Германия чемпионати элит лигасида мавсум-2022|2023 чиндан ҳам, ғайриоддий тус олди. Аслида старт чизиғида чемпионлик пойгаси «интрига»дан холи ўтиши тахмин қилинган эди. Амалда «Бавария»нинг тез-тез кўзда тутилмаган йўқотишларга юз тутгани кураш тафтини кескин ошириб юборди, фақат «Боруссия» Д. якунда донгдор рақибнинг «бўш»лигидан фойдаланолмади. Умуман, чемпионатда бошқа эътиборга молик воқеалар ҳам етарлича кузатилди.
Мавсумнинг энг яхши жамоаси - «Бавария». Кўпчилик Мюнхен клуби чемпионлик унвонини асоссиз равишда илиб кетгани ҳақида тинмай ваъз ўқиши мумкин, аммо аслида бундай хулоса ўринли эмас. Ҳа, «Бавария» бу сафар «Кумуш товоқ»ни сўнгги тур ўйинининг сўнгги дақиқасида урган голи эвазига ўз томонига оғдирди. Лекин бунда қандай адолатсизлик бор? Дортмунд «Боруссия»сининг вужудга келган зўр имконият қадрига етмагани эса - бошқа масала. Қолаверса, «рекордмайстер» Бундеслигада урилган (92та) ва қўйиб юборилган (38та) голлар, тўпни назорат қилиш (61 фоиз) ва яккакурашлардаги устунлик (3841та), қўйингки, барча муҳим кўрсаткичлар бўйича энг яхши статистикага эришди. Қисқаси, рақамларни ўз ичига олган маълумотларга қарасак, «Бавария»нинг навбатдаги чемпионлик марраси ҳам тасодифий эмаслиги ойдинлашади.
Энг яхши тўпурарлар - Никлас Фюллькруг, Кристофер Н~Кунку. Нуфузли индивидуал соврин бу сафар икки голеадор мулкига айланди. Фақат битта фарқи шуки, «Вердер»нинг германиялик етакчиси Никлас Фюллькруг рақиблар дарвозасини 16 марта нишонга олиш учун чемпионат доирасида 28 марта майдонга тушган бўлса, «РБ Лейпциг» ярим ҳимоячиси Кристофер Н~Кунку камроқ ўйин сарфлади. Яъни франциялик ҳужумкор футболчига 25та учрашув кифоя қилди. Тўпурарлар пойгасида шунингдек, «Айнтрахт» вакили Рандаль Коло-Муани ва «Фрайбург» ҳужумчиси Винченцо Грифо ҳам охиригича курашишди, фақат улар якунда етакчилардан 1та гол даражасида ортда қолишди. Айтиш керак, Н~Кунку «РБ Лейпциг» билан хайрлашди ва янги мавсумни «Челси»да бошлайди. Эҳтимол, бу ҳолат Бундеслигада тўпурар бўлишга даъвогарлар баҳсига қўшимча шиддат бағишлар, тўғри, агар «Бавария» ёзда ўз таркибига «янги Левандовски» қўшиб олмаса...
Энг яхши ассистент - Рафаэль Геррейру. Дортмунд «Боруссия»сининг португалиялик ҳимоячиси чемпионат давомида 12та самарали узатма тўплади. Коло-Муанига бу йўналишда ҳам атиги 1 очко етишмади - франциялик легионер 11та ассист маррасида тўхтади. Жамол Мусиала («Бавария») ва Флориан Кайнц («Кёльн») эса 10тадан гол ҳаммуалифи бўлиб, ассистентлар рўйхатида кучли учликдан жой олишди. Рафаэль Герейруга алоҳида тўхталсак, у «Боруссия»дан кетишга улгурди. Португалиялик легионер олдида вариантлар кўп эди ва у «Бавария»га ўтиш асносида Бундеслигада қолишни маъқул кўрди. Табиийки, бу «арилар» учун жиддий йўқотиш ҳисобланади.
Энг яхши дарвозабон - Марк Флеккен. Унча танилмаган кипернинг ҳақли ғалабаси. Бинобарин, «Фрайбург» дарвозабони 13та ўйинда гол қўйиб юбормай, жамоаси натижаларига катта ҳисса қўшди. Кейинги ўринда 12та «қуруқ» ўйин тўплаган «Вольфсбург» вакили Кун Кастельс. Киперлар орасида 3-яхши натижа эса Грегор Кобель («Боруссия» Д.) ва Фредерик Реннов («Унион»)га тегишли - 11тадан «қуруқ» ўйин. Алоҳида таъкидлаш керак, Марк Флеккеннинг ишончли ҳаракатлари ҳисобига «Фрайбург» 2-марта ЕЛда қатнашиш ҳуқуқини қўлга киритди. Бироқ жамоа энди унинг хизматидан фойдаланолмайди - нидерландиялик кипер янги мавсумни «Брентфорд»да бошлайди. АПЛ вакили Марк трансферига 13 млн. евро тўлади.
Мавсум тарақ-қиёти - «Унион». Бундеслигада 2019 йили дебют қилган Берлин клуби тобора юқорига кўтарилмоқда. Элит лигадаги дастлабки мавсумни 11-ўринда якунлаган «Унион» 1 йилдан сўнг 7-поғонани банд этганди. 2020|2021 йиллар мавсумида эса «халқ жамоаси» мавсумни 5-ўринда якунлаб, ўз тарихида илк марта ЕЛ йўлланмасини қўлга киритди. Мана, «Унион» якунланган мавсум кучли квартетдан жой олди ва энди ЧЛдаги дебютга шайланмоқда. Қолаверса, берлинликлар Бундеслига иккинчи даврасида чемпионликка ҳам даъвогарлик қилишди. Табиийки, бу яқиндагина элитага кўтарилган жамоа учун жиддий тараққиётдир.
Мавсум шиддати - «Байер». Леверкузен клубида Хаби Алонсо иш бошлаганидан кейин кескин силжиш кузатилганини алоҳида таъкидлаш керак. «Байер» раҳбарияти Бундеслига билан яхши таниш, лекин топ-чемпионатларда ишлаш тажрибаси йўқ ёш мураббийга ишонч билдириб, катта таваккалга қўл урганди. Ўзи жамоада бошқа йўл ҳам қолмаганди. Зеро, «доришунослар» ўтган йилнинг октябрида чуқур инқироз ҳолатига тушдилар. Амалда испаниялик мутахассис бир уринишда барчасини тўғри йўлга қўйди ва «Байер»ни жадвал тубидан 7-поғонага кўтарди. Бундан ташқари, «доришунослар» Алонсо бошқарувида ЕЛ ярим финалига ҳам чиқишди. Шу тариқа Алонсо номдор жамоалар эътиборига тушди. Тўғри, унинг ўзи яқинда фаолиятини ҳали «Байер»да давом эттиришини маълум қилди.
Мавсум омадсизи - «Боруссия» Д. Бу масалада бошқа вариантни кўрсатиш мумкин эмас. Ахир «Боруссия» шундоқ қўлида турган чемпионликни бериб қўйди - чинакам омадсизлик. Ахир «Бавария» сўнгги йиллардаги энг ёмон мавсумларидан бирини ўтказди - мураббийлар алмашуви, келишмовчиликлар, ўйин сифатининг пасайиши, раҳбариятга боғлиқ истеъфолар... Буларнинг барчаси «арилар» учун чексиз имкониятлар яратганди. Қўшимчасига, «Боруссия» охирги турдан олдин «рекордмайстер»дан 2 очко илгарилаб кетган ва финишда мотивацияси қолмаган «Майнц»ни енгса, чемпион бўларди. Бироқ «арилар» 25-дақиқага қадар 2та гол қўйиб юбориб, оддий кўринган вазифани ўта мураккаблаштиришди. Якунда «Боруссия» мувозанатни тиклади, аммо ғалаба голини уришига вақт қолмади. «Бавария» эса сўнгги ўйинни сеҳрли тарзда ўз фойдасига ҳал қилиш асносида тўплар нисбати бўйича чемпионликни илиб кетди. Янги мавсум натижаларини олдиндан тахмин қилиш қийин. Лекин Дортмунд клубининг салкам 100 фоизли имкониятни бой берганига гувоҳ бўлган мухлислар узоқ вақт афсусланишлари тайин. «Бавария» эса раҳбариятдаги ўзгаришларни якунига етказади, таркибни кучайтиради ва Томас Тухель раҳбарлигида янги мавсум тайёргарлигини талаб даражасида ўтказади катта эҳтимол.
БУНДЕСЛИГА-2022|2023 ЯКУНИ
Чемпион: «Бавария»
ЧЛга йўлланма: «Бавария», «Боруссия» Д., «РБ Лейпциг», «Унион»
ЕЛга йўлланма: «Фрай-бург»
КЛга йўлланма: «Байер»
Бундеслига 2га қулаш: «Шальке», «Герта» («Штутгарт» «плей-офф» ўйини орқали ўз ўрнини сақлаб қолди)
Содиқ СОБИР тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
