АПЛ клублари 2023/24 йилги мавсум олдидан катта маблағ сарфлаб, янги футболчилар сотиб олишди. "Арсенал", "МЮ" ва "Ливерпуль" футболчи харид қилишга эътибор берган бўлса, "Манчестер Сити" ҳозирги таркибини етарли деб ўйламоқда. "Челси" эса, асосан таркиб футболчиларини сотиш билан вақт ўтказди. Қуйида АПЛ клублари томонидан харид қилинган ва энг яхши маош тўланадиган футболчиларнинг олди ўталиги билан танишасиз (маошлар қиймати ҳафталик кӯрсаткичда).
10. Андре Онана (120 минг фунт)
Давид Де Хеа билан орани очиқ қилгач, "МЮ" янги дарвозабон қидира бошлади. Эрик тен Хаг эски шогирди Андре Онанани "Интер"дан 47 миллион фунт эвазига сотиб олди. Унинг маоши 120 минг фунт ва бу дарвозабонлар орасида яхши кўрсаткичдир.
9. Доминик Собослаи (120 минг фунт)
"Ливерпул"га ярим ҳимоячи зарур эди. Шу сабабдан Соболаи олиб келинди. 22 ёш бўлишига қарамай, у Венгрия терма жамоаси сардори саналади. Унга катта клублар қизиқиш билан қараётган эди. Янги мавсумда "Ливерпул"нинг 60 миллион фунтлик хариди пулига арзиш арзимаслигини билиб оламиз.
8. Матео Ковачич (150 минг фунт)
Илкай Гюндоган ўрнига янги ярим ҳимоячи керак эди. У ярим ҳимоячи ҳар қандай рақибга техник ва жисмоний жиҳатдан чидамли бўлиши талаб этилган. Шу сабаб, Ковачич олиб келинди. Гвардиола уни Гюндоган ўрнига синаб кўради.
7. Юри Тилеманс (150 минг фунт)
"Лестер Сити"нинг АПЛдан тушиб кетиши, юлдуз футболчиларнинг кетишини муқаррар ишга айлантирди. Хусуан, Жеймс Меддисон "Тоттенхэм"га, Харви Барнс "Ньюкасл"га йўл олди. Тилеманс эса эркин агент сифатида "Астон Вилла"га келди. Балки текинга келгани учун ҳам "Астон Вилла" Тилемансга яхши маош тўлаётгандир. Аммо бельгияликнинг майдондаги бажарадиган иши бунга арзийди.
6. Алекс Макаллистер (150 минг фунт)
Макаллистер 2022/23 йилги мавсумдан кейин кетиши аниқ эди. У "Брайтон"да порлаб, Аргентина билан мундиалда ғолиб бўлди. Шу сабаб уни "Ливерпуль" тезлик билан сотиб олди. Алексисга 10 рақам насиб этди. Бу рақамнинг олдинги эгаси Садио Мане эди. Кўрамиз, у Мане каби бўла олармкин...
5. Кристофер Нкунку (195 минг фунт)
"Челси" франциялик ҳужумчини катта пулга харид қилди. Бу трансфер Почеттино ихтиёри билан содир бўлди дейиш мумкин. У "Лейпциг"дан тўпурар сифатида келди. Энди Нкункунинг маҳоратини АПЛда кузатишимиз мумкин бўлади.
4. Мейсон Маунт (200 минг фунт)
24 ёшида Маунт ЕЧЛни ютди. "Челси"нинг икки марта Йил ўйинчисига айланди ва 36 та ўйинда Англия терма жамоаси шарафини ҳимоя қилди. Афсуски, шундай футболчи "Челси"ни тарк этди. Шунга қарамай, ярим ҳимоячи янада номдор клубга бориб қўшилди. Энди Маунт "МЮ" шарафини ҳимоя қилади ва у ерда аввалгидан кўра уч баробар кўп маош олади.
3. Сандро Тонали (210 минг фунт)
ЕЧЛ Тайнсайдга 2003 йилдан бери илк бор қайтмоқда. Шундай пайтда "Ньюкасл" раҳбарияти бахиллик қилмаслиги керак эди. Шу сабабли клуб тарихида рекорд даражадаги трансферни амалга оширди ва 68.5 миллион фунт эвазига Тоналини сотиб олди. Футболчининг ўзи буни учалик ҳам хоҳламаган бўлиши мумкиндир. Аммо унга тўланаётган маош ҳаммасини ўзгартиришга қодир. 210 минг фунтни АПЛда ҳам унча-мунча юлдузга тўлашмайди.
2. Деклан Райс (240 минг фунт)
Ажойиб футболчи, даҳшатли сумма! Албатта, "Вест Хэм"дан ЕКЛда ғолиб бўлган Райсни олиб кетиш осон бўлмаслиги аниқ эди. 105 миллион фунт, энди футболчининг елкасига катта масъулият юклайди. 24 ёшли Райснинг даражаси шунга арзийди ва у ўзига лойиқ маошни олмоқда.
1. Кай Хаверц (280 минг фунт)
Ўтган мавсумдаги чемпионлик пойгаси аламли мағлубият билан тугади. Шундан кейин "Арсенал" камчиликларни тузатиш учун катта пул сарфлашга бел боғлади. Хаверц уч мавсум "Челси"да бўлди. Жамоада тартибсизликлар бошлангач, у кетиш пайига тушди. Ярим ҳимоячи ҳозир "Арсенал" билан ва ўз ўйинини янги даражага олиб чиқишга умид қилмоқда. Германия терма жамоаси аъзоси ЕЧЛ финалида ғалаба голига муаллифлик қилган. "Арсенал" ҳам ундан айнан шуни кутади. Ҳархолда, энди ҳафтасига 280 минг фунт бекорга тўланаётгани йўқ.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
