APL klublari 2023/24 yilgi mavsum oldidan katta mablag‘ sarflab, yangi futbolchilar sotib olishdi. "Arsenal", "MYU" va "Liverpul" futbolchi xarid qilishga e’tibor bergan bo‘lsa, "Manchester Siti" hozirgi tarkibini yetarli deb o‘ylamoqda. "Chelsi" esa, asosan tarkib futbolchilarini sotish bilan vaqt o‘tkazdi. Quyida APL klublari tomonidan xarid qilingan va eng yaxshi maosh to‘lanadigan futbolchilarning oldi o‘taligi bilan tanishasiz (maoshlar qiymati haftalik kӯrsatkichda).
10. Andre Onana (120 ming funt)
David De Xea bilan orani ochiq qilgach, "MYU" yangi darvozabon qidira boshladi. Erik ten Xag eski shogirdi Andre Onanani "Inter"dan 47 million funt evaziga sotib oldi. Uning maoshi 120 ming funt va bu darvozabonlar orasida yaxshi ko‘rsatkichdir.
9. Dominik Soboslai (120 ming funt)
"Liverpul"ga yarim himoyachi zarur edi. Shu sababdan Sobolai olib kelindi. 22 yosh bo‘lishiga qaramay, u Vengriya terma jamoasi sardori sanaladi. Unga katta klublar qiziqish bilan qarayotgan edi. Yangi mavsumda "Liverpul"ning 60 million funtlik xaridi puliga arzish arzimasligini bilib olamiz.
8. Mateo Kovachich (150 ming funt)
Ilkay Gyundogan o‘rniga yangi yarim himoyachi kerak edi. U yarim himoyachi har qanday raqibga texnik va jismoniy jihatdan chidamli bo‘lishi talab etilgan. Shu sabab, Kovachich olib kelindi. Gvardiola uni Gyundogan o‘rniga sinab ko‘radi.
7. Yuri Tilemans (150 ming funt)
"Lester Siti"ning APLdan tushib ketishi, yulduz futbolchilarning ketishini muqarrar ishga aylantirdi. Xusuan, Jeyms Meddison "Tottenxem"ga, Xarvi Barns "Nyukasl"ga yo‘l oldi. Tilemans esa erkin agent sifatida "Aston Villa"ga keldi. Balki tekinga kelgani uchun ham "Aston Villa" Tilemansga yaxshi maosh to‘layotgandir. Ammo belgiyalikning maydondagi bajaradigan ishi bunga arziydi.
6. Aleks Makallister (150 ming funt)
Makallister 2022/23 yilgi mavsumdan keyin ketishi aniq edi. U "Brayton"da porlab, Argentina bilan mundialda g‘olib bo‘ldi. Shu sabab uni "Liverpul" tezlik bilan sotib oldi. Aleksisga 10 raqam nasib etdi. Bu raqamning oldingi egasi Sadio Mane edi. Ko‘ramiz, u Mane kabi bo‘la olarmkin...
5. Kristofer Nkunku (195 ming funt)
"Chelsi" fransiyalik hujumchini katta pulga xarid qildi. Bu transfer Pochettino ixtiyori bilan sodir bo‘ldi deyish mumkin. U "Leypsig"dan to‘purar sifatida keldi. Endi Nkunkuning mahoratini APLda kuzatishimiz mumkin bo‘ladi.
4. Meyson Maunt (200 ming funt)
24 yoshida Maunt YECHLni yutdi. "Chelsi"ning ikki marta Yil o‘yinchisiga aylandi va 36 ta o‘yinda Angliya terma jamoasi sharafini himoya qildi. Afsuski, shunday futbolchi "Chelsi"ni tark etdi. Shunga qaramay, yarim himoyachi yanada nomdor klubga borib qo‘shildi. Endi Maunt "MYU" sharafini himoya qiladi va u yerda avvalgidan ko‘ra uch barobar ko‘p maosh oladi.
3. Sandro Tonali (210 ming funt)
YECHL Taynsaydga 2003 yildan beri ilk bor qaytmoqda. Shunday paytda "Nyukasl" rahbariyati baxillik qilmasligi kerak edi. Shu sababli klub tarixida rekord darajadagi transferni amalga oshirdi va 68.5 million funt evaziga Tonalini sotib oldi. Futbolchining o‘zi buni uchalik ham xohlamagan bo‘lishi mumkindir. Ammo unga to‘lanayotgan maosh hammasini o‘zgartirishga qodir. 210 ming funtni APLda ham uncha-muncha yulduzga to‘lashmaydi.
2. Deklan Rays (240 ming funt)
Ajoyib futbolchi, dahshatli summa! Albatta, "Vest Xem"dan YEKLda g‘olib bo‘lgan Raysni olib ketish oson bo‘lmasligi aniq edi. 105 million funt, endi futbolchining yelkasiga katta mas’uliyat yuklaydi. 24 yoshli Raysning darajasi shunga arziydi va u o‘ziga loyiq maoshni olmoqda.
1. Kay Xavers (280 ming funt)
O‘tgan mavsumdagi chempionlik poygasi alamli mag‘lubiyat bilan tugadi. Shundan keyin "Arsenal" kamchiliklarni tuzatish uchun katta pul sarflashga bel bog‘ladi. Xavers uch mavsum "Chelsi"da bo‘ldi. Jamoada tartibsizliklar boshlangach, u ketish payiga tushdi. Yarim himoyachi hozir "Arsenal" bilan va o‘z o‘yinini yangi darajaga olib chiqishga umid qilmoqda. Germaniya terma jamoasi a’zosi YECHL finalida g‘alaba goliga mualliflik qilgan. "Arsenal" ham undan aynan shuni kutadi. Harxolda, endi haftasiga 280 ming funt bekorga to‘lanayotgani yo‘q.
ISMATOV J.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
