захира ўриндиғини «иситиш» учун асал ойини қурбон қилган бўлиб чиқяпти.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
